Populære bibelvers fra 1 PETRUS 1

Del

Jak kheueh geutanyoe talakée syukoe ubak Po teu Allah, Bapak Tuhan tanyoe Isa Almaseh! Gobnyan that-that geugaséh keu geutanyoe, nyang kheueh sabab jih Gobnyan geubri keugeutanyoe udeb nyang barô, deungon geupeu udeb lom teuma Isa Almaseh nibak maté. Nyoe teubri keu geutanyoe harapan nyang kukôh. Tanyoe meuharab that keutateumé beureukat-beureukat nyang geukeubah lé Allah keu umat Gobnyan, na kheueh beureukat-beureukat nyang geukeubah lam syeuruga, deungon lagée nyan hana hase rusak, atawa jeuet keu brok atawa cupa.

Deungon na lagée nyan bah kheueh gata bumangat até, bah pi jinoe lam watée nyang paneuk nyoe gata harôh seudeh le sabab gata tarasa meubagoe-bagoe cubaan. Nyan sibagoe teu ujoe gata peu kheueh gata biet-biet meuiman ubak Tuhan atawa hana. Méuh nyang hase rusak pi, teu ujoe ngon apui. Deungon lagée nyan, iman gata na kheueh leubeh muyuem nibak méuh nyan, nyang kheueh sabab teu-ujoe cit mangat meutamah kông. Deungon lagée nyan gata teuma teupujoe dan jihoreumat meunan cit teupeumanyang bak watée uroe Isa Almaseh geuteuka lom teuma.

Nyang sikeubiet jih, bah kheueh gata gleh lam hai peue mantong nyang gata peubuet, saban lagée Po teu Allah geutawök gata nyan gleh. Lam Alkitab na teutuléh, “Bah kheueh gata gleh, sabab Ulôn nyoe gleh.”

Taát kheueh ubak Po teu Allah, dan bék kheueh udeb lagée kheun gata yoh masa ilée, bak watée gata gohlom meuturi ngon Po teu Allah.

Deungon sabab nyan, bah kheueh gata siab siaga. Até-até kheueh dan meuharab kheueh sipeunoh jih ubak beureukat nyang teuma teubri ubak gata bak watée Isa Almaseh teuka lom teuma.

Lam Alkitab na teutuléh lagée nyoe, “Banmandum umat manusia lagée naleueng, dan banmandum keubeusaran jihnyan lagée bungöng naleueng. Naleueng layée, bungöng jih pih lurôh; teuma feureuman Tuhan teutab na siumu masa.” Feureuman nyan Haba Gét nyang ka teupeusampoe ubak gata.