HOSEA 14

Müngühmühipü Mulong Müthrikhi

1O Israel, Atungpuh nü Thrünpuh kilim rholoang, tümütüsho nü mülimkhinü nü angakdo. 2Amushukhi lubahle Atungpuh kilim rholode yüang; api ki thaang, “Amülim alala lude tsoang; atsü küpüanü leangkhiang tüsho isanü alokhikhi nangde isanü nü shianü. 3Asirianü isa mükhümkhit; isanü khorabo kheak mübin; isa khahnü athsükhi ki kheaküa, ‘ Isa thrünpuhbo,’ de mütha. Nü kheak mürerünü mihmüthsüm ngüchoh.”

4“ Inü arü akin-mülakhi thsüngubah;

inü akeangnü arü muzhobah,

tümüde I bukakhiukkhi arü kheaknü tsodo.

5I ju Israel ki ayinke nangde alabah;

api thrilung sangbün nangde abungbah,

Lebanon murungbo nangde api aying chinyukbah.

6Api dübitbo akhiukbah;

Oliv sangdung nangde api akhamde alabah,

tüsho Lebanon nangde arhümthüneabah.

7Kheaküshe I alamme khüp arü labah,

arübo hi nangde achinbah;

kurungaso nangde arü apungbah,

arü rhümthüneakhi ju Lebanon yukhu nangde alabah.

8O Ephraim, inü nü sangthsübo kheak tümü thsüba?

Nü ki alorü tüsho nü kümrü ju I ah.

I a lünnü aphüyak sang nangde lah;

nü thülünde alapü I kilimnü arüchoh.”

9Sherü lümlung lanü harü anikhitchoh; sherünü kheahkhitlanü jurü mükheahlah. Tümüde Atungpuh limrobo ju alungki, tüsho thiyurolungkirünü jurü ching tsahchoh, tüshe alakmihrünü jurü ching jing mükhechoh.

Markert nå:

HOSEA 14: YIMCBSI

Marker

Kopier

Sammenlign

Del

Vil du ha høydepunktene lagret på alle enhetene dine? Registrer deg eller logg på

Yimkhiung Naga CL Bible - AMÜSÜH HÜM

Lær mer om AMÜSÜH HÜM CL Bible (BSI)