Mʉkpanganɨa 22
22
Asɔɓɨɨ ɔkanio báya ngɨyɔ Abalaama
1Ɨyɛ ndʉ Isaka a꞉yokoko, Asɔɓɨɨ ɔ꞉mʉnapɨa Abalaama akɔ ikanio, nɔ, ɔ꞉misoko ɓɔ: «Ha, Abalaama-ee!» Ɨyɔ, Abalaama ɛ꞉saɓa ga «Hei, ɨmɨ ɨya!» 2Ga Asɔɓɨɨ nayɔ ɓɔ: «Ha gue, mʉsɨka mukpekpe wɔ mwana ngɨa asɔɔ, wɔ ɓʉkʉnda akɛ, Isaka, wɔ꞊sa nayɔ aɨkʉmbʉ yɔ Mɔlɨa, nɔ inani, wɔ꞊minjo ndʉ mutebii akʉʉ ɔ ɨkpangba mɛngana ngɨyɛ aki nabinapana-ɛɛ.» 3Tɨa nɔ ɓisi ngʉɓɔnanɨ ɓɔmɔ, Abalaama a꞉jʉkana nɔ imbo yɔ ikuɓa, ɔ꞉kyoɓo muhu wɔ tumbo wɔ nʉya mutebii, ɔ꞉mʉnawaka punda ngɨangɔ, ɔ꞉tɔsɨka atɨ mwana angɔ Isaka, ɨhɔ nɔ ɓombi ɓɔ tɛa ngʉɓangɔ ɓapɨnɨ. Kʉdɔ, ɔ꞉ngwɨa kyɛnda anɨsa aki Asɔɓɨɨ a꞉mʉpanaka-ɛɛ.
4Ambise ɔ kyɛnda yɔ makwaa kaatʉ, ɨyɛ ndʉ Abalaama a꞉nguso ajwa ɓɔ, ɛ꞉na tɨa ɨda ngɨyɛnɛnɨ sɨ kʉ ɗu ɓɔ kɛlɛ. 5Kʉdɔ, a꞉sigio ɓombi ɓɔ tɛa ngʉɓangɔ ɓɔ: «Inu, nɔ atɨ punda ngɨakɛ, tukoeni inu ta aka. Isu nɔ mwana asɛmɨ, ta꞊ɗeto isu aki akʉʉ ɔ ɨkpangba, akɔbibiso Asɔɓɨɨ, nɔ, tɔ꞊tɔwa dɔ tɨa nenu agbʉka.» 6Abalaama ɔ꞉sɨka muhu wɔ tumbo ngʉwɔnanɨ, nɔ, ɔ꞉mʉpakiso mwanangɔ Isaka. Ɨyɔ ingainga, ɔ꞉ɓoto dyaa nɔ mbɔtɨa, nɔ, ɓɛ꞉sɨnganaka nɔ kyɛnda ta ɨhɔ.
7Ga Isaka nɔ ɨsɛ aka ɓɔ: «Aba-e!» Ga ɨsɛ ɓɔ: «Hei mwana asɛmɨ, ɨmɨ ɨya!» Ga mwana nɔ ɨsɛ aka ɓɔ: «Dyaa ɨyɛkɛ, nɔ tumbo ʉka tɨa kʉ akɛ, nama ɔ mutebii ɔngɔ a tɨa gbanɨ?» 8Ga Abalaama nɔ mwanangɔ ɓɔ: «Mwana asɛmɨ, Asɔɓɨɨ makwɔngɔ akɛ, ɛnɨanɨa nɔ nama ngɨa ɔkwananɔ amutebii.» Kʉdɔ, ɨɓɔ nɔ mwanangɔ, ɓɛ꞉sɨnganaka nɔ kyɛnda.
9Ɨyɛ ndʉ ɓa꞉ɓɔya akɔ ɨda ngɨyɛ Asɔɓɨɨ a꞉panaka, ɨyɔ Abalaama, ɔ꞉tuɓoko gbɔ́gbɔ ɔ mutebii, nɔ, ɔ꞉mʉnawaka nɔ tumbo. Kʉdɔ, ɔ꞉mʉfa mwanangɔ Isaka ga kwɨ, ɔ꞉mʉsanga nɔ mʉgbɛ ga kpɛkɛ kpɛkɛ, ga ɨyɔ, nayɔ ɓɔ ɓataa ananɨ akʉʉ ɔ tumbo. 10Ga Abalaama nɔ mbɔtɨa ɓɔ tʉɓa, ɨyɔ, ga akio mwana angɔ ɨmɨɔ ta kioni. 11Yakamɛngana, ga malaika wɔ MAKWƆƁƗƗ anɨngwa akʉʉ ɔ ɓisi, nayɔ ɓɔ: «Abalaama, Abalaama!» Ga ɨyɔ ɓɔ: «Hei, ɨmɨ ɨya!» 12Malaika wɔ꞉mʉsigio ɓɔ: «Ʉwɛ, watɨnapɨamʉ ɨkɔndɔ akʉʉ ɔ mwana ngɨananɨ pɔ bele, nɔ, watɨmʉkɨamʉ ɨkyɛmʉ kʉɓanɨ! Ɨtakɨtakɨ ngɨyɛ, nɛmbɨɔ tɨa ɨmbɨanɨ ɓɔ wakyokumo Asɔɓɨɨ, dɔ, wɔyaamʉ nɛmɨ aninjo mukpekpe wɔ mwana asɔɔ.»
