Populære bibelvers fra रोमि 6

Del

देकिनालो हेवाओ अ़लुङ स़मा ओ, मेन निनाम्‍हाङ्‌आ मोहा प़माय़ङ्‌ओ अ़चुआसिखा ख्रिस्‍त येसु आन्‍हाङ्‌पाएदा अ़लुक्‍निन्‌ओ ह़ङ्‌म़ङ ओ।

हेवा खानानिन्‌एदा हाङ अ़मुनिन, देकिनालो खानानिन य़ङ्‌हुप्‌ओ अ़क़म्‍मादा त़याइमिन्‌येन, मेन सोम्‍तुक्‍माओ अ़क़म्‍मादा त़याइन्‌येन।

खोन्‌ओसा बप्‍तिस्‍मालाम्‍पा आन्‍कान खोक्‍कोएनान अ़क्‍नि खुम्‍तिन। देत्‍नि निनाम्‍हाङ पापाओ साम्‍स़रिओ अ़चुसावालाम्‍पा ख्रिस्‍त म़सुवादाओदाङ्‌का म़खोन्‍तालोन्‍ता, मोवात्‍निङा आन्‍कान्‌छाङ अ़ऩङ्‌वा ह़ङ्‌म़ङ्‌ओ लाम्‌दा कोलिन्‍ने।

आम्‍नुओ पोक्‌ओ खाक्‍कोछाङ अ़फुत्‌चि हेवा मुमा निम्‍पाङ अ़अ़त्‍पाओ मित्‍चिऩङ्‌चिदा मान्‌याङ्‌दानुम्‍च़म। मेन स़मादाङ्‌का ह़ङ्‌म़ङ्‌दा काफान्‍नान्‍चिन म़नाचिवात्‍नि निनाम्‍हाङ्‌ओ अ़नुवाक अ़चुकाचि मुसि पुवालावानिन्‍चिन खोन्‍कि झारा आम्‍नुओ पोक्‍फुत्‌चि साम्‌योक्‍मिओ अ़मित्‍चिऩङ्‌चिओ निम्‍पाङ याङानुम्‍च़म।

आन्‍कान सिन्‍तुम्‌योम बुयाओ हेवामि आन्‍ह़ङ्‌म़ङ क्रुस्‌दा ख्रिस्‍तएनान ख़न्‍तायुङ्‌सा। खोन्‌ओसा आन्‍ह़ङ्‌म़ङ्‌चिदा हेवाओ अ़सावाआ अ़क़म्‍तुन्‍ने। हान्‌दाङ्‌का ह्‍यात्‍नि आन्‍कान हेवाओ अ़हारुक माआङ।

मोवात्‍नि खानानिन्‌एदाछाङ हेवाओ अ़सावा मात्‍द़ङ, मेन ख्रिस्‍त येसुएदा निनाम्‍हाङ्‌ओ निम्‍पाङ अ़ह़ङ त़लिसिन्‌ओ मित्‍मान्‍चिन्‍दोत।

खोन्‍नालो आन्‍कान दे य़ङिन? दि निनाम्‍हाङ्‌ओ अ़चुसोम्‍तुक्‍मा पोन्‍ने निम्‍पाङ आन्‍कान हेवा मुमायुङ्‌मा म़ल़क? देम्‍खाछाङ माआङ! आन्‍कान्‌एदा हेवाओ अ़सावा मात्‍द़ङ, देत्‍नि आन्‍कान हान्‍छाङ मोदाङा ह़ङ्‌मा?

दि खानानिन त़सिन्‍तिमिन्‌येन, लोमाय़ङ हारुक्‌चिवात्‍नि खानानिन साङ आप्‍पि त़प़न्‍लाविन्‍चिन, खानानिन लोन्‌ओवा त़च़न्‌ओ आम्‍नुओ हाङ्‌पाओ अ़चुहारुक्‌चि ओ। खानानिन हेवाओ अ़हारुक लिमा त़ऱन, मोसाआ स़मादा त़खात्‍तिन। माङ्‌लो खानानिन निनाम्‍हाङ्‌आ लोमाय़ङ छेन्‍मा त़ऱम, मोसाआ साम्‌योक्‍मि ह़ङ्‌म़ङ्‌दा त़खात्‍तिन।

मेन निनाम्‍हाङ आलाङ्‌ने, देकिनालो खानानिन अ़क्‍दु हेवाओ अ़हारुक त़मुन्‌येन, हान खाक्‍को अ़छ़ङ चिन्‍माय़ङ खानानिन्‌आ त़तोक्‍तुम, मो झारा साकोङ्‌वाआ त़लोउम्‌युङ्‌सुम। खानानिन हेवादाङ्‌का त़फोङ्‌सिन्‌युङ्‌सिन खोन्‍कि साम्‌योक्‍मिओ अ़हारुक त़लिसिन्‌युङ्‌सिन।