Jẹnẹsisi 3
3
Isi Nke Ẹtọ
Njọ Ibuzọ Lẹ Afụnfụn Sọnn'ẹ
1Imẹ anụ-ọfịa ile Osolobuẹ wụ Chuku ke, agwọ kachanrịn akọ e nwọn. Ọ nọ sị okpoho hụ, “Osolobuẹ sịdẹ nwan ụnụ erilẹ mkpụrụ osisi ọwụlẹ imẹ ugboni ra?” 2Okpoho hụ nọ sị agwọ, “Mba; ẹnyi nwọn ikẹn ri mkpụrụ osisi ọwụlẹ rị ugboni; 3kanị, Osolobuẹ sị ẹnyi, ‘Erikwọlẹ ni mkpụrụ osisi ahụn rị etintin ugboni mọbụ mẹtụ a ẹka, amamgbe ụnụ a nwụnhụn.’ ”
4Kanị agwọ nọ sị okpoho ahụn, “Ụnụ anwụnhụnkọkwọ! 5Osolobuẹ ku ẹ makẹni ọ marịngụọ nị hụn ụnụ gihụ ri ẹ, ẹnya ụnụ k'a shịapụ, ụnụ a rị kẹ Osolobuẹ: ụnụ a marịn ihiẹn rị mma lẹ ihiẹn rịlẹni mma.”
6Ọ nọ ban okpoho ahụn ẹnya nị mkpụrụ osisi ahụn rị mma wẹ e ri, n'ọ la ẹnya, n'ọ rịka mma nị ịhịan ri ẹ marịn ihiẹn. Ya ọ nọ ghọrị mkpụrụ a ri, yezikwọ di ẹ ya lẹ ịya rị, di ẹ nọ ri. 7Ya kẹ ẹnya wẹ ẹbụbụọ nọ shịapụ, wẹ nọ marịn nị wẹ gba ọtọ. Wẹ nọ kparịsọnmẹ ẹhụhụọ figi, kwagbama wẹ, gi kpumẹ ọtọ wẹ.
8Ogẹn wẹ gi nụ ukwere Osolobuẹ wụ Chuku k'ọ ghakọ imẹ ugbo ogẹn ufere gi rị e fe ụhụọhịn hụ, Adam lẹ nwunyẹ ẹ nọ warị ebe osisi rị imẹ ugbo ebẹhụ, makẹ Osolobuẹ wụ Chuku gha a hụn wẹ. 9Ya kẹ Osolobuẹ wụ Chuku nọ hị Adam, “Elebe kẹ ị rị?” 10Adam nọ sị, “M nụ ukwere i imẹ ugbo, egun nọ tụma m makẹni m gba ọtọ, ya kẹ m nọ warị.” 11Ya kẹ Osolobuẹ nọ sị a, “Onyẹ gwa ị n'ị gba ọtọ? I ridẹ nwan mkpụrụ osisi ahụn m sị ị yụ erilẹ ra?” 12Ya Adam nọ sị a, “Okpoho hụn i butọ mmẹ lẹ ịya, ịya ye m mkpụrụ osisi ahụn, m nọ ri.” 13Osolobuẹ wụ Chuku nọ sị hụn okpoho, “Kị wụ ihiẹnni i mẹ?” Hụn okpoho nọ sị, “Agwọ dufie m, m nọ ri.”
14Osolobuẹ wụ Chuku nọ sị agwọ,
“Ufiri ihiẹnni i mẹ,
m rị nwan a bụ ị ọnụ —
ịyụ sụọ, imẹ anụ-ụlọ ile
lẹ anụ-ọfịa ile.
Ẹfọ kẹ y'e gi a kpụn alị;
ẹjan kẹ i k'a gha e ri —
y'e we nwụn.
15“M k'e mẹ ịyụ lẹ okpohoni wụrụ eṅẹnrẹn, mẹzikwọ nwa ị lẹ nwa a wụrụ eṅẹnrẹn. Nwa a k'a zọkpọ ị isi; yụ nwẹn k'a ta nwa a atụ-ụkụ azụụn.”
16Ọ nọ sị hụn okpoho, “M k'e mẹ ọmụmụ fụwaye i ọrụn — ẹfọ-imẹ k'a tụrụ ị ọda-ọda, bụ ị k'a rị a chọkwọ di i; di i k'a kị ị.”
17Ọ nọ nwan sị Adam, “Ufiri nị y'e giọlẹ oku nwunyẹ i dọn, ri mkpụrụ osisi ahụn m tin'i iwu, sị ị erilẹ, m rị nwan e gi ufiri i a bụ alị ọnụ: i k'a tama ezigbo afụnfụn rụn ugbo i kebe hụn ihiẹn i k'e ri y'e we nwụn. 18Ogun-lẹ-ọkịnkan kẹ alị jẹnkọ d'a rị e pupụhanị ị; ihiẹn ugbo wepụha k'i k'e ri. 19Ọbanje k'e sugụ ị i kebe hụn ihiẹn-oriri d'e ru mgbe i kin azụụn imẹ alị — makẹni alị kẹ m nọ weri i: ẹghẹẹ, ẹjan kẹ ị wụ; ẹjan kẹ y'a la.”
20Adam kpọ nwunyẹ ẹ “Ivu#3.20 Ivu wụ Ịrị-ndụn.”, makẹni ịya wụ nnẹ ịhịan ile.
21Osolobuẹ wụ Chuku weri akpụkpọ-anụ gi mẹmẹni Adam lẹ nwunyẹ ẹ ẹwuru, yimẹ wẹ. 22Ya kẹ Osolobuẹ wụ Chuku nọ sị, “Lee ẹ nwan, ịhịan a rịọlẹ kẹ ẹnyi: ọ marịngụọ nwan ihiẹn rị mma lẹ ihiẹn rịlẹni mma. O ru tan, ọ tịnpụ ẹka ghọrịzịkwọ mkpụrụ osisi ahụn e ye ndụn, ri, rị ndụn jẹnrin ejẹn.” 23Osolobuẹ wụ Chuku nọ nwan chụpụ a imẹ ugbo ahụn rị alị Idẹni, kẹni ọ rụnma ugbo akpakalị nwẹn Osolobuẹ wụ Chuku nọ weri ẹ. 24Osolobuẹ a chụpụgụ ịhịan, ọ nọ bu Chẹrobu ẹbụọ nwọn nku lẹ ọpịa-agha rị e nwun ọkụn e fehunmẹ ohi-ohi che azụụn ọwụwa-ẹnyanwụn ugbo ahụn, gi chekin ebe wẹ gha e jẹn ukun osisi ahụn e ye ndụn.
Markert nå:
Jẹnẹsisi 3: ikkBI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.