The Colloquial Galilean Bible (CGB) is an easy Bible to understand, particularly for children and youth. It is free in audio, video, and text. For free access or to support our ministry, contact us at www.aibible.org.
الكتاب المقدس (العهد الجديد) باللهجة العامية الجليلية هو كتاب سهل الفهم خاصة للأطفال والشباب. ونصوصه متوفرة مجانا في صيغ صوتية ومرئية ونصية. للحصول على هذه النصوص أو لدعم خدمتنا، الرجاء زيارة موقعنا على العنوان التالي:
www.aibible.org

ترجمة الكتاب المقدس باللهجة العامية الجليلية

ولما انولد يسوع في بيت لحم اللي في منطقة اليهودية وفي أيام الملك هيرودس، اجا ع أورشليم من الشرق خُبرى في الفلك. وسألو: وين الـمولود ملك اليهود؟ لأنو إحنا شفنا في الشرق نجمته في السما وأجينا نسجدلو. لما سمع الملك هيرودس بالقصه انزعج هو وكل أورشليم معو فعمل اجتماع لكل الرئاسة الدينية وجماعة كتبة الشعب وسألهن: وين راح يُولد الـمسيح؟ جاوبوه وقالولو: في بيت لحم اللي في منطقة اليهودية. لأنو مكتوب أنو النبي قال: ويا بيت لحم اللي في أرض يهوذا، قيمتك كبيرة في عينين رؤسا يهوذا لأنو راح يطلع منك الرئيس اللي راح يرعى شعبي إسرائيل.
بعد ما سمع هيـرودس هذا الكلام حقق مع الفلكيين في اجتماع سري وسألهن عن الوقت اللي ظهر فيه الجسم السماوي الـمنيـر وبعتهن عبيت لحم وقلهن روحو ودوروو منيح عالولد. ولما بتلاقوه اِحكولي عشان آجي أنا كمان اسجد إلو. بعد ما سمعو شو قال الـملك راحو باتجاه بيت لحم وظهرلهن الجسم الـمنير اللي شافوه في الشرق. ودلهن ووصلهن عالبيت اللي فيه الولد. انبسطو كثيـر كثير لـما شافو الجسم السماوي الـمنير ودخلو عالبيت وشافو الولد مع مريم إمو. وركعو عالأرض وسجدولو وبعدين طلّعو كنوزهن وقدمولو هداياهن: ذهب وبخور ومر. وقلهن الله في الحلم إنهن ما يرجعوش لهيرودس. وروحوا عبلادهن من طريق تانيه.
وبعد ما تركوا البلاد ظهر ملاك الرب ليوسف في الحلم وقالو: فيق وخُد الولد وإمو وأهرب لـمصر أبقى هناك لحد ما أقولك لأنو هيـرودس بدو يقتل الولد. قام يوسف بالليل وأخذ الولد وإمو وترك البلاد وراح عـمصر وبقي هناك لحد ما مات هيـرودس. وهيك تحققت كلمة الله اللي قالها النبي لما قال: ناديت ابني من مصر.
ولـما اكتشف هيرودس أنو الفلكيين ضحكو عليه غضب كثيـر. وبعت سفاحين وقتلو كل الأولاد اللي في بيت لحم وفي كل الـمناطق اللي جنبها. قتلو كل ولد ذكر عمرو سنتين أو اقل بحسب ما فهموا الوقت اللي حكو عنو الفلكيين. وهيك تحقق اللي قالو النبي إرميا، قال: صراخ وعياط كتير في الرامة راحيل بتبكي عولادها وبدهاش حدا يعزيها. ولادها بطلوا موجودين.
ولـما مات هيـرودس ظهر ملاك الرب ليوسف في الحلم. وكان يوسف في مصر. قالو، قوم وخوذ الولد وإمو وروح لأرض إسرائيل لأنو ماتو الناس اللي بدهن يقتلو الولد. ولـما فاق أخذ الولد وإمو وسافر ورجع ع أرض إسرائيل. وسمع إنو أرخيلاوس صار ملك على أرض اليهودية بدال أبوه هيـرودس. فخاف يروح لهناك. وحكالو ربنا في الحلم أنو يروح لـمنطقة الجليل. فراح يسكن في بلد اسمها الناصرة عشان يتحقق اللي قالوه الأنبيا أنو راح ينادوه نصراوي.

Hør på متى 2