Populære bibelvers fra Proverbios 3

Del

Ja̧danö, ju'wibi jwebebö yötawakwö: Chitji̧, Isabenö Jo̧nöda kwo̧'wo̧ wa̧na̧lö kwö̧jo. Okobe jwiinö kwomajadenö jo̧banöda kwo̧'wo̧ wa̧na̧lö kwö̧jo. Ökwö jojo kwomukwati̧damaökö chitji̧, Isabenö Jo̧nöda kwo̧'wo̧ wa̧na̧lö kwö̧jo. Okobe jwiinö kwi̧'yenabi Isabenö Jo̧nö kwo̧'wo̧ wa̧na̧lö kwö̧jo, jo̧ba ökwönö öiboböda kwösödo. Jobekwö Isabenö Jo̧nöda kwo̧'wo̧ wa̧na̧lö kwö̧jitjö̧ma jweinö kwi̧'yobö, jwei̧ mananöda öibakwo̧.

Ju'wibi yötawakwö chitji̧: Kwomukwatoko, ötjöma jwiinö waiso̧sa, jö̧ba̧lö. Jobekwödanömaökö chitji̧. Isabenö Jo̧nö yebabinö omukwatö kwö̧jo. Ja̧danö, suli̧ jawa öpöjödö kwö̧jo.

Ja̧danö ju'wibi jwebebö yötawakwö: Chitji̧, kwujuna̧li̧tjö Isabenö Jo̧nö kwiyo, ökwöda jwiinö mikwawo̧ja, jö̧ba̧lö. Ja̧danö, kwöbatjonö ajayinö wa̧ji̧tjö̧ Isabenö Jo̧nö kwiyo, ökwöda, jö̧ba̧lö. Jobekwö omukwatö kwiyitjö̧ma kwöbatjonö ajayinö wa̧jenatjö bajalekwönönö wa̧jakobe. Ja̧danö, nöinö kwödakobe lödaweju okwa, 'su̧'bȩ baibanö, Isabenö Jo̧nö ajayinö wa̧ji̧tjö̧ kwiyinobetjö̧. Ja̧danö, ubasobu pe'awa o'dijubi su̧'bȩ baibanö kwipe'akwo̧ja, ubasobu welachibanö, Isabenö Jo̧nö ajayinö waji̧tjö̧ kwiyinobetjö̧.

Ja̧danö, ju'wibi jwebebö yötawakwö: Chitji̧ ba̧kwȩlö̧jatebö jojodökwö otiwanö ösödö kwö̧jo, ba̧kwȩlö̧jatebö pjabatö. Ja̧danö, ba̧kwȩlö̧jatebö jojodönö ajayinö yöbawö kwujuninadanö badekwachinö i̧sebö kwö̧jo. Wanedö yötawakwö: La̧wo̧sopja jwiinö otiwopja kwölawobe otiwanö öwawi̧danö ökwö jojodökwö otiwanö kwö̧ji̧ma otiwanö öwawakobe. Chitji̧, jobekwö kwö̧ji̧ma ba̧kwȩlö̧jatebö omukwatö kwö̧jo. Wanedö yötawakwö: Ösöjanö wȩyudö lödawadanö kwomajadenö wȩyudö kwödawo kwo̧'wo̧ jwikibökakobetjö̧, jojodökwö otiwanö chö̧jobö jo̧be jö̧ba̧lö.

Ja̧danö, ju'wibi jwebebö yötawakwö: Chitji̧, Isabenö Jo̧ ökwönö lȩebitjö̧ma kwöpöjödoko. Ja̧danö, Isabenö Jo̧ ökwönö jwebebö yöawi̧bi kwa̧ja̧kwo, otiwa jö̧ba̧lö. ¿Wajwiköbiji̧? Isabenö Jo̧ma ile niebökwenöda jwebebö yöbawo̧ öwaisachibobö, jwiinö ösödobetjö̧. Bakwo̧ iteda itji̧nö, ösödökwenö jwebebö yöawi̧danö jwebebö yöbawo̧ Isabenö Jo̧ma ökwönö, iteda ile niebökwenöma.

Baikwö laebobe Salomón iteda itji̧nö möayo̧nö jwebebö yöawinama: Chitji̧ yötawakwö: Ötjö jwebebö yötawi̧ma kwo̧’wo̧ jwikiboko. Ja̧danö, weti̧ma kwomajadenö kwanawo, jwiinö mikwawobe jö̧ba̧lö. Ja̧ yötawi̧bi, weti̧bi kwa̧ja̧kwitjö̧ma lekwe mölȩ kwö̧jakwo̧ja, kwo̧'wo̧ ösöwanö.

Ja̧danö, ju'wibi yötawakwö chitji̧, wanedö: Bakwo̧ma jweinö omukwatö ja̧kwawama ¿di̧yajö? jö̧ba̧lö, öwaisachibobö isakwobe. Isakwemi badekwajo̧ma jweinö omukwatö ö̧jobetjö̧ o̧'wo̧ ösöwanö jo̧. Ja̧danö, jo̧ba jweinö omukwatö jo̧ma, ju'wi jawabi ju'wi jawa omukwatö, di̧ya sulojobö jö̧ba̧lö, di̧ya otiwojobö jö̧ba̧lö waisachibo̧. Jobekwö öwaisobetjö̧ o̧'wo̧ ösöwanö jo̧. Jao chitji̧, jweinö omukwatö ja̧kwawama jwiinö mikwawobe. Plata, oro mikwawi̧tjö̧ bajalekwönönö mikwawobe jweinö omukwatö kwö̧ji̧ma. Isabenö, plata, oro kwiyi̧tjö̧ma balada nöinö kwemena, nöinö mikwawobetjö̧, ¿jö̧tö̧? Jo̧kwaijayonö, ökwö jweinö omukwatö kwö̧ji̧ma plata, oro mikwawi̧tjö̧ bajalekwönönö mikwawobe. Isabenö yötawa chitji̧: Jweinö omukwatö kwö̧ji̧ma isabenö mikwawobe. Inawiya jwiinö mikwawi̧ jawa öwiyatjö bajalekwönönö mikwawobe jweinö omukwatö kwö̧ji̧ma. Chitji̧, ju'wi kwemobö kwösödi̧ma ¿jweinö omukwatö kwö̧ji̧ bajalekwönönö mikwawobeji̧? Jwiyobe chitji̧.

Ju'wibi jwebebö yötawakwö chitji̧: Bakwo̧ jwiinö usulaso̧ma ökwönö ichö pjabatitjö, jö̧ba̧lö aebitjö̧ma pjakatonö, öpöjödökönö. Jwiinö usulaso̧obetjö̧ pjakatobö jo̧be chitji̧. Jao, ökwö pjakatobö ji̧tjö̧ma pjakatonö.

Ju'wibi yötawakwö chitji̧, Isabenö Jo̧ ajayinö ö̧jina jawama: Isabenö Jo̧ma jweinö omukwatö Jo̧. Ja̧danö, jweinö omukwatö Jo̧obetjö̧ böjȩma otidinobe. Ja̧danö, mölȩjȩnö lö̧jadönöbi öninobe, isabenö mikwawadö, jö̧ba̧lö waiso̧obetjö̧.