Populære bibelvers fra A̱romawa 8

Del

A̱wot zi̱ lyen nang A̱gwaza nnyia̱ ta̱m kuzang jen, da̱nian a̱ ka nyia̱ a̱tan nta̱m a̱ mbeang á̱niet ba̱ chat gu a̱ni. Bibya yet á̱niet nang gu khai cha̱chaat ma̱nang gu nda̱p a̱ sak a̱ni.

Mat n nwuak a̱chuchuk, nang á̱ mbyia̱ kyang ku na vwuong A̱gwaza chat zi̱t a̱ni bah. Ku a̱khwu kya, ku swuan ja, ku a̱yaata̱m tswá A̱gwaza bya, ku á̱ka̱tuk ntswá bya, ku a̱wun a̱fwun kya, ku a̱fi̱fa nkyang na̱ chobai á̱zanson a̱ni, ku kuzang tangka̱i a̱ka̱tuk tyok, ku kuzang tangka̱i tyok ma̱ gbang mi̱ kyai tswazwa, ku ntyok ma̱ a̱tsuung a̱byin mi̱ swanta. A̱tsak a̱lyiat, ku kuzang kyang nang A̱gwaza mat a̱ni, ku maai mi̱ maai ku vwuong A̱gwaza chat zi̱t hu nang gu tyai da̱ a̱vwuo Kristi Yesu, A̱tyoli nzi̱t wu a̱ni bah.

A̱wot A̱za̱za̱rak Ntswa wu ni̱ beang nzi̱t mami lat zi̱t hu. Kidee, zi̱ lyen si̱sak ji nang ku mmyim zi̱ naai A̱gwaza a̱ni bah. A̱wot A̱za̱za̱rak Ntswa wu wa ni̱ naai A̱gwaza da̱nian nzi̱t ma̱ng tu a̱nwurung, da̱nang á̱ si̱ mi̱n tyai ma̱ng swáng a̱lyiat a̱ni bah.

Mi̱ yihwa zi̱ na hyia̱ di̱ nkyang na̱ shya̱ a̱zaghyi nzi̱t ka a̱ni? Ki̱ A̱gwaza shya̱ dundung ma̱ng a̱nzi̱t, a̱nyan wa maai a̱ nyia̱ na̱nvan ma̱ng a̱nzi̱t?

Mat a̱nia, ma̱ninika á̱ byia̱ shi̱ri̱ya a̱khwu tazwa á̱niet ba̱ mun á̱pyia̱ ma̱ng Kristi Yesu a̱ni bah.

Mat a̱nia, ka a shim za̱kwa a̱ka̱tuk nyia̱ si̱ nyia̱ tyok mi̱ nfwuo ang hu, ji̱ na tyia̱ ang a̱khwu. Ma a̱nia wa, ka a shim A̱za̱za̱rak Ntswa wu si̱ nyia̱ tyok mi̱ fwuo ang hu, ji̱ na nwuak ang swuan ma̱ng swat nyinyang.

A̱mgba̱m ma̱ng a̱nia, á̱ mbyia̱ kyang ku na vwuong A̱gwaza chat zi̱t a̱ni bah. A̱mgba̱m ma̱ng á̱ka̱tuk nkyang nani, zi̱ swuo chet na ma̱ za̱nzan, mat Kristi a̱tyu a̱ chat zi̱t a̱ni.

A̱tsak a̱lyiat, a̱bung ka zi̱ swuo mi̱ jen jini a̱ni, á̱ si̱ mi̱n tyan ka ma̱ng a̱kyenkyai shi wu nang á̱ na tyai nzi̱t ndyo á̱zanson a̱ni bah.

Zang ntangka̱i nkyang nia maai na̱ nvwuong Kristi chat nzi̱t? Swuo a̱bung hwa na nvwuong nggu chat nzi̱t hu kee? A̱daat wa ke ya̱shuk hwa, zong ja ke kunak hwa, a̱shong a̱ghyi wa, kee tswat ja?

A̱wot A̱gwaza a̱ yet A̱tyia̱ a̱ni, a̱ lyen a̱mgba̱m nfwuo á̱nietbishyi na, a̱ si̱ lyen kyang nang A̱za̱za̱rak Ntswa wu fa a̱ni. Mat A̱za̱za̱rak Ntswa wu ni̱ naai A̱gwaza da̱nian nzi̱t á̱za̱za̱rak á̱niet khwi nggu ba. Naai hu ku nat cha̱chaat ma̱ng kyang nang A̱gwaza chat a̱ni.

A̱wot a̱mgba̱m á̱niet ba nang A̱za̱za̱rak Ntswa A̱gwaza wu kwak ba a̱son a̱ni, bibya yet mman A̱gwaza na.

Á̱niet ba nang za̱kwa a̱ka̱tuk nyia̱ nyia̱ tyok da̱ mba a̱ni, ba̱ ni̱ nyia̱ a̱di̱dam tazwa nkyang a̱ka̱tuk nyia̱ mi̱ nfwuo mba na. Ma a̱nia wa, á̱niet ba nang A̱za̱za̱rak Ntswa nyia̱ tyok da̱ mba a̱ni, ba̱ ni̱ nyia̱ a̱di̱dam tazwa nkyang nang A̱za̱za̱rak Ntswa wu chat a̱ni.

Mat nang A̱gwaza nnwai vwuong ma̱ng Nggwon nggu ka nang gu byia̱ ma̱nyin ka a̱ni, a̱wot a̱ si̱ neap ka nang za̱nang a̱ni da̱nian zi̱t a̱mgba̱m; a̱tsak a̱lyiat, ku fa za̱m, A̱gwaza na nang zi̱t kuzang kyang meang!

A̱wot A̱za̱za̱rak Ntswa wu ma̱ a̱pyia̱ nggu, mun dundung ma̱ng tswá nzi̱t ji. A̱ si̱ tak nang zi̱ ngyet á̱tsatsak mman A̱gwaza bya. Nang zi̱ ngyet mman A̱gwaza nia a̱ni, zi̱ yet á̱niet ya gado nggu bya. A̱tsak a̱lyiat, zi̱ yet á̱niet ba̱ na ya gado a̱kyenkyai shi A̱gwaza wu dundung ma̱ng Kristi a̱ni. A̱wot ka̱ zi̱ chat zi̱ shya̱ a̱kwonu nzi̱t ma̱ng a̱kyenkyai shi Kristi wu, ku myim zi̱ swuo a̱bung ka ndung ma̱ng a̱nggu.

Za̱kwa a̱ka̱tuk nyia̱ ji ni̱ lak li A̱gwaza nchi̱ri̱ng. A̱wot za̱kwa a̱ka̱tuk nyia̱ si̱ mi̱n mak khwi doka A̱gwaza ji bah. A̱tsak a̱lyiat, ji̱ si̱ mi̱n mak mi̱ mak ji̱ khwi doka ji bah.

A̱mgba̱m nkyang nang A̱gwaza mat mi̱ swanta hu a̱ni, na̱ twei ma̱ng a̱khwu ma̱ng di̱dang na̱ li mam a̱hwa á̱zanson nang A̱gwaza na ntyai tangka̱i á̱niet nang mman nggu na yet a̱ni.

Zi̱ lyen, ku li á ngyei kuzang kyang nang A̱gwaza mat a̱ni, fwuong a̱khwu á̱ tu a̱nwurung nang a̱byii̱k ni̱ ntwei mi̱ byin a̱ni.