1 कुरिन्थियों 8
8
मुर्त्तियों खे चड़ाया गुवा भोग-भोजन के बारे दो
1ऐबे मुर्त्तियों के साम्णें चड़ाई अंदी बल़ी, के बारे दो आँमें जाँणों के आँमों सोभी कैई ज्ञाँन असो। अरह् ज्ञाँन लई तारीफ पय्दा हों; परह् पियारो लई आप्णी बड़ोत्री हों। 2जे कुँऐं ऐशो जाँणों के हाँव किऐ जाँणू ऐ, तअ जेष्णों तेने जाँणों चेंई, तैष्णों से हेभी तोड़ी ने जाँण्दा। 3परह् जे कुँऐं पंणमिश्वर आरी पियार करह्, तअ पंणमिश्वर तेसी जाणों ऐ।
4अरह्: मुर्त्तियों के साम्णें बल़ी करी अंदी चीजो खाणों के बारे दो, आँमें जाणों ऐ, के मुर्त्ती संईसारी दी किऐ चीज ने आथी; अरह् ऐकी के सुवाऐं कुँऐं ओका पंणमिश्वर ने आथी। 5तबे भे अस्माँनों अरह् धर्ती गाशी बैजाऐ ईश्वर माने ज़ाँव, जैष्णे के बैजाऐ ईश्वर अरह् बैजाऐ प्रभू असो 6परह् आँमों खे तअ ऐक ही पंणमिश्वर असो: मतल्व परंम-पिता पंणमिश्वर जिनके जाँणें बादी चींजो असो, अरह् आँमें तिनके ही असो। अरह् ऐक ही प्रभू असो, मतल्व प्रभू यीशू मसीया जिनके जाँणें बादी चींजो बंणी, अरह् आँमें तिन्हीं के जाँणें असो।
7परह् सोभी कैई ऐजा ज्ञाँन ने आथी, परह् कुँऐं लोग तअ हेभी भी मुर्त्तियों खे बल़ी करी अंदी चीजो खाँव, अरह् तिनके बिचार कंंमजोर हंणों के जाँणें अशुद्ध गाँन्दे हऐ ज़ाँव। 8भोजन आँमों पंणमिश्वर के नंजीक ने नींदा। जे आँमें खाँव ने तअ अमाँरा किऐ नुकसाँन ने आथी, अरह् जे आँमें खाँव तअ तिन्दें लई किऐ फाय्दा ने आथी। 9परह् च़ौक्क्ष रूऐ! कद्दी ऐशो ने हऐयों, के तुँवारी ऐजी अजादी कोसी कंंमजोर आदमी खे ठोकर-ढैस का कारण ने बंणों। 10किन्देंखे के जे कुँऐं तुँओं ज्ञाँनी आदमी मुर्त्तियों की देऊँठी दे, भोजन कर्दे दे:खो, अरह् से कुँऐं कंंमजोर बिचार का आदमी हों, तअ कियो तैस्के बिचारो दी मुर्त्तियों के साम्णें बल़ी करी अंदी चिजो खाणों के हिम्मत हंदी ने। 11ऐशा दाँई तेरे ज्ञाँन के जाँणें सेजा कंंमजोर बीचार वाल़ा भाऐ के बंईण जिनकी ताँईऐं मसीया मरे, तेसी आदमी को छत्तिया नाँष हंदी ने। 12ऐशा दाँई भाऐ के बंऐणीं के बिरूध पाप कर्णो खे अरह् तिनके कंंमजोर बिचार खे चोट पहुचाँणों, शी तुँऐं मसीया के बिरूध दा पाप करी ने। 13ईन्देंखे जे भोजन के जाँणें मेरे भाऐ के बंऐणीं के ढैस-ठोकर लागो, तअ हाँव कद्दी भे कोसी कारण शा माँस ने खाँदी, कद्दी ऐशो ने हईयों के मेरे भाऐ की बंऐणी दी ढैस-ठोकर ने लागो, अरह् हाँव तिनके पाप का भागी ने बंणू।
Markert nå:
1 कुरिन्थियों 8: sri
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2022, Wycliffe Bible Translators, Inc. All rights reserved.