Matiye 3
3
Jan-Batisi ila mbər arə dəwje
1Dɔ ndɔɛ̂ tə̂ənn, Jan-Batisi unda lo tee mə kɔr tə̂ kə̂ Jude ngaâ aw ila mbər. 2N̂-pa nan: «Ə-turuje məse nyɔm, mba kɔn-mbay kə̂ darâ ddee ngɔsi ngaa.» 3Jan nəənn le â Ejayi kə̂ to nje-kila mbər tar lə Lubba pa tar laa ləw nan:
«Marə dəw aw ila mbər mə kɔr tə̂ nan:
‹Ə-ddaje ddəw lə Əbbə-dəwje.
Arəje ddəwje laa ndɔju!› »
4 Jan le ula kubbu kə̂ n̂-dda kə biin jambal ngaâ n̂-tɔ bbəre kə əndaar. Nɛ̂n-kusa laa to əbeteje kə ubbu təjə kə̂ mə kɔr tə̂. 5Dəwje kə̂ Jerujalɛm, dəwje kə̂ Jude tɔyn kə dəwje kə̂ bbeje tə̂ kə̂ toje ta maann Jurdɛn tə̂ ddeeje rɔɛ̂ tə̂. 6N̂-paje majangje ləde kə ddaka ngaâ Jan le ddade batɛm maann Jurdɛn tə̂.
7Jan oo Parijinyɛje kə Sadusinyɛje nya nya kə̂ aw ddeeje karə n̂-ddade batɛm le a, n̂-pa narəde nan: «See əmbakaraje, nân bba tɔjuse karə aynje sariya lə Lubba kə̂ aw ddee wa? 8Arəje kula-ddase tɔju to ə-turuje məse mban. 9Kəjə kə̂ aw əjəje məse tə̂ nan Abaraham to kasese le asə ang. M-pa marəse: Lubba asə ta turu ərje nəənn karə təlje to ngann ka Abaraham. 10Tinan to ngɔsi ta tuka nɛ̂n kakəje ngirɛ̂ tə̂ mban. Kakə kâra kâra tɔyn kə̂ kandɛ̂ kə̂ maji goto tə̂, dâ tuka kila purô. 11Əman, m-ddase batɛm maann ta tɔju to ə-turuje məse mban. A dəw kə̂ aw ddee gom tə̂, ngəng utam. Nɛ̂n-gɔl laa kara munda rɔ dəw kə̂ asə ta kɔru gɔlɛ̂ tə̂ ang. Ne, nâ ddase batɛm Ndil-mə-nda kə batɛm puru. 12Nuwa bagiri laa jia tə̂. Nâ kuta lo kunda ko laa ngaâ nâ jin kandə-ko le kungu mə dam tə̂ laa, a nâ ro tisa kəm puru tə̂ kə̂ a koy ndɔ kâra ang.»
Jan dda Jeju batɛm
13Karɛ̂ tə̂ənn, Jeju in nangə tə̂ kə̂ Galile ddee rɔ Jan tə̂, ta maann tə̂ kə̂ Jurdɛn karə ddɛɛ̂ batɛm. 14A Jan a ta mbətə ngaâ pa arə Jeju le nan: «Əman â, â ddam batɛm. A əi â ə-ddee karə m-ddai batɛm tokə baânn wa?» 15A Jeju ilɛ̂ tə̂ nan: «Kə̂ bbasinɛn nəənn, arə n-dda tokə baann. Mba to maji karə n-dda nɛ̂n tɔyn kə̂ to gatə gatə tokə baann.» Yeenn ngaâ Jan le ndiki tə̂ saa. 16Jeju inga batɛm ngaâ in maânn tee a, karɛ̂ tə̂ənn njaa ta dara təəyn. Noo Ndil lə Lubba kə̂ ddisi tokə lə dər ddee isi dɔɛ̂ tə̂. 17Marə ndu in mə dara tə̂ bbar nan: «Ne nəənn, n̂-to ngonnəm kə̂ m-ndike nya. Ne â n̂-dda narə rɔm nəələm nya.»
Markert nå:
Matiye 3: KabbaDkS
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2020, ACOTBA