Populære bibelvers fra KO ‘EKISOTO 32

Del

PEA ‘i he vakai ‘e he kakai ‘oku fakatotoka ‘e Mōsese ‘ene ‘alu hifo mei he mo‘unga, na‘a nau fakataha kia ‘Ēlone, ‘o nau pehē kiate ia, Tu‘u, ‘o ngaohi mai hatau ‘otua ke takimu‘a kiate kitautolu; he ko e me‘a ki he siana ni ko Mōsese, ‘a ia na‘a ne ‘omi kitautolu mei ‘Isipite, ‘oku ‘ikai te tau ‘ilo pe ko e hā kuo hoko kiate ia.

Pea folofola ‘a e ‘Eiki kia Mōsese, Tu‘u, ‘o ‘alu hifo; he ko ho kakai na, ‘a ia na‘a ke ‘ohake mei ‘Isipite, kuo nau fakaka‘anga kinautolu: kuo vave ‘enau afe mei he hala na‘a ku tu‘utu‘uni kiate kinautolu: kuo nau ngaohi hanau kafi ukamea, pea kuo nau lotu ki ai, mo feilaulau ki ai, pea kuo nau lea ‘o pehē, Ko eni, ‘e ha‘a ‘Isileli, ho ‘otua, ‘a ia na‘a ne ‘ohake koe mei ‘Isipite.

Pea ‘i he vakai ki ai ‘e ‘Ēlone, na‘a ne langa ha ‘ōlita ‘i hono ‘ao, ‘o ne fanongonongo, Ko e kātoanga kia Sihova ‘apongipongi. Pea na‘a nau tutu‘u hengihengi hake. Pea nau feia ha ngaahi feilaulau-mōifua. Pea nau ‘omi mo e ngaahi feilaulau-‘ofa; pea na‘e nofo ‘a e kakai ‘o kai mo inu kava, pea nau tutu‘u ke va‘inga.

Pea pongipongi hake na‘e lea ‘a Mōsese ki he kakai, ‘o pehē, Kuo mou fai angahala lahi: ka ko eni te u ‘alu hake kia Sihova; hei‘ilo te u lava ha fakalalo ma‘a ho‘omou angahala.