रोमि 9
9
निनाम्हाङ खोन्कि अ़चुम़नाचि
1ख्रिस्त अ़ङ्सालुम्स़ङ म़युङ्याङ, अ़ङ्का अ़नुछ्या चेप्ङाङा। अ़ङ्का अ़म़प्ऩङ। सेङ्लावाआ अ़ङ्लावा सालुम्स़ङ प़ङु। 2अ़ङ्साकोङ्वादा अ़न्नुनु सोखा खोन्कि अ़ङ्मिन्मादा अ़लुक्निन्ओ योक्मा याक्याङ। 3अ़ङ्का अ़ङ्रावाचि, आप्पिओ अ़ङ्दाक्मित्चिओ निम्पाङ अ़ङ्काङा माङ्हिम्ङाने, खोन्कि ख्रिस्तदाङ्का फेक्ङानेनि मिन्ङाङा। 4मोचि इस्राएलिचि ओ, खोन्कि मोचि निनाम्हाङ्आ म़छेन्तुचिओ अ़चुतात्मा छाचि ओ। निनाम्हाङ्आ मोचि खोक्कोसोओ अ़चुसाम खाङ्म़मेत्तुचि। खोक्कोसाआ मोचि अ़छ़ङ म़हिप्तुचि, खोन्कि य़ङ्हुप म़प़चि। खोक्कोसाआ खोक्को ब़क्मा खोन्कि हिप्माय़ङ्चि तोक्माओ अ़वाखाम म़प़चि। 5अ़चुसुन्तुम्चि अब्राहाम, इसाक खोन्कि याकुब ओ। खोन्कि ख्रिस्त्छाङ पोक्दा मोचिओ अ़चुरावा ओ। झारादाङ्का तोक्पो निनाम्हाङ्ओ अ़धुन अ़चुऩङ चोन्ने! मोवात्निङा लिने।
6खोन्नालो दि निनाम्हाङ्आ अ़चुओ हिप्माय़ङ यहुदिचिओ निम्पाङ मान्तालाअ़दा? अ़तासाला! ओ सिन्तानुम, झारा इस्राएलि म़नाचि निनाम्हाङ्ओ अ़चुम़नाचि माआङ। 7अब्राहाम्ओ अ़छाचि म़लिसाहिदा झारा खोसोओ अ़छाचि मान्लिचि। देकिनालो निनाम्हाङ्आ अब्राहाम अ़लोवा, “इसहाक्लाम्पाङा आम्छाचिओ अ़चुऩङ युङ।”#पुङ्चिपुक २१:१२ 8ओसोओ अ़तुप्माय़ङ, पोक्दाङ्का म़लिसाओचि निनाम्हाङ्ओ अ़चुछाचि माआङ, मेन हिप्माय़ङ्दाङ्का म़लिसाओचि अब्राहाम्ओ अ़छाचि ओ। 9देकिनालो मो हिप्माय़ङ ओवात्नि य़ङ्याङ, “तोङ्ओ ग़रिदा अ़ङ्का लाङाताङा खोन्कि साराओ अ़क्छा अ़छा लि।”#पुङ्चिपुक १८:१०
10मोन ओन्ङा माआङ, मेन रिबेकाआ अ़क्छा दुवाछा आन्सुन्तुम इसहाकदाङ्का बुक्खुया। 11खोन्कि काप्छाले छाचि तोक्मा बुया, मोचिआ अ़नुवाक माङ्लो अ़अ़त्पा च़मा बुयाङा, काचिआ माआङ, मेन खोक्कोसाआ म़बुत्तुचिवा निनाम्हाङ्आ म़छेन्तुचिओ कान्ने निम्पाङ, 12निनाम्हाङ्आ रिबेका ओवात्नि अ़लोवा, “कुम्पाआ सिप्पा ब़त्मादोत।”#पुङ्चिपुक २५:२३ 13ओवात्नि छाप्तायुङ्सा, “याकुब अ़ङ्का सोमातुक्तुङ, मेन एसाब ऩङाछिरुङ।”#मलाकि १:२-३
14हान आन्कान दे य़ङिन म़ल़क? दि निनाम्हाङ अ़अ़त्पा म़मुयाङ? देम्खाछाङ माआङ! 15देकिनालो खोक्कोसाआ निनाम्हाङ्य़ङ खाकालु मोसा अ़लोवा,
“साङ अ़ङ्का सोमातुक्मा स़ङा, मो अ़ङ्का सोमातुक्तुङ,
खोन्कि साङ अ़ङ्का खाङ्मा स़ङा, मो अ़ङ्का खाङ।”#लाम्वाङ्माय़ङ ३३:१९
16खोन्ओसा ओ म़नाओ अ़मित्मा माङ्लो काचि मुमादा ओ अ़याक्निन, मेन ओ निनाम्हाङ्ओ अ़चुसोम्तुक्मादा याक। 17साम्कालिन्आछाङ फारो लो, “अ़ङ्को अ़ङ्सावा खानाएदा खाङ्मुमा मित्चिऩङ्आ खोन्कि झारा हेन्खामादा अ़ङ्ऩङ खालुने निम्पाङ अ़ङ्का खाना एम्ना।”#लाम्वाङ्माय़ङ ९:१६ 18खोन्ओसा खोक्कोसाआ साङ सोम्तुक्मानि म़मिन खोङा सोमाअ़तुक, खोन्कि खोक्कोसाआ साङ्कोओ अ़साकोङ्वा छाक्लो मुमानि म़मिन, खोसाआ छाक्लो म़मेत्तुप़चि।
निनाम्हाङ्ओ अ़चुमाइसुङ खोन्कि सोमातुक्मा
19खोन्कि खाना अ़ङ्का त़लोङा, “खोन्नालो देकि आन्कान निनाम्हाङ्आ लाहि म़पाक्याङ? देकिनालो खोक्कोसोओ अ़चुमित्चिऩङ्दा साङ्आ खोक्को छेक्मा अ़ऱ?” 20मेन म़ना त़लिकि निनाम्हाङ्ओ अ़चुय़ङ काला खाना साङ ओ? दि बाखाओ ब़आ मो काबोप्पा “अ़ङ्का देकि ओवात्नि त़बोआङ्ओ”नि लो कि?#यसैया २९:१६; ४५:९ 21दि मो अ़क्तात्ङा बाखा बोप्दाङ्का अ़नुवाक मित्चिऩङ्ओ खोन्कि ताक्पेत्नि याङ्मा निम्पाङ ब़काबोप्आ बोप्मा अ़पाङ मात्द़ङ कि?
22निनाम्हाङ्आ अ़चुच़ऱपा खोन्कि अ़चुसावा खाङ्मुमा म़स़नालो खोक्कोसाआ खाङ्मुमा अ़ऱ। मेन खाक्कोचि दन्दा प़मा खान्तुचिओ म़मुयाङ, दि खोक्को मो म़नाचिओ निम्पाङ अ़न्नुनु काहुङ ऩमुनिनिन? 23उवा, साम्ओ निम्पाङ बुया म़चुम्सुचिओ, खोन्कि खोक्कोसाआ सोमा म़तुक्तुचिओचि, ब़द्धे अ़चुऩङ्लोङ्मा खाङ्मेत्माचि निकिना खोक्कोसाआ ओवात्नि अ़मुवा। 24खोक्कोसाआ आन्कान्छाङ मो रुहुप्दा म़पाआ। खोक्कोसाआ यहुदिचि ओन्ङा माआङ, मेन निरावाचिछाङ म़बुत्तुयुङ्सुचि। 25ओवात्निङा होसेओ अ़छाप्लाखादाछाङ निनाम्हाङ म़य़ङ्याङ,
“साङ्चि अ़ङ्म़नाचि मान्मुयाङ्चि,
मोचि अ़ङ्का ‘अ़ङ्म़नाचि’नि बुत्तुङ्च़ङ।
खोन्कि अ़ङ्का साङ सोमामान्तुक्ङा,
मो अ़ङ्का ‘सोमातुक्नाओ’नि लोङ।”#होसे २:२३
26“खोन्किना,
खादा ‘खानानिन अ़ङ्म़नाचि माआङ’नि ऩलोन्ओ,
मोदाङा मोचि ‘अ़ह़ङ निनाम्हाङ्ओ अ़चुछाचि’नि म़लोचि।”#होसे १:१०
27इस्राएल्ओ अ़तुक्वादा यसैया खालु,
“इस्राएल्ओ अ़छाचिओ अ़चुखिप धियाङ्वामादाओ लुङ्च़क़य़क ओन्तेका मुयाङ्नुछाङ,
अ़चुप्पो रुहुप ओन्ङा म़लेत।
28देकिनालो हाङ्पाआ हेन्खामादा खोक्कोसोओ अ़चुदन्दाओ काचि चाअ़त्लो खोन्कि च़क्नि अ़ताला।”#यसैया १०:२२-२३
29ओवात्नि यसैयाआ बुयाङा निनाम्हाङ्य़ङ खालुसुयुङ्सु,
“रात्खामिचिओ सावापोरिओ अ़चुओ हाङ्पा निनाम्हाङ्आ आन्छाचि मान्हेन्म़दोचिओदे,
आन्कान सदोम्वात्नि लिसिन्ओ,
खोन्कि गमोरावात्नि लिसिन्ओ।”#यसैया १:९
इस्राएल्ओ अ़साकोङ्छ़ङ मान्मुदामा
30हान आन्कान दे य़ङिन म़ल़क? साम्योक्मि मान्त़ङ्कादा निरावाचिआ साम्योक्मि अ़तोक्तायुङ्सा, मो साकोङ्छ़ङ्लाम्पाओ साम्योक्मि ओ। 31मेन इस्राएल्आ, य़ङ्हुप्दाओ साम्योक्मि त़ङ्तुनुछाङ, मो मान्तोक्दो। 32देकि? देकिनालो साम्योक्मि काचिचिदा याक्नि म़मिना खोन्कि मोचिआ साकोङ्छ़ङ्लाम्पा साम्योक्मि मान्लाम्अ़दा। ख्रिस्त खोचिओ निम्पाङ लुङ्छ़ङ्वात्नि म़लिसा मोदा मोचि म़धुङ्सा। 33ओवात्नि छाप्तायुङ्सा,
“खानुम, अ़ङ्का सियोन्दा अ़क्तात लुङ युङ्सुङ्योङ,
मोदा म़नाचि म़धुङ,
खोन्कि अ़क्तात लुङ्छ़ङ युङ्सुङ्योङ, मोसाआ मोचि धाम्सुचि,
मेन खोक्कोएदा साङ सोम्कुवा मु, मो लेजोदा अ़छुक्निन।”#यसैया ८:१४; २८:१६
Markert nå:
रोमि 9: bap
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© Wycliffe Bible Translators, Inc. All rights reserved.
