This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.

အဲနော့ ကိုယ်တော်ယေရှုဟ လှေပေါ်ဝိုတက်ပီး ရေအိုင်ဖက်ကမ်းဝို ကူးပြီး သူ့ဇာတိဗြို့ဝို ပလန်လည်ရော့ရှေ့လာလေရယ်။ အဲခီမှာ ကိုယ်တော်ယေရှုဆီဝို လေဖြတ်နေဝိုလူတယော့ဝို ထမ်းစင်နခေါ်ဆော်လာဂေ့လေရယ်။ ကိုယ်တော်ယေရှုဟ အဲမိုလူဒွေရဲ့ယုံကြည်မှုဝို ဗြင်တော်မူရိတွက် လေဖြတ်နေဝိုလူဝို "ငါ့သား စိုးရီပါန ထလော့၊ နန့်ပြစ်ဒွေ ခွမ့်လွှတ်ဇာခံရပါပြီ" ဆိုပီး မိတော်မူလေရယ်။ အဲနေရာမှာရှေ့နေဝို ကျမ်းတတ်ဆရာချို့ဟ သူ့နို့စိထဲမှာ "အယ်လူဟ ဘုရားရှင်ဝို ပြစ်မှားပြောဆိုနေရယ်။" ဆိုပီး တွီးတောနေဂေ့လေရယ်။ အယ်ဘေမဲ့ ကိုယ်တော်ယေရှုဟ သူ့နို့တွီးတောနေဇာဒွေဝို သိရိတွက် "နန်းနို့စိထဲမှာ ဟဲဂျော့ကောဘဲဝိုတွီးဒွေဝို တွီးနေဂေ့နူး" 'နန့်ပြစ်ဒွေဝို ခွမ့်လွှတ်ဇာခံရပါပီ‌ပြောဇာန ထပီးလမ်းရှော့ပါ' ဆိုပီး ပြောဇာဟ ဟဲရာဟ ပိုလွယ်မယ်ထံနူး။ ဘုရားရှင် စေလွှတ်လိုက်ဝို လူ့သားတော်မှာ အယ်မိုဘာမလေပေါ်ဟ ပြစ်တရားဒွေဝို ခွမ့်လွှတ်ပေးနိုင်ဝို ခွမ့်အာဏာရှေ့ဇာဝို နန်းနို့သိနိုင်ရမယ်" ဆိုပီး မိဆိုပီး ကိုယ်တော်ဟ လေဖြတ်နေဝိုလူဝို "ထပီး နန့်ဖျာဝိုကော့ပြီး အီဝိုပလန်လော့" ဆိုပီး မိလိုက်လေရယ်။ အဲခါ လေဖြတ်နေသူဟ ထပီး အီဝို ပလန်ရားလေရယ်။ အဲခါ လူဒွေဟ အဲမိုဖြစ်ပျစ်ဝို ဗြင်ဝိုခါမှာ ကြော့လန့်ရားဂေ့ပီး လူဒွေဝို အဲမိုမျိုးခွမ့်အာဏာဝို ပေးတော်မူဝို ဘုရားရှင်ဝို ချီးမွမ်းဂေ့လေရယ်။ အဲနော့ ကိုယ်တော်ယေရှုဟ အဲနေရာဟနေ ထွက်ခွာလာဝိုခီမှာ ခွန်ကော့ရုံးမှာထိုင်နေဝို မဿဲဆိုပီးခေါ်ဝို လူတယော့ဝိုတွီ့ရိတွက် "ငါ့နော့ဝိုလိုက်ခဲ့" ဆိုပီး မိတော်မူဝိုခါမှာ အဲမိုလူဟထပီး ကိုယ်တော်နော့ဝို လိုက်လာလေရယ်။ အဲနော့ ကိုယ်တော်ယေရှုဟ မဿဲရဲ့အီဝို သွားပီး ဘွဲမှာထိုင်နေဝိုခီမှာ ခွန်ကော့သမားများဂီးန ပြစ်ဒုဇရိုက်မားဒွေ ရော့လာဂေ့ပြီး ကိုယ်တော်န သူ့ဗြိဒွေနတူတူ ဘွဲမှာထိုင်ပီး စားသော့ဂေ့လေရယ်။ အဲမိုဇာဝိုဗြင်ခီမှာ ဖာရိရှဲဒွေဟ ကိုယ်တော်ရဲ့ဗြိဒွေဝို "နန်းနို့ရဲ့ ဆရာဟ ဟဲဂျော့ခွန်ကော့သူဒွေ၊ ပြစ်ဒုဇရိုက်မားဒွေန တူတူစားသော့နေနူး" ဆိုပီး မေးဂေ့လေရယ်။ ကိုယ်တော်ဟ အဲမိုကြောရာဝိုကြားခါမှာ "ကျန်းမာနေဝိုလူဒွေဟ ဆေးဆရာဝို မလိုအပ်ဂေ့ဘေမဲ့ နာမကျန်းဖြစ်နေဝိုသူဒွေဟ ဆေးဆရာဝို လိုအပ်ဂေ့လေရယ်။ 'ငါဟပူဇော်ပသဇာဝို လိုမှေ့ဘဲန ဂရုဏာထားဇာဝိုသာ လိုရှေ့ရယ်' ဆိုဇာဟ ဟဲရာဝိုဆိုလိုဇာနူးဆိုဇာဝို သွားလေ့လာဂေ့ပါ။ ငါလာရခြင်းကြောဟ ဖြော့မတ်မှန်ကန်ဝိုလူဒွေဝို နော်ဒသံဝေဂရဝို့မုဘဲ ပြစ်ဒုဇရိုက်မားဒွေဝို နော်ဒသံဝေဂရစေဝို့ဖြစ်ရယ်။ အဲနော့ ယောဟန်ရဲ့ဗြိဒွေဟ ကိုယ်တော်ဆီဝိုရော့လာဂေ့ပြီး ကိုယ်တော်ဝို "ကျနော်ဒို့န ဖာရိရှဲဒွေဟ ခနခနစာရှော်ဆုတောဂေ့ပြီး ဟဲဂျော့သင့်ဗြိဒွေဟ စာရှော်ဆုတောဇာဝို ပြုလုပ်ဂေ့ရနူး" ဆိုပီး မေးဂေ့လေရယ်။ အဲခါ ကိုယ်တော်ဟ သူ့နို့ဝို "ဒို့သားရဲ့ပေါသင်းမိဆွေဒွေဟ ဒို့သားနတူတူရှေ့နေခီမှာ ဝမ်းနည်းပူဆွေးနိုင်ဂေ့မယ်လော။ ဒို့သားဝို သူ့နို့ဆီဟနေ ဝွီးဝိုခေါ်ဆော်ဝိုနေ့ရော့မှ သူ့နို့ဟ စာရှော်ဆုတောဂေ့လိမယ်ဖြစ်ရယ်။ ဟယ်သူမှဝတ်ဟောဝို ဝတ်စသစ်န ဖာထေးဇာပြုဂေ့ရ။ ဟဲဂျော့ဆိုဝါ ဖာထေးရားဝို ဝတ်သစ်ဟ ကျုံ့ဝါးဝိုခါမှာ ဝတ်ဟောဝိုဖာရားဝို နေရာဝိုဆွဲဖြဲမျိုးဖြစ်ပြီး ပေါ့ဟလဲ ပိုကီးလာမှာဖြစ်ရိတွက်ဂျော့ဖြစ်ရယ်။ ဝိုင်သစ်ဝို သားရေဖူးဟောထဲဝို ဟယ်သူမှထည့်ရ။ အဲမိုမျိုးထည့်လိုက်မယ်ဆိုဝါ ဝိုင်သစ်ဟ သားရေဖူးဝို ပေါ့ပလဲစေပြီး ဝိုင်ဟလဲ ယိုဖိပီး သားရေဖူးဟလဲ ပျစ်စီးသွားပါလိမယ်ဖြစ်ရယ်။ အဲမိုစား ဝိုင်သစ်ဝို သားရေဖူးသစ်ထဲမှာ ထည့်မှ နှေ့ခုစလုံးကောကောမွန်မွန်န ကျန်နေမှာဖြစ်ရယ်" ဆိုပီး မိဆိုလေရယ်။ ကိုယ်တော်ဟ အဲမိုကြောရာဒွေဝို မိကြားနေခီ ရာရှေ့တယော့ဟ ကိုယ်တော်ဆီဝိုလာပီး ကိုယ်တော်ရှေ့မှာဒူးထော့ပီး "ကျနော်ရဲ့မီးဟ ခုဘဲ့သေဆုံးဝါးပြီဖြစ်ရယ်။ အယ်ဘေမဲ့ ကိုယ်တော်လာပြီး သူ့ပေါ်ဝို လက်တော်တံပေးမယ်ဆိုဝါ သူဟသက် ပလန်ရှင်လိမယ်ဖြစ်ရယ်" ဆိုပီး ရှော့တံလေရယ်။ အဲနော့ ကိုယ်တော်ယေရှုဟ သူဗြိဒွေနတူတူ အဲမိုလူနော့ဝို လိုက်လာလေရယ်။ အဲခီမှာ ဆယ့်နှေ့နှစ်ကြာသွီးသွန် ရောဂါခံစားနေရဝိုမျိုးမီးတယော့ဟ ကိုယ်တော်ယေရှုနော့ဝိုလိုက်လာပြီး "ငါဟ ကိုယ်တော်ရဲ့ဝတ်ရုံတော်ဝို ထိလိုက်မယ်ဆိုဝါ ငါ့ရောဂါဟ ပျော့ရားလိမယ်" ဆိုပီး သူ့ကိုယ်သူ ပြောပီး ကိုယ်တော်ရဲ့ ဝတ်ရုံစွန်းဝို ထိလိုက်လေရယ်။ အဲခါ ကိုယ်တော်ယေရှုဟ သူ့ဖက်ဝိုလှည့်ကေ့ပြီး "သမီး ဝမ်းသာလော့၊ နန့်ယုံကြည်မှုဂျော့ နန့်နာရောဂါပျော့ကမ်းစေပါပြီ" ဆိုပီး မိတော်မူလိုက်ဝိုခီဟနေစပီး သူဟ ကျန်းမာလာလေရယ်။ အဲနော့ ကိုယ်တော်ယေရှုဟ ရာရှေ့အီဝို ဆစ်သွားပြီး အဲနေရာဝို ရော့ဝိုခါမှာ တေးဂီတမားဒွေဟ အသုဘချင်းဒွေ တီးမှုတ်နေဇာဝိုဗြင်တွီ့ရပြီး လူအုပ်ဂီးဟလဲ အော်ဟစ်ဆူညံနေလေရယ်။ အဲခါ ကိုယ်တော်ဟ "ဝွီးဝိုသွားဂေ့၊ ဝယ်ရားဟ သေရ။ သူဟ အိပျော်နေဇာ ဖြစ်ရယ်" ဆိုပီး မိဆိုလိုက်ဝိုခါမှာ သူ့နို့ဟ ကိုယ်တော်ဝို လှော်ရယ်ဂေ့လေရယ်။ &amp;nbsp;အယ်ဘေမဲ့ ကိုယ်တော်ဟ လူဒွေဝိုအီပလန်ဝိုထွက်စေပြီးနော့ အီထဲဝိုဝမ်ပီး ဝဲယားလက်ဝိုကိုင်လိုက်ဝိုခီမှာ အဲမိုဝဲယားဟ ထလာလေရယ်။ အဲမိုဒန်းဟ တိုင်းပြည်ခုလုံးဝို ပလန့်ရားလေရယ်။ အဲနော့ ကိုယ်‌တော်ယေရှုဟ အဲနေရာဟနေ ထွက်ခွာလာဝိုခါမှာ မျစ်မမြင်ယော့ကျားနှေ့ယော့ဟ "ဒါဝိဒ်ရဲ့သားတော်၊ ကျနော်ဒို့ဝို နားတော်မူပါ" ဆိုပီး အော်ဟစ်ငိုယိုပီး ကိုယ်တော်နော့ဝို လိုက်လာလေရယ်။ ကိုယ်တော်ဟ တည်းခိုဝိုအီထဲဝို ဝမ်ခီမှာ မျစ်မမြင်ယော့ကျားနှေ့ယော့ဟ သူ့ဆီဝိုချဉ်းကပ်လာရိတွက် ကိုယ်တော်ဟ "နန်းနို့မျစ်လုံးပလန်ဗြင်လာအော် ငါတဂယ်လုပ်ပေးနိုင်ရယ်ဆိုပီး နန်းနို့ယုံကြည်ဂေ့လော" ဆိုပီး မေးလေရယ်။ အဲမိုလူနှေ့ယော့ဟလဲ "ယုံကြည်ပါရယ် အရှင်" ဆိုပီး ပလန်လည်ဖြေကြားလေရယ်။ အဲနော့ ကိုယ်တော်ယေရှုဟ သူ့နို့မျစ်လုံးဒွေဝို တို့ထိပီး "နန်းနို့ရဲ့ယုံကြည်ချင့်တိုင်း ဖြစ်စေ" ဆိုပီး မိတော်မူလိုက်ရာ အဲမိုလူနှေ့ယော့ မျစ်စိပလန်ဗြင်လာလေရယ်။ အယ်ဘေမဲ့ ကိုယ်တော်ယေရှုဟ သူကုသပေးလိုက်ဝိုကြောဝို ဟယ်သူဝိုမှ မပြောဝို့ တင်းကျပ်စွာ ဒိပေးတော်မူလေရယ်။ အယ်ဘေမဲ့ သူ့နို့ထွက်ရားဂေ့ပြီးနော့ ကိုယ်တော်ရဲ့ဒန်းဝို အဲမိုနယ်တစ်နယ်လုံးဝို ပလန့်နှံ့အော်ဖြန့်ဂေ့လေရယ်။ သူ့နို့ထွက်ရားဂေ့ပြီးနော့ လူချို့ဟ ကောဆိုးဝါး ပူးကပ်နေသူတယော့ဝို ကိုယ်တော်ဆီဝို ခေါ်ဆော်လာဂေ့လေရယ်။ ကိုယ်တော်ဟ ကောဆိုးဝါးဝိုနှံထုလိုက်ခါမှာ အဲမိုလူဟ ဂါးပလန်လည်ပြောဆိုနိုင်ရားလေရယ်။ အဲဂျော့ လူထုပရိသတ်ဂီးဟလဲ ရားဒိုင်းအံ့ဩဝါးဂေ့ပြီး "အစ္စရေးပြည်မှာ အယ်မိုမျိုးဖြစ်မျိုးဝို ခါလဲဗြင်ဖူးရ" ဆိုပီး ပြောဆိုဂေ့လေရယ်။ အယ်ဘေမဲ့ ဖာရိရှဲဒွေဟ "ကောဆိုးဝါးဒွေရဲ့ခေါဆော်ဟ သူ့ဝိုကောဆိုးဝါးဒွေဝိုနှံထုနိုင်ဝို့ ဂိုးစွမ်းအားဒွေ ပေးရားဇာဖြစ်ရယ်" ဆိုပီး ပြောဆိုဂေ့လေရယ်။ အဲနော့ ကိုယ်တော်ယေရှုဟ ဗြို့ဝါဒွေဆီဝိုသွားပီး ဓမ္မာရုံဒွေမှာ ဘုရားရှင်သာသနာတော်ရဲ့မြင်ဂလာဒန်းဂေါဝို ဟောပြောသွန်သန်ပြီး ရောဂါမျိုးမျိုးန ဖျားနာနေဝိုသူဒွေဝိုလဲ ပျော့ကမ်းအော် ကုသပေးလေရယ်။ ကိုယ်တော်ယေရှုဟ လူစုလူဝေးဂီးဝိုဗြင်ခါမှာ အဲမိုလူဒွေဟ သိုးထီးမှေ့ဘဲဝို သိုဒွေမျိုး ခိုကိုးရာမဲ့မဲ့န ပစ်ရားဇာခံရရိတွက် စိပမ်ပန်းနွမ်းနယ်နေရိတွက်ဂျော့ အဲမိုလူဒွေပေါ် နားဂရုနာစိဖြစ်လေရယ်။ အဲခါ ကိုယ်တော်ဟ သူ့ဗြိဒွေဝို "ရိသီးဇာဒွေများဂီးရှေ့ဘေမဲ့ ရိသီးဝို့လုပ်သားဒွေဟ နည်းပါးလှပေရယ်။ အဲဂျော့ ရိသီးခြင်းရဲ့ရှင်သခင်ဆီမှာ သူ့ရိသီးခြင်းတွက် ရိသီးပေးဝို့လုပ်သားဒွေဝို စေလွှတ်ပေးဝို့ ဆုတောဂေ့လော့" ဆိုပီး မိတော်မူလေရယ်။

Hør på Matthew 9