13Ɨyɛ ndʉ ɨyɔ, Abalaama a꞉tɨna ajwa ɓɔ, ɔ꞉tɛna gue ɔ kɔndɔlɔ mʉngana ɔfaneni nɔ mapakaa amati ɔ iju. Abalaama ɔ꞉sa nayɔ asɨka, nɔ, ɔ꞉minjo amutebii amʉdaka wɔ mwanangɔ Isaka. 14Kʉdɔ, Abalaama a꞉sʉa ɨda ngɨyɛnɛnɨ ino ɓɔ «MAKWƆƁƗƗ enjo injoni». Kwananɨ, akɔɓɔya kʉndʉ ɓʉɓʉnʉ, ɓombi ɓakyɔsugo suo ɓɔ: «Akɔ ɨkpangba yɔ MAKWƆƁƗƗ, Asɔɓɨɨ enjo injoni.»
15Malaika wɔ MAKWƆƁƗƗ wɔ꞉tɔmisoko ɓata Abalaama anɨngwa ta inani akʉʉ ɔ ɓisi, 16ga ɨyɔ nayɔ ɓɔ: «Monu kɔ MAKWƆƁƗƗ kasugo ɓɔ: ‹Manja ta ndʉ ɨmɨ, dɔ ʉwɛ, wɔ꞉kɨɔ ɓanɨ, nɔ dɔ, wɔ꞉nemomʉ ɨmɨ mukpekpe wɔ mwana ngɨasɔɔ, 17kʉɓanɨ, ɨmɨ ingainga na꞊nɔkiokio kiokioni, nɔ, na꞊chiso ɓanɔnɔ ɓɔsɔɔ ɓaja, ndʉ ndata akʉʉ ɔ ɓisi, nɔ ndʉ sasaɨ alisini. Ɓanɔnɔ ɓɔsɔɔ ɓa꞊hɨnɨa sina ɓagʉlʉ ɓɔ ɓakwa ɓeɓo hɨnɨanɨ. 18Dɔ ʉwɛ, wa꞉kyananakɨa ʉpanʉ ngʉwɔsɛmɨ, mababa kɔ ɓombi maɓomu iyani akɔ dɔdɔ, kɛ꞊nɨanɨa nɔ ʉɓʉnga ɨngbaa akɔ ɓanɔnɔ ɓɔsɔɔ.›» 19Abalaama ɔ꞉tɔwa agbʉka ɓombi ɓɔ tɛa ngʉɓangɔ, nɔ ɨɓɔ ɓaɓomu ɓɔ꞉ngwɨa kyɛnda atɔwa aki a꞉wolo-ɛɛ ɨkʉmbʉ anɔ Bɛlɨ-Sɛba.
Ɓana ɓɔ Naholi manye ɔ Abalaama
20Tɨa mbise ɔngɔ, ɓɔ꞉tɔɓɨa Abalaama ɓɔ Milika, a꞉mʉnɔtokio ɨyɔ manye Naholi ɓana ɓegue kʉ nɔtokioni. 21Tapio ɔngɔ Usi, Ɓʉjɨ a꞉nabanakɨa nɔ tapio, ananɨ tɨa Kɛmʉɛlɨ ngɨa a ɨsɛ wɔ Alamʉ. 22Yɔ꞉tɛka tɨa atɨ Kɛsɛdɨ, Hajɔ, Pɨlɨdasɨ, Ɨdɨlafʉ nɔ Bɛtʉɛlɨ. 23Ɓana ɓegue ɓɛgɨna ngʉɓa Milika a꞉nɔtɨa Naholi ngɨa manye ɔ Abalaama, ʉɓɔnanɨ. Bɛtʉɛlɨ a꞉tɔnɔta ɨyɔ tɨa Lɛbɛka. 24Naholi a꞉ɓio kʉ nɔ moi ɔ mbise, ino ɓɔ Lɛʉma. Ɨyɔ, a꞉mʉnɔtɨa kʉ ɓana ndʉ atɨ Tɛba, Galamʉ, Tahasɨ tɨa kʉ nɔ Maaka.
Markert nå:
Mʉkpanganɨa 22: buuN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc.
