Populære bibelvers fra Proverbios 29

Del

Ja̧danö, ju'wibi yötawa: Jojodö ökwönö tjo̧mukwati̧ma kwomukwatoko, ayö dakwö tjo̧mukwatobejö̧ ötjönöma, jö̧ba̧lö. Jobekwö kwomukwataja̧ma ökwödada 'daliwanö tjö̧li̧bidanö kwö̧libobö wanekwachobe. Jobekwö omukwatökönö, Isabenö Jo̧nöda kwo̧'wo̧ wa̧na̧lö kwö̧jitjö̧ma yebabökönö otiwanö kwö̧jakwo̧ja.

Ja̧danö, ju'wibi yötawa: Jojodö bakwena ju̧kwadöma Dios yöawi̧ a̧ja̧kwökönö, Dios jobadönö öibobö isakwökönö tjö̧jitjö̧ma jwiinö sulabenö tjö̧jena. Idöda sulabenö tjösödi̧ tjöbeba̧lökönö ja̧bö ju̧kwadö. Jobekwö tjö̧jokobe Dios wei̧ a̧ja̧kwadöma. Jobadöma Dios pjaatawö̧, tjo̧'wo̧ ösöwanö tjö̧jinö.

Ja̧danö, ju'wibi yötawa: Jweinö omukwatö̧kö̧ma juluwanö dameakwo̧, ödameakwi̧ma tjöbeba̧lökönö. Jo̧kwaijayonö, jweinö omukwato̧ma ödameakwi̧ma tjöbeba̧lö i̧sekwö̧kö̧, ödameakwi̧ o̧'wo̧ söawachenanö kabatö.

Ja̧danö, ju'wibi yötawa: Tjemu sulabenö omukwatö ja̧enama abe'do, ojo'do jwebebö, kwabö yötjawobö jo̧be. Jobekwö jwebebö kwabö yötjawitjö̧ma öwaisachibena, jweinö omukwatö ö̧jakwobetjö̧. Jobekwö baledökakobe tjȩmunö, abe'do ojo'do jwebebö kwabö yötja̧wökökwenöma. Tjemuma iteda ösödi̧da sulabenö omukwatö ja̧bo̧nö, abe'do, ojo'do jwebebö kwabö yötjawökötjö̧ma sulabenö omukwatö ö̧jakwo̧. Jobekwö ö̧jobetjö̧ ojo'doma jwiinö tabakwujuda jö̧jakwuju.

Ju'wibi yötawa: Kwi̧tji̧nö ina tjȩmubaiyo̧nö jwebebö kwabö yökawo öwaisachibobö. Jobekwö jwebebö kwabö yökawitjö̧ma kwo̧'wo̧ tjo̧bekwökönö kwö̧jena, kwitji̧ma otiwanö omukwatö ö̧jobetjö̧. Ja̧danö, kwo̧'wo̧ ösöwanö kwö̧jena, kwitji̧ma otiwanö omukwatö ö̧jobetjö̧.

Ja̧danö, ju'wibi yötawa: Bakwo̧ ju'wedönötjö bajalekwönönö otiwanö jo̧sa, jö̧ba̧lö omukwato̧ma ju'wi mölȩ tabakwöda ö̧jakwo̧. Ja̧danö, jelo̧ma ju'wedönötjö baikwönönö jo̧sa, jö̧ba̧lö, ju'wi mölȩ tabakwökönö ö̧jakwo̧. Ja̧danö, jo̧ba baikwönönö jo̧sa jö̧ba̧lö omukwato̧nö edö jojodöma otiwanö tjöwaisachibakwo̧kwo̧, otiwanö omukwato̧, jö̧ba̧lö.

Ja̧danö, ju'wibi yötawa: Bakwo̧ juluwanö dameakwö jo̧ma ju'wedökwö wene tjuna̧lobö isakwo̧. Ja̧danö, jo̧ba dameakwabo̧ma ju'wi jawabi ju'wi jawa sulabenö ja̧bö jo̧, ba̧kwȩlö̧jatebö.

Ja̧danö, ju'wibi yötawa: Waisanö omukwatö̧kö̧nöma Dios pjaatoböma jobe, 'diokobe. Jo̧kwaijayonö Dios pjaatoböma jwiyobe jelo̧nö, juluwanö omukwatökönö yöba̧lo̧nö. Jo̧banö, juluwanö omukwatökönö yöba̧lo̧nö Dios pjaatoböma jwiinö 'diobe. Isabenö, 'diobe juluwanö omukwatökönö yöba̧lo̧nö pjaati̧ma, waisanö omukwatö̧kö̧nö pjaatitjö̧ bajalekwönönö 'diobe.