เลห 25
25
ลอง ปี ดี โลว หลู เฆ ดูอี อีซาเรลัะ
1เฌาพรา วี ต็อห ดี อาโมวแซ, 2“เบ โลว กาลาง ดี เฆ ดูอี อีซาเรลัะ, แตห เฆ กาฌูะ โกรวกราม ดอน โมยว, แตห อึณ แบน ปี ดี หลู เฆ ดี โอว. อาเซ มึห น็อห ซี หลู, แตห อัน ดัว แคะ ปี ซี หลู อัน, แตห แม บอ รับ ปี หลู ตี. 3อึณ ยี มูห ดอน โมยว ปี ปึอน ดัว เฆ. บอ ครีว, รึอน เฆ บ็อง, 4บอ บีก ปี โบง เฆ ตา กาตัม ลูย, บอ เซณ อี คอง, อี ฆูย คอน, อี เรณ แฆ, บีก ปี โบง เฆ ตา เซณ จาโมย เฆ ฮึก แป. 5เฆ บอ โลว ดัว บอ ฮูน มาบู อี จูด ซีนัม เรณ, บอ ฮูน มามัก อึม, บอ เฮ กาทีน.#25:5 เฮ กาทีน ปี ตา เฆ ตี มูห อาโมยว อี ตาง กาเซา 6แตห เฆ บอ ดัว นามัน ปี โลว ฮับ แคง เงา ราง นามัน, บอ อึณกรึห อูห หงูน ปี โลว เฆ ดอ โบง เฆ นามัน อูห หงูน อี โลว พ็อห ดี ดูอี, บอ อึณกรึห อูห หงูน ปี โลว เฆ ดอ ปีด็อะ เงา อูห หงูน ดี อาต เฌาพรา. 7แตห เฆ บอ ดัว แซณ ว็อง ลูย บอ แซณ แบน โมยว แบน โมยว, แตห เฆ ปึอน ดี ดึก ดี ซีโตว ปี ตา ดา ตาง อี หลู ดี เฌาพรา, แตห เฆ บอ ดึก ดี ฮู ปี โลว เบลห ดา ตาง อี หลู ดี เฌาพรา ดี บังน็อห อัน.#25:7 ซีโตว ปี ตา ดา ตาง อี หลู ดี เฌาพรา, อัน จืร เอโพด
8เบ ฮี ฮอต หลู โกรวกราม ฌึร ตี ดอน โมยว, เบ โลว จัร ดูอี โบง ทึบ บีก บอด อาดา โอว. แฮะ ฮอต, โอว ดี บอ กอย กาแต เบ. 9บอ ทึบ บีก นี, บอ ปี โลว เบลห เบ นา แคง ดอน โมยว, เบ โลว โบง โตต, แตห อึณ ปี ปี ดี บยัะ โอว ดี แม. แกวะ แตห อึณ กาวัห มาเซ.” แคะ ตี เฌาพรา แฮะ จัร อาโมวแซ โบง.
ลอง ฌีดืก ปี โลว โบง เฆ
10แฮะ ฮอต, เฌาพรา วี ต็อห, “แม โลว จัร ดูอี โบง ฌีดืก อู โบ็ง. เฆ โลว โบง ฌีดืก ตี, ตา เฮ กาทีน. ฌีดืก ตี, นา โต็ง อัน โลว โบง อา กานีห ดี อู กาซาน. นา ตาง อัน โลว โบง อู กานีห ดี อู กาซาน, บอ นา จา อัน โลว โบง อู กานีห ดี อู กาซาน. 11เบ บอ โลว ดึห ครีว บอด โบง แบน บลัะ, ปีด ดอน บลาก, บอ นา แคง บอ นา เรต. เบ บอ โลว โบง บอ บาง ครีว แตห อึณ โรบ ฌีดืก ตึอน. 12เบ บอ โลว โบง ควัง ครีว พวน ควัง, ดึก ดี เปลา อัน ดี เบรต, อู เบรต อา ควัง. 13แฮะ ฮอต ปัน ตี เบ บอ โลว ดึห เฮ กาทีน โบง มัง ฆอด, วี ปีด ครีว. 14เบ บอ โลว ปลอะ มัง ฆอด, แตห อึณ กอ ฮาว แคง ควัง ตึอน, แตห ดูอี ปึอน ดี ฆอด อัน. 15มัง ฆอด ตึอน โลว กอย แคง ควัง เซเซ, แกวะ แตห เบ ทอด ดอ เหมา. 16เบ ฮี ฮอต โบง ฌีดืก ตี, โอว ดี วี ดัว มาว อา ดีพลาง ปี แดม อูน โอว ดารา โอว. มาว ตี เบ โลว เบลห อูน แคง ฌีดืก ตึอน.
17เบ บอ โลว ดึห ครีว บอด, โบง ซีบลึก, กาบีด ฌีดืก.#25:17 ซีบลึก ตี วี แบน โดง ดี กอย เฌาพรา, โดง ปี ดี บยัะ ลอง เฌาพรา กาเว ดูอี ซีบลึก ตี โลว โบง นา โต็ง อา กานีห ดี อู กาซาน, นา ตาง อู กานีห ดี อู กาซาน. 18เบ บอ โลว ดอก ครีว โบง ราง อามู อามาด เฌาพรา อา กาดัง อี จืร เครูบ, แตห ฆาย กอย ดี อา บลาก นา แดง ซีบลึก ตึอน. 19เบ โลว เบลห ฆาย, แตห ฆาย กอย อู บลาก อู กาดัง. บอ ราง อามู อามาด เฌาพรา บอ ซีบลึก ตึอน เบ โลว โบง แตห อึณ แบน อู ซีะ. 20อารึบ อามู อามาด เฌาพรา ฆาย ตี, เบ โลว โบง แตห ฆาย โจะ เพียง ฆาย โซ็ง นา อาต, แตห เพียง วี กอย นา แดง ซีบลึก ตึอน, แตห ฆาย ลาย มางัห, มูด ยอด ฌีดืก. 21เบ แฮะ ฮอต โบง ปาย ตี เบ โลว เบลห ซีบลึก ตึอน นา แดง ฌีดืก. แฮะ ฮอต, เบ โลว อูน มาว อา ดีพลาง ปี ดี ดัว โอว ดี เบ, แตห อึณ กอย นา แคง ฌีดืก. 22นา แดง ฌีดืก ตี, โอว ดี กอย กาลาง โฆรห ดี เบ. โอว ดี กอย ดี กาแต อามู อามาด โอว อา กาดัง ตึอน, ควาง เบ, แตห เบ กาตูณ โอว, แตห โอว กาลาง ดารา ดอน โมยว ดี เบ, แตห เบ วี โบง โตต ดอน โมยว ปี กาลาง โอว ดี เบ.” ปาย ตี เฌาพรา จัร เฆ โบง.
ลอง กาโช็ง โดง เบลห คามูน
23เฌาพรา แฮะ ฮอต กาลาง ดี อาโมวแซ, อัน วี ต็อห, “แตห เบ วี ดึห เฮ กาทีน โบง กาโช็ง อู โบ็ง. เบ โลว โบง แตห นา โต็ง อา กานีห, นา ตาง อู กานีห, นา จา อู กานีห ดี อู กาซาน. 24กาโช็ง ตี เบ โลว ปีด ครีว บอด. เบ บอ โลว ดึห ครีว บอด โบง บาง อัน. 25นา เรต บาง ครีว ตี, โลว โบง ปอ อู บาง, ตา เฮ กาทีน. โลว โบง แตห นา ตาง อัน อู กาบา แด. ดี โคบ บาง เฮ กาทีน ตี บอ โลว ปีด ครีว. 26แฮะ ฮอต ปัน ตี เบ บอ โลว ดึห ครีว, โบง ควัง อัน พวน ควัง, โบง แตห เฆ ดึก ดี เปลา กาโช็ง ตึอน บอ พวน กาโตะ. 27เบ โลว ดึก ควัง ดี โคบ กาโช็ง, แตห เฆ กอย นา ครึม บาง อัน, แตห เฆ ปึอน ดี ปลอะ ฮาว มัง ฆอด แคง ควัง, แตห เฆ ปึอน ดี ฆอด บอ กาโช็ง. 28เบ บอ โลว ดึห เฮ กาทีน โบง มัง ฆอด กาโช็ง. แฮะ ฮอต, เบ วี โลว ปีด ครีว. 29เบ บอ โลว ดึห ครีว บอด, โบง ซีลัยะ เฆ พาน, กาเปา เฆ อึณปาน ปี ตา ดูอี ดอ หลู เฆ อึม แบน โมยว แบน โมยว อี โลว โหลว ดี อาต เฌาพรา. 30เบ โลว หลู เซเซ คามูน ดี โอว, เบลห อูน นา แดง กาโช็ง ตึอน, แตห โอว ปึอน ดี ยึร เซเซ.”
ลอง เงา ราง ครีว
31เฌาพรา วี ต็อห ดี อาโมวแซ, “เบ มืร โลว โบง ดัง เงา ออม ตาง อู โบ็ง. เบ โลว ดึห ครีว บอด บอ ดอก, แตห อึณ แบน บอ ดัง อัน บอ แฆน อัน. ดี แฆน อัน โลว โบง แตห อึณ แบน ราง โบห, บอ โบห ดึม บอ โบห บรัห. บอ โดง ดี เบลห เงา ออม โลว โบง แตห อึณ ปี ราง โบห, แตห เบ โบง อู เฌณ บอกาเฆลียด. 32เบ โลว โบง ดัง เงา ออม ตาง ตี, แตห อารึบ อัน ปี รา เดา รา เลห แคง แฆน อัน, แตห รา เฆ เลห บอ อา บลาก, อู บลาก เลห โอย รา. 33ดี รา อัน ดอน รา เบ โลว โบง ราง โบห ปี โบห ซาเคด, อู รา โอย โบห. โบห ตึอน ดอน โบห โลว โบง แตห อึณ ปี บอ โบห ดึม บอ โบห บรัห. ปาย ตี แตห เบ โบง บอ เดา รา, แตห เฆ ลาย กาแหนน. 34ดี แฆน ดัง เงา ออม ตี, เบ ยี โลว โบง โบห อี ปี โบห ซาเคด, แตห อึณ แบน พวน โบห, แตห อึณ มึห บอ โบห ดึม บอ โบห บรัห. 35-36ดี แฆน ดัง เงา ออม ตี โลว โบง โบห แตห โบห อู โบ็ง กอย อี ครึม นา เลห รา อัน บอ โอย ฆู ตึอน, แตห อึณ มึห โตต เดา รา. เบ เบลห โบห แตห รา อัน ตึอน เลห นา แดง โบห อี กอย ดี แฆน อัน ตึอน. ดัง เงา ออม ตี, เบ โลว โบง ตา ครีว บอด, ดอก แตห อึณ แบน อู ซีะ บอกาเฆลียด.
37เบ แฮะ ฮอต โบง ปาย ตี เบ โลว โบง แตห อึณ แบน โดง ดี เบลห เงา ออม บู โบ็ง, อี กอย แดง แฆน เฆ รา ดัง ตี. เบ โลว ปีด็อะ เงา ออม ตี, แตห อึณ บลาง ดี โดง ปี เบลห เบ ดัง เงา ออม ตี. 38บอ อึณเกียบ เฆ อึณปาน ปี อูน ดูอี อาฌัะ ตึอน, เบ โลว โบง ตา ครีว บอด. 39ดอ โบง เบ ดัง เงา ออม เฆ อาฌัะ ปี ตา เฆ ดอ ลึมลา เฆ ดัง เงา ออม ตี, เบ โลว ตา ครีว อู ทาเลน, แตห เบ ปึอน ดี โบง โตต ดอน โมยว.#25:39 อู ทาเลน มูห กาบัก อา ฆึร ดี อา ซัะ 40เบ โลว โบง ซีคยา ดอน โมยว ปี จัร โอว เบ โบง. บอ แม โลว ซาดีก, แตห เฆ โบง กาฌี ดอน โมยว ปี กาลาง แหน โอว ดี แม อาโมวแซ ดอ กอย รึม แม โดบ โอว แดง นอน นี.”
Markert nå:
เลห 25: pce
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translator, Inc. All rights reserved.
