Populære bibelvers fra Proverbios 19

Del

Ja̧danö, ju'wibi yötawa: Isabenö, jojodöma idöda ja̧tjakwa̧ ju'wi jawabi ju'wi jawa tjo̧'wo̧ junö omukwatadö. Jobekwö tjo̧mukwatijayonö Isabenö Jo̧ma iteda baledobö ösödi̧danö baledakobe.

Ja̧danö, ju'wibi yötawa wanedö: Bakwo̧ma jwibo̧nö lȩ lö̧jinö edö iyobe. Ja̧danö, jo̧ba jwibo̧nö iyi̧ma Isabenö Jo̧nöda öbalewobedanö jo̧be. Ja̧danö, ja̧ öbalewaja̧tjö̧ mikwa baibanö tjebatö iyakwo̧ Isabenö Jo̧ma iyo̧nöma.

Ja̧danö, ju'wibi yötawa: Bakwo̧ ö'wiyakwawönö omukwatobetjö̧ juluwanö ödameakwokobe. Jo̧banö sulabenö yöba̧la̧dönöbi labinö atadö̧kö̧. Isabenö, jojodöma jo̧banö otiwanö tjedobe, otiwanö omukwato̧ jö̧ba̧lö, sulabenö yöba̧ladönö labinö atadokobetjö̧.

Ja̧danö, ju'wibi jwebebö yötawaduwakwö chömöledö: Ju'wedöma ökwödönö otiwanö jwebebö yötjawena kwösödaduwo, Otiwa, jö̧ba̧lö. Jobekwö ösödö kwa̧ja̧kwaduwitjö̧ma okobe jwiinö kwö̧jaduwi̧ma jweinö omukwatö kwö̧jaduwakwedöja.

Ja̧danö, ju'wibi yötawa: Isabenö Jo̧nö yebabinö omukwatadöma lekwe tjö̧jakwedö. Jobadöma tjo̧'wo̧ ösöwanö, yebabökönö tjabakwedö, yö̧te baledibanö, suli̧ jawa baledökönö, Isabenö Jo̧nö yebabinö tjo̧mukwatobetjö̧.

Ja̧danö, ju'wibi yötawa: Bakwo̧ jweinö omukwatö ö̧jobö öwaisachibena otiwanö waisö jo̧. Jobekwö waisanö omukwatö ö̧ji̧ma itedada pjaati̧danö pjaatobe otiwanö ö̧jobö. Jelo̧nöbi yötawa: Bakwo̧ ¿di̧ya sulojobö jö̧ba̧lö, di̧ya otiwojobö jö̧ba̧lö waiso̧ma otiwanö ö̧jakwo̧.

Ja̧danö, ju'wibi jwebebö yötawaduwakwö: Chömöledö, kwi̧tji̧mu̧duwinö ina tjȩmunö jwebebö kwabö yökawaduwo tjöwaisachibobö, otiwanö omukwatadö tjö̧jakobetjö̧. Isabenö, tjöwaisachibakwedö ina tjȩmutjobetjö̧. Jobekwö jwebebö kwabö yökawaduwökötjö̧ma otiwanö omukwatö tjö̧jobö tjöwaisachibökena. Ja̧danö, jobekwö, jwebebö kwabö yökawaduwokobetjö̧ damö tjö̧jenama jobadöma nöinö wene tju̧juna̧lakwedö. Isabenö yötawaduwakwö: Jobadö wene tju̧juna̧lakwa̧ma ökwödöda jawa, tjȩmunö jwebebö kwabö yökawaduwinokobetjö̧.

Ja̧danö, ju'wibi yötawa wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Jo̧bama lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.