Yaɓooda 2
2
1Dɔrã kɨ dɔning kɨ nyag kɨ kamdt tube ĩn kɨɗa. 2Ndɔt kɨkõtanãimɨta Luwah tɔlkon kɨlaɗan, na Luwah taakò dɔ kɨlaɗant tube kam ndɔt kɨkõtanãimɨta. 3Luwah njang dɔ ndɔ kɨkõtanãimɨta, ndaa kɔtkokɨɗa tela kɨjaɓat't kɨtɔ ndɔt'n non la Luwah dɨba ta kɨlaɗant tube ye.
4Titbe la i girrkooj dɔrãt kɨ dɔning lon Luwah ndahdɨn ye.
Ndɔt'n Bɨraɓe Luwah ɗa dɔning kɨ dɔrã, 5kag mad goto dɔningt, mũ mad kaa ɓa al ɓaitɔ, kɨtɔ Bɨraɓe Luwah ad ndii ed dɔningt al. De mad kɨ kad ndɔɔ dɔning goto ɓaitɔ. 6Kund man ɓai ko dɔningt, na nyom dɔning kɨtaagbe. 7Bɨraɓe Luwah ɓah de kɨ buning, na to kò kumkajir kɨ bulo kõnat, ad de tel ro kɨ kumkajir.
Ndɔɔ Eden
8Kamla Bɨraɓe Luwah hɔ ndɔɔ kam Edent ko loɓakàdt, na ndah de'n ɓaha nõ kamt. 9Bɨraɓe Luwah ad kagg kɨ dang dang kɨmaj koo kɨ kum, na maj kɨtɔ sa, ɓan kam dɔningt, ad kag kumkajir ɗa ngawden ndɔɔt, kɨ kag ger maj kɨ majal ho. 10Bah mad tee ko kam Edent kɨtɔkad nyom ndɔɔ. Nõbe bah tɔ nat girr sɔɔ. 11Bah kɨdasa tɔa i Pison, bah'n non gug dɔ dɔning Habila kɨtaagbe, lon lɔr i tit. 12Lɔr kɨ dɔningt'n non i kɨmaj, nõkag bdelion kɨ kɔsɨ oniks ĩn tit tɔ. 13Bah kɨkõjoo tɔa i Gihõ, bah'n non gug dɔ dɔning Kus kɨtaagbe. 14Bah kɨkõmɨta tɔa i Hidekel, bah'n non nũ aw kɨ loɓakàdt kɨ dɔning Asirit. Bah kɨkõsɔɔ tɔa i Eprat.
15Bɨraɓe Luwah un de, na ndaa kam ndɔɔ Edent kad ndɔɔ kama, na kɨ oo goa tɔ. 16Bɨraɓe Luwah ndamber 'nten de an: Asɨ sa kand kagg tube kɨ kam ndɔɔt. 17Na kand kag ger maj kɨ majal a i sa al, kɨtɔ ndɔt'n a i sa a ne, a oi ɗuba 18Bɨraɓe Luwah el an: Maj kad de i kɨ kɨɗanbe al, m'a m'ɗa ngeɗasia kɨ sumbaa. 19Bɨraɓe Luwah ɓah dã kɨmut kɨɗen kɨ yel kɨ dõ kɨɗen kɨ dɔning, na aw sed ro det kad kɨ'n oo titbãi de a ndan tɔd. Tɔ'n de ndah dɔ nyandaht kɨ kumkajir. 20De'n non ndah tɔ nyakulg tube kɨ yelg kɨ dõ tube kɨ dãg kɨmut tube na de taa ne, ngah ngeɗasen kɨ sumban al. 21Bɨraɓe Luwah ad ɓi kɨtɔlsɔkɨr so kum det ad ɓi. Ɔrr kɨngakada kɨɗa, na ut goota kɨ dãã gog. 22Kɨnga'n ɔrr kad det ye, Bɨraɓe Luwah tela dekɨdẽt, na aw sia ro dekɨdɨngãt. 23Dekɨdɨngã el an:
Tajigla, ĩn ɗan la i kɨnga kɨngamg,
i dã dãm.
A kunɨna dekɨdẽ
kɨtɔ ɔrrɨna ko kam dekɨdɨngãt.
24Kɨtɔ 'nten la dekɨdɨngã a nya'n bɔwɨn kɨ kõn,
na tĩnyan na kɨ nẽn ye. Ĩn tujoo ĩn dãro kɨɗa.
25Dekɨdɨngã kɨ nẽn, ĩn tujoo rod i kari, na rod sɔld al.
Markert nå:
Yaɓooda 2: MlL
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mbai Bible Revision © Bible Society of Chad, 2015.