လွင် ဒူအီ ခါတ် ဒီ ရန့် မာန် မာငုန်

1ဝါယ် အန် တီ ဇဝ် ယေဆူ ဝီ စုး ဒီ ကာလာင် အူဖာမာ ဒီ ဂေ။ အန် တဝ်း၊ “န့ ဟဲ့ ဒွိုမ် မိုဝ်း ဒူအီ အူ ဝီ၊ အန် ဘူင် မာန် မာငုန်။ အန် ဘူင် လူင့် ဒီ ကာအုန် မာန်၊ ဝီ ဂိုဝ်း ဒီဂ့လုဝ့် ကာဒါယ် ဒူင် ဒီ ညဲတ့် ဘ့လေ မာငုန်။ ဟဲ့ ဟွတ့်၊ အန် ဘော ဆမ် ကာစှူင့် စာ ဒီ ဘ်ု မာန်။ ဟဲ့ ဟွတ့် ဘူင် ဇိုဝ် တီ ဒွန် မျုဝ်၊ အန် ဝီ တဲး အီ ဟဝ် ခါတ် ဒီ ရန့် မာန် တီ။ အန် ယီ ဝီ ဟာဝ် ကွယ် ပေါ အူ ပ့လုဝ့်။ 2ဟဲ့ ဇမ် အာခြာဝ် ဆိန် ဘ့လေ မာငုန်၊ ဒါ ကာညာ မာန် တွိုန် ဝီ တိုယ် မှာယ် အန် အူ ဝီ၊ တဲး အန် ဟာဝ် ဒူင် ကွယ် ဂေ အီ ခါတ် ဒီ ရန့် မာန် အန် တွိုန်၊ တဲး အန် ဒိုဝ်း ဘ့လေ မာငုန် အီ မုး ရုး ပီ ခါတ် ဂေ ဒီ ရန့်။ 3ဒူအီ ရန့် မာန် တွိုန်၊ ဂေ ယီ မှေတ့် မှာယ် တီ၊ ဝီ မး အန်၊ တိုယ် အန် ဝေန့်၊ တူ မိုဝ်း ဒီ တဲး မာဆေ ဒီ အန်။ 4ဒါ ကာညာ ဝီ တိုယ် မှာယ် အန် ပေါ အူ ဝီ။ ဂေ အီ ရန့် မာန် ဝီ ဂ့လွက် ဂိန့် အန်၊ ဘော ဘူင် တဲး အန် စှိုမ် ဆာရေ။ 5ဒါ ကာညာ ပီ ဝီ တိုယ် ပေါ အူ ဝီ။ ဂေ ဝီ ငဝ်း ဝဲန် ဝီ တီ။ ပါယ် တီ ဒါ ကာညာ မာန် ပီ ဝီ တိုယ် ဘဲန် ဝီ ဘဲန် ဝီ။ မင် အီ ဂေ မး၊ မင် အီ ဂေ ငဝ်း ဝဲန်။

6ဟဲ့ ဟွတ့် ပန် တီ န့ ဆီ မိုဝ်း ဂွန် အီမာယ် ပီ ရွက့် ဒါ ကာညာ တွိုန်။ ဒါ ကာညာ ပီ ဝီ တိုယ် ဘော အန်။ အန် တဝ်း၊ ‘ဂေ ဒီ ဘော ရုဝ်ဆေ ဂွန် အုဝ်။’

7ဂေ ဒူအီ ရန့် မာန် တွိုန်၊ ဂေ ယီ လာယ် ဆင်ချာင်။ ဂေ တဝ်း၊ ‘ဒူအီ တီ ဒီ ပ့လု ဂုန့် အန်။ တဲး အေ ငဝ်း ဝဲန် ဘော အန်။ ဟဲ့ ဟွတ့်၊ အေ ဒီ ပွိုန် ခါဂုန် အန်။’ 8ဂေ ဟဲ့ ဟွတ့် လာယ် ဆင်ချာင် ပါယ် တီ၊ ဂေ ဝီ မှေတ့် အန်၊ ငဝ်း ဝဲန် အန်။ ဟဲ့ ဟွတ့် ