Populære bibelvers fra Proverbios 16

Del

Ja̧danö, ju'wibi yötawa: Kwotidakwa̧ abönö Isabenö Jo̧nö ösödö jo̧banö akeba̧lo, Chuluwo̧ chotidakwa̧ma ökwöda kwösödi̧danö chotidobö öbibö pjakato, jö̧ba̧lö. Jobekwö, Isabenö Jo̧nö ösödö akeba̧lobetjö̧ kwotidakwa̧ma otiwanö laebakobe, iteda ösödi̧danö.

Isabenö yötawa: Jojodöma ju'wi jawabi ju'wi jawa tjo'wo junö tjo̧mukwatobe, a̧a̧a̧ itekwayi kwebachö chi̧'yocha, jö̧ba̧lö, ja̧danö, imiame ichena chotidocha, jö̧ba̧lö. Jobekwö tjo̧'wo junö omukwatö yötja̧lijayonö Isabenö Jo̧da jojodö tjotidakwa̧bi, tji̧'yakwa̧bi okobe jwiinö tjö̧jakwa̧ma öbibo̧.

Ja̧danö, ju'wibi yötawa: Tjo̧'omanö ösödö yöba̧lo̧ma yöa̧li̧ a̧ja̧kwadöma tjösödobe, otiwanö yöba̧lo̧, jö̧ba̧lö. Wanedö yötawa: Wa̧yo̧ nebö tjösödi̧danö, o̧ta, jö̧ba̧lö, tjo̧'omanö ösödö yöba̧lo̧ yöa̧li̧ma jwiinö tjösödobe. Ja̧danö, wa̧yo̧ netjaja̧ tjujuluwobö pjaati̧danö pjaatobe tjo̧'o̧manö ösödö yöba̧lo̧ yöa̧li̧ma jojodö tjujuluwachibanö.

Salomón ju'wi jwebebö yöawakwawa jawanö wanekwachi̧ma baikwö laebobe: Isabenö yötawa: Jojodöma ju'wi jawabi ju'wi jawa tjo'wo junö tjo̧mukwatobe, a̧a̧a̧ itekwayi kwebachö chi̧'yocha, jö̧ba̧lö, ja̧danö, imiame ichena chotidocha, jö̧ba̧lö. Jobekwö tjo̧'wo junö omukwatö yötja̧lijayonö Isabenö Jo̧da jojodö tjotidakwa̧bi, tji̧'yakwa̧bi okobe jwiinö tjö̧jakwa̧ma öbibo̧.

Ja̧danö, ju'wibi abebö cha̧ja̧kwaduwakwö: ¿Di̧yatjö̧ mikwawinö ö̧jobökö̧? ¿Dameakwö̧kö̧ ö̧ji̧ökö̧, jwiinö juluwo̧ ö̧ji̧ökö̧? ¿Di̧yatjö̧ mikwawinö ö̧jobökö̧? Isabenö yötawa: Dameakwö̧kö̧ ö̧ji̧danö isabenö mikwawobe. Isabenö, jwiinö juluwo̧ ö̧ji̧tjö̧ bajalekwönönö mikwawobe dameakwö̧kö̧ ö̧ji̧ma. Ja̧danö, ju'wibi abebö cha̧ja̧kwaduwakwö: ¿Di̧yatjö mikwawobeda, dameakwö̧kö̧ ö̧jiobökö̧, inesö la'aka luwo̧ öpöjödawö̧nö ujuluwikö̧? Di̧yatjö̧ mikwawobeda? Isabenö yötawa: Dameakwö̧kö̧ ö̧ji̧ma jwiinö mikwawobe. Isabenö, inesö la'aka luwo̧ öpöjödawö̧nö ujuluwaja̧tjö̧ bajalekwönönö mikwawobe dameakwö̧kö̧ ö̧ji̧ma.

Ja̧danö, ju'wibi yötawa: Bakwo̧ma itedada omukwatena, ötjödasa ju'wedötjö bajalekwönönö waiso̧ma, jö̧ba̧lö. Isabenö yötawa: Ötjödasa waiso̧ma, jö̧ba̧lö, omukwato̧nöma ju'wi mölȩ jwiinö labi̧ jawa baledakwo̧. Ja̧danö, ju'wibi yötawa: Bakwo̧ma ju'wedönö nijakwönönö edö omukwatena, bidöma mikwawöködö jö̧ba̧lö. Isabenö yötawa: Jobekwö omukwato̧ma ju'wi mölȩ itedada usulaso̧da ö̧jakwo̧.

Ja̧danö, ju'wibi yötawa: Bakwo̧ma omukwatena, okobe jwiinö chö̧ji̧ma otiwanöda omukwatö jo̧sa, jö̧ba̧lö. Jobekwö omukwatijayonö omajadenö omukwati̧ma öwawokobe ¿tajawedö jobekwö chomukwatobekwö? jö̧ba̧lö. Bakwo̧da, Isabenö Jo̧da jojo omajadenö omukwati̧ waiso̧, sulabenö omukwatojobö jö̧ba̧lö, otiwanö omukwatojobö jö̧ba̧lö.

Ja̧danö, ju'wibi yötawa: Bakwo̧, jweinö yötjawi̧ a̧ja̧kwo̧ma otiwanö ö̧jakwo̧. Ja̧danö, bakwo̧, Isabenö Jo̧nö o̧'wo̧ wa̧na̧lö jo̧ma o̧'wo̧ ösöwanö ö̧jakwo̧.

Ja̧danö, ju'wibi yötawa, du̧ju̧taja tjö̧ji̧nö wanedö: Bakwo̧, balada ja'yubeda juna̧lo̧ma, otiwanö omukwatö jo̧. Ja̧danö, jelo̧ma, sulabenö ja̧ina mikwa balada nöinö juna̧lo̧. Ja̧danö mikwawi̧ma ¿di̧te ö̧ji̧da? balada ja'yubeda juna̧lo̧ otiwanö omukwato̧ ö̧jobökö̧, balada sulabenö ja̧ina mikwa balada nöinö juna̧lö ö̧jobökö̧, di̧teda? Isabenö yötawa: Balada ja'yubeda juna̧lo̧, otiwanö omukwatö jo̧ma isabenö, jo̧ba ö̧ji̧ma mikwawobe.

Ja̧danö, ju'wibi yötawa: Bakwo̧, Aaa, ötjöma otiwanö omukwatö jo̧sa, omukwatijayonö wajwibö, jelobekwö omukwato̧, sulabenö. Ja̧danö, jelobekwö omukwatö ba̧kwȩlö̧jatebö sulabenö omukwatö tupakwö i̧'yitjö̧ma debö i̧'yena.

Ja̧danö, ju'wibi yötawa: Sulabenö omukwatö jo̧ma wene jwöbebo̧ jojodö tjölakwabikwawinö. Ja̧danö, ju'wibi yötawa: Bakwo̧ ju'wedönö yö̧ne tjö̧möledöso̧nöma omöna yöa̧liawö̧ tjö̧möledöso̧tjö̧ 'da̧bachibö tjö̧ja̧kwedö.