Génesis 3
3
Adán ko Eva bithikaonꞌa Ndo Dio
1Aro kunchee icha bakinxin ba ke kain kuxiigo binchechjian Nchaa ná Dio, ko naa nchaꞌon kunchee ndachro ba ngain thi nchrii:
—¿A ko ndua ndachro Ndo Dio ixin chroꞌa sinthe ra thuchjuiin kain nthaa jii ngain Edén jiꞌi?
2Ko thi nchrii batheꞌe ngain kunchee ko ndachro:
—Jaan, nchao sine ná thuchjuiin kain nthaa jii ngain nunthe jiꞌi; 3aro ntha thuchjuin jii ngusine nunthe jiꞌi, Ndo Dio ndachro: «Ntheꞌa ra ko katheꞌa ra tho dajon ntha thuchjuin yaa, ko ixin ja̱ sinthe ra thuchjuiin ntha, ndaseꞌen ra.
4Kuthimejan kunchee ndachro ngain thi nchrii:
—¡Nduaꞌa; senꞌa ra! 5Ndo Dio ndachro jañaa ixin jeꞌe Ndo nuꞌe Ndo jian ixin are jaꞌa ra sinthe ra thuchjuiin ntha yaa, rukjan ra inchin jeꞌe Ndo ko ruchunxin ra thi jian ko thi jianꞌa.
6Ko thi nchrii bikon ixin thuchjuiin ntha anto chrjuin te tho ko nchao rune tho, ko juinao rugayee juaxraxauen Ndo Dio. Ko jañaa kunchrijin naa tho ko juine tho. Ko kai bajon tho ngain xixiꞌi ko jeꞌe xa juine xa tho kai. 7Ko xirebeꞌo juaxraxauen kayui ko jañaa binthegikon ixin xruꞌin luntho tengaa. Ko mexinxin kunchrijin nchin kee ntha higo ko binthekjaon ka ixin binthekjamataunxin nthauꞌe.
8Ko are jidanuthe chrintho tsukjin, thi xii ko thi nchrii binthekiꞌin ixin Nchaa ná Dio tarredeꞌe ngain nunthe Edén ko tabinthegemeꞌe Ndo ngagaꞌa nthayua jii ngain nunthe mee. 9Aro Nchaa ná Dio nichjee thi xii ko ndachro:
—Adán, ¿thinoo riꞌi jaꞌa?
10Ko thi xii batheꞌe:
—Kuian bejiꞌi Suixin ko anto xraon na ixin xruꞌin luntho ringaꞌa ko tabarima.
11Kuthejan Ndo Dio banchiangi Ndo:
—¿Kensen ndathjo ixin xruꞌin luntho ringaꞌa? ¿Ajuinthe thuchjuiin nthaa ndathjo ixin runtheꞌa?
12Ko thi xii ndachro:
—Thi nchrii Suixin binchechjian ko chjana, nchrii yaa thi tse thuchjuin, ko chjana juine.
13Kuthimejan Nchaa ná Dio ndachro ngain thi nchrii:
—¿Keꞌe bincheꞌe?
Ko thi nchrii batheꞌe ko ndachro:
—Kunchee bincheyana ko juine tho.
14Ko Nchaa ná Dio ndachro ngain kunchee:
—Ixin thi bincheꞌe jaꞌa, tangi tsuꞌan ngayee kain kuxiigo ixin jaꞌa tsingajintaon tsee ngataꞌa nunthe ko jinche sinthe kain nchaꞌon sarichon. 15Ko jaꞌan sinthaꞌa ixin thi nchrii ko jaꞌa runingakuꞌen choo ra ko sinthaꞌa ixin runingakuꞌen choo xaꞌan ra kain nchaꞌon. Ko naa thi sachrjeninxin nchra sincheniꞌi jaa ko jaꞌa sincheniꞌi chreen ruthee.
16Ko ndachro Ndo ngain thi nchrii:
—Ko jaꞌa tangi sathuꞌe ko tsiin are sinchekunkjiꞌi xaꞌan, ko maski jamee, jaꞌa icha sinao sariꞌi ngain xixiꞌa, ko jaꞌa sincheꞌe kain thi tsethuꞌan xa.
17Ko ngain thi xii ndachro:
—Ixin bithikaon thi ndachro chriꞌa ko juinthe thuchjuin jaꞌan ndathjo runtheꞌa, nunthe jiꞌi isinthanchaonꞌa nunthe ixin thi jaꞌa bincheꞌe, ko anto tsunchrjen ko tangi sinchii thi sinthe kain nchaꞌon sarichon. 18Ko nchaꞌa ko kanchaꞌa suan ngain nunthe, ko sinthe ka duan ngataon jngi. 19Ko anto suji xra sincheꞌe ko ndachjian sachaxin thi sinthe ruxethjaja nchaꞌon rukjan ngain jinche. Xraxaon ixin jinche kunchjianxin ko ngain jinche rukjan.
20Ko Adán binchegiꞌin chriꞌi Eva, yaa ruchro ixin jeꞌe tsji janaꞌa ngain kain chujni sechon ngataꞌa nunthe. 21Kuthimejan Nchaa ná Dio binchechjian thi bengaa Adán ko chriꞌi kunixin ruee kuxiigo. 22Ko ndachro Nchaa ná Dio: «Jai thi xii ko thi nchrii ndakjan inchin jaꞌan ná, ixin unuꞌe na̱ thi jian ko thi jianꞌa. Ditjanxion sinao na̱ sine na̱ thuchjuiin ntha nchegechon ni kainxin nchaꞌon, ixin ja̱ sine na̱ tho ixruꞌin nchaꞌon seꞌen na̱.»
23Ko Nchaa ná Dio bantsjexin ngayee nunthe Edén thi xii ko thi nchrii, ixin runcheꞌe ná xra ngain jinche, thi jinche kunchjianxin na̱. 24Ko jañaa Nchaa ná Dio bantsjexin ngain Edén thi xii ko thi nchrii. Ko bakeꞌe Ndo ngain Edén nu thi chrinxin nchaꞌon kainxion ángel kerubín ko kai bakeꞌe naa chia taade jitjama xruꞌi ko bakji chia ko bakjan chia ixin rukunchienꞌa na̱ ngain ntha thuchjuin nchegechon ni kain nchaꞌon.
Markert nå:
Génesis 3: plsNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2017, Wycliffe Bible Translators, Inc. All rights reserved.