Populære bibelvers fra Jowãw 15

Del

— Ipê pĩxô pàr cati pyràac, ne me apê ihpajũhtê pyràac. Quê ha pĩxô pàr pajũhtê nõ ipàar kam ihcuhhê, ne ihtỳj ahna hô. Ita jĩkjê na, ca ha ikam me akrĩ kam me to acrà, ne atỳj ijarkwa kôt me gàpên xà impejti to me gàpên to me apa. Nãmri ca ha ate ikam me akrĩ kam me to acrà nare, ne amjia kôt ame apa na, ca ha nee me ampo pejti ton nare.

Nãmri quê ha pĩxô pàr pajũhtê nõ te impàt ne ihpỳm na, quê ha nee hô nare, ne cama incrà. Ita jĩkjê na, ca ha me anõ, ate ijarkwa kôt gàpên xà impejti to gàpên to apa nare, ne amjia kôt gàpên na, quê ha gàpên xà ata kôt apê hamreare ne. Cupate ca ha ikam me akrĩ kam me to acrà, wa ha hanea ne me akam ikrĩ kam to icrà. Na cu ha me ajpẽan, ne ajkam me pahpyxit peaj, ne atỳj ijarkwa kôt me apê. Ne me apê pĩxô pàr pajũhtê pejti ata pyràac, ne ampeaj kam me axô hũhhĩc itajê pê me gàpên xà jàhtôa ne impej.

Ca ha ate amji mã me ito ahimpej kam me to acrà, ne atỳj ikam me gapac kam me to acrà na, cu ha me ajpẽan, ne ajkam me pahpyxit peaj, ca ha ampo na me iwỳ, wa ha itỳj me amã cugõ.

He pê ca nee amji mã me icapi nare, ne pa pê wa quêt amji mã me acapi. Ampo na? Nee mã ampo na nare. He ijarkwa kôt ate me gàpên xà pejti ton to me apa to prãm to, pê wa amji mã me acapi. Ne me gàpên xà impejti atajê pê quê ha ampo pĩxô pejti te jũ caxuw hamre xà nare ata pyràac, ne ihcuhhê rohnỳtti mã. Cwỳrjapê ca ha ijaprỳa na ampo na me Inxũ wỳ, quê ha ihtỳj me amã cugõ.

Imã me akĩn cràti ita kam, wa ha pa me icurê xwỳn mã amji gõ, quê ha me acwỳrjapê me icura. Ca ha cormã imã me akĩn cràti ita na me ijahkre pej.

Ne por amji mã me ito ihhimpej catêjê atajê pê ihhêj rũm ipajũhtê atajê pyràac. Cwỳrjapê quê ha nee jũm te amji mã ite amji kam ijapac xà impar nare na, quê ha ihtỳj Inxũ itête põ mã mẽn to hanea, pom quê hãn ne pĩxô pàr pajũhtê hô nare, mã hamãr catê hakep ne curẽ, ata jĩkjê na Inxũ te hajỹar. Ne quê ha pĩxô pàr nõ pajũhtê na hô pyxitre apu harij, quê ha hamãr catê hõmpu, ne intête ahna xà me, ahna ampo kên cunea harij atajê jũrên pa, cute cumã hô to hàhtôa to prãm to. Ita jĩkjê na mã Inxũ hãn ne cute amji mã me ito ihhimpej catêjê atajê to hane. Cute amji kam hapac xà kam, cute me ampo kên to me amji kam hapac atajê cunea jũrê, mã mempej, ne ma ijarkwa kôt, me hàpên xà impejti to amji mã me ipicamẽn to me ipa.

— Ne wa hãn ne ijõtpê me amã ijũjarẽn to: “Pom imã me akĩnti ita cuxà, ca ha me amã ajpẽn kĩnti ne” hane.

Na ca ha ate ijarkwa kôt gàpên xà impejti jàhtôa to gàpên to apa na, quê ha ahna me apupu, ne apê ikôt me apa catêjê na me gõmpu, ne me akam ihtỳj me Inxũ catia to cati. Ne cute amji kam hapac xà impejti ata na me gahkre pej, ne hanea ne Inxũ, ihtỳj jũm te amji kam hapac xà to impej na hahkre pej.

Ne wa cormã pry kôt me imõar kam, mã Jeju te me imã amji jarẽn to: — He ipê pĩxô pàr ata pyràac, mã Inxũ pê pĩxô pàr ata jamãr catê ata pyràac, ne ma ijamã.

Quê ha jũm te ijicu, ne nee ikam ihkrĩ kam to incrà nare na, quê ha cupê, cute me pĩxô pajũhtê jakep mã incrà, mã cute me to cuprõn, ne cuhy kam me haxwỳr, ne me to caxàr ata pyràac. Quê ha jũm te ipê ampỳa mã apu ipa na, quê ha ihtỳj amji to acto.

— Ne mẽr ampo na mã wa ame amã icakôc xà ita to icakôc? He icuxà me gakryti cunea kam me apa rohnỳtti mã na me ato prãm, cwỳrjapê wa ame amã icakôc xà ita to icakôc.

Wa hãn ne amji mã Inxũ jarkwa na kampa, na ri cumã ikĩn, ita na ca ha icuxà hãn ne ijarkwa na me ikampa, wa ha imã me akĩn ita na.

Ne wa ha hipêr me amã me ate me ajpẽn kĩnti xà ita na awjahkre.

Ne me cupê Pahpãm na mehkwỳ nare atajê mã mehkwỳ pê me hũràcti catêjê pit kĩn. Na quê ha me apê me hũràc na mã, quê ha ihtỳj me cumã me akĩn. Ne cama nee me apê me hũràc nare. Ampo na? He wa ite amji tekjêa na amji mã me acapi. Cwỳrjapê ri ma ame acaca ne ame acurê.