Populære bibelvers fra YIPASIS 5

Del

Aw gwur God dikidiy mawul yidadiy nyanugw tigwuralik tikuw, aw gwur di kwurkwada pik akwur. Jisas Krais nyanak mawul yikuw, di diki kapa amwiyir Godak vaal kwurdil nyan nyanadiy vaal danik tikuw, aal God rakarak tikuw, mayaakw kwadil diki yawiyik. Aw diki pik gwur mayaakw adakw nuwukadiy duw takwak yigwuradiy mawul gwuradiy mawulaam van titak.

Kidiy nyaam vaal samasam yakwanadiy. Alik gwur kip akwaak viyakita yawiyda kwurkwurik. Gwur adiy saal viyanadiy duw dayadi yabim kwawayik. Aw gwur adiy lakwunadiy duw dayadi yabim adakw.

Samab ap samasam tikwanadiy guw aya kitaay, duw tikwul-gwuraba. Aw li gwur duw tikwul-kigwura, aal jaav, gwuraam mwiya saal kwur-kiladiygwurik. Aw gwur mayaakw adakw God dikidi Mawul gwuraam rawtaka-dikik gwuradiy mawulaam kapwu-dikik. Aw gwur nakamwiyib vagaruwkuw, gwur gwurak God diki lapa nyigaam rinadiy majir aw. Awarab God diki lapa nyigaam rinadiy majir song ada. Song aar Godak wayapiy as. Aw gwur atawa akwur gwuradiy mawulaam ab. Miyawa javik nyanyi nyanyi Asaay Godak wayapiy as Jisas Krais dikidi saam.

Samab saal viyanapik kwawayik. Aw kip akwaak aal Yitaypika Duw Jisas Krais kwurgwurkik wada javik.

Jisas Krais di adiy miyawa God dikidi gwalugwum tinadiy duw takwak mawul yidadiy. Aw di daya danik kiyaad. Gwur duw ab atawa gwur gwuradiy takwak mawul ay.

Tayir gwur kip adi Satan dikidi nyanyi nyanyi kip ganim tiyakwanadi yabib tiyadiygwurik. Aw kita gwur adiy Yitaypika Duw Jisas Krais dikidiy duw taakw tigwuralik tikuw, aal kip nyaam nyanyi nyanyi tiyanapikal tikwanadiygwur. Alik tikuw, adiy di dikidiy tikwanadiy duw taakw kaytik, yarakara adakw.

Aw gwur Jisas Krais majib wuki-wukib tikwagwuralik tikuw, samab gwur gwuradiy kapa mawul wuki-kwadanadiy pik wukin kwurtikwa. Awarabab adiy nuwukadiy duw taakw dayadiy mawul wuki-dana pik wukin akwur.

Jisas Krais dikidiy duw takwaam nyigilkuw, day dikidi amwiy kaytik tikwanadiy. Jisas Krais di adiy God dikidi gwalugwum tinadiy miyawa duw takwaam van tikwada pik, aw duw dayadiy takwaam van tikwadiy. Gwur taakw, gwur Yitaypika Duw Jisas Krais diki majib wukigwura pik, atampik gwur gwuradiy lanugw dayadiy majib awuk. God dikidi gwalugw Jisas Krais dikidi amwiy kaytik tikuw, atampik adiy taakw dayadiy lanugw dayadiy amwiy pik-adiy. Aw di li kwurlikik wakida jaav kwurkwala pik wuki-wukib titaay, atampik adiy Godak wukijibir tikwanadiy duw taakw kwurkwadiy adiy Yitaypika Duw Jisas Krais kwurdakik wakidadiy jaav wuki-wukib titaay.

Aw ki maaj gwurak kitawa bwulana. Miyawa duw dayadiy takwak di diki kapa sipak mawul yikwada pik, likik ab atawa mawul yikwaad. Aw miyawa taakw adiy li likidi laan wakidadiy jaav kwurkwa dikidi saam kirasin.

Duwawa taakw bir amwiy nak tibira maaj, aal kika God diki lapa nyigaam rina. “Duw dikibir amaay asaay wapakuw, taakw kirakuw, aw bir vitiy kirib patikuw, amwiy nak kaytik ata tikwanabir.”

Samab adiy kupwaraap sapwurapa Satan dikidiy yawiy kwurkwanadiy saal viyanadiy duw takwawa nakamwiyib pati-wayik. Aw dayadiy yawiy mwiy ri maa. Aw atawa ti-yaay, kip adiy duw takwak asimak day dayadiy yawiy adiy mwiya mwiyab mwiya kupwaraap tinadiy God diki milaam waan.