Populære bibelvers fra 1е Иоанна 4

Del

Пиниқылъыӷми алиңылъық авӣтуқ қаюҳлъяк ӣӷўиқам пиниқылъҳым иҳлъықаюўа̄ алиңылъық. Ынка̄ңам пиниқылъық ӣӷўӣмаңитуқ тама̄куни паниның алиңыхкаюгни, қаюҳлъяк алиңылъылгӯқ аӷью̄лъық.

Таӷнуҳаӷни, лъпыси Кияӷныӷым пикутаңаның, кая̄лъқыхкақаси тама̄кут қаюҳлъяк илюхпысинилңуқ аҳтуӷьяҳқа̄нӷитаӷаҳтуқ нунамылңуӷмың.

Пиниқӣқукут қаюҳлъяк Кияӷныӷым сивуклъюни пиниқыхкақӣлъю.

Пиниқыхкамни, йықай пиниқутутылъта қаюҳлъяк пиниқылъық Кияӷныӷмың пиңӯқ. Кина алңунак пиниқиңалӷӣ таӷнуҳақа̄ Кияӷныӷым, лӣсимака̄лъю Кияӷнық.

Китум алңунак пиниқинӷилңӯм налъюка̄ Кияӷнық, қаюҳлъяк Кияӷнық пиниқылъҳӯқ.

Пиниқылъық акузиткыхкыхка хўаңкута пиниқылъқынӷитаҳпут Кияӷныӷмун. Йыӷлыги Кияӷныӷым пиниқылъқа̄ хўаңкунъун кылгутка̄ каяхтылъыӷмикун Иӷныни иқитусӣлюку сыӷлыҳқылъымнъун.

Пиниқыхкамни, Кияӷныӷым пиниқылъҳа хўаңкунъун таўатыскан хўаңкуталъю пиниқутусяҳқа̄гукут.

Кияӷныӷым каяхтыкақа̄ та̄наңинаҳақ Иӷныни нунамун, уңувалъыңысқылъюта лъңакун. Таўатын пилъыӷмикун Кияӷныӷым кылгуткақа̄ пиниқылъыни хўаңкунъун.

Кина пикуми: «Пиниқақа Кияӷнық», нақам угумиклъюку ухпықа̄лгутни, иқлъыңиқыстыңӯқ. Қаюҳлъяк китум алңунак пиниқынӷилъкумигу ухпықа̄лгутни ысҳақаюни, пиниқна̄нӷита̄ Кияӷнық ысҳӣгалъкынъи.

Китум алңунак а̄пқагу Иисус Иӷнықнилюку Кияӷныӷмун, Кияӷнық кияҳтыңъӯқ лъңани, лъңа Кияӷныӷми.

Уна қылӷусяқа̄ Христосым хўаңкунъун, китум пиниқыхкумигу Кияӷнық, пиниқсяҳқақа̄ ухпықа̄лгутнилъю.

Пиниқыхкамни, ухпықыхпынаки қамахлъюки таӷныӷат. Йыӷлыги лӣгикнақақитыки Кияӷныӷмың пиңутаңи, қаюҳлъяк угляпихлъыҳӣт ӯкналиқистысиӷўа̄ӷыт миңисима̄т нунами. Ысҳа хўатын лӣсимаксяҳқахси Кияӷныӷмун Таӷныӷақуткык: тамаҳаӷми таӷныӷам а̄пқагу Иисус Христос югулюни алъхықа̄нилюку, Кияӷныҳта̄гуқ.

Иўырңа тамаҳаӷми таӷныӷам мысӣӷа̄скагу Иисус югулюни алъхықа̄нӷинъилюку Кияӷныҳта̄нӷитуқ. Та̄кук таӷныӷак аңуякилӷӣмың Христосымың пиңӯк нагақуқаҳпысиның тагӣяҳқа̄нилюкык. Та̄ўа ма̄тын ка̄тңўа̄ӷлютык нунамун аюқук.