Populære bibelvers fra Romans 13

Del

Niiyiya keꞌ Jesus anman iiy-iiyān. Niiy way anangan keꞌa ngaantam-ngeey-ngeeyān yumpanakana. Niiy yimanangan iiy-iiyān keꞌ nil anman Jesus.an iiy-iiy.

Nath weeꞌ-weeꞌananganwey loan theeꞌiythan niiyantan-a, niiyanganiya keꞌ kon-ngathow, niiy puthangkana koyamana theeꞌān thant. Thon ina, keꞌ kon-ngathow ngampangana; ngamp kaangk wun-wunāmp thanta pam wanchant, ngampa murkanam anman kaangk wun-wunāmp thantana, ngampaniya keꞌ eench-eenchāmp thanttama. Than weeꞌ-weeꞌanangana wiyantan kaangk wun-wuntan-a, an than kan-kanam wik thayan God.antaman ngeey-ngeeyantan.

Ngay wik inan thawāng niiyanta: ngamp pam wanch yotamangan pam piꞌan anangan wik ngeey-ngeeyāmp thananga, puth nil God.angan work inangan theeꞌ-theeꞌ thant moom piꞌan iiy-iiyayna. Nil work inangan keꞌwey theeꞌiy thantan-a, thanana moom piꞌ-piꞌanam keꞌ iiy-iiyiythan, yaꞌa.

Aakan kanan pachamow-a, ngampana meeꞌmiy ngula ngaaꞌan yaꞌ-ngul wunow, kinch ngulan pentowa. Aak inana ngamp in wunanamp-a, an keꞌ aak ngaaꞌ wunan ngampar puth pam wanchangan way anman yump-yumpantan. In yaam keꞌanama nil palam putham ngul wampow Christ.ana. Ngamp puth way anangan kan wantāmpa! Aꞌ ngamp God.an ngangk thayanam ngangkangam piꞌ-piꞌāmp nunang, aꞌ minam iiy-iiyāmp, oony wayana um thaamp-thaampāmp nunanga keꞌ soldiers yimanangana.

Niiy thant wiyantan kaangkan wun-wuninwey-a, puth niiyana wayan keꞌ yump-yumpān thantana, yaꞌa. Niiy thant wiyant kan-kanamwey kaangk wuninwey-a, an niiy kan-kanama wik thayan God.antaman ngeey-ngeeyaniya.

Niiyan puth minam iiy-iiyān thanta. Thanwey thawayn niiyantana wukal rent anpalan-a, aꞌ wukal tax anpalana payimpungānan-a, niiyaniya theeꞌān thanta. Aꞌ niiy wik min-minam thawān thant, puth than moom piꞌana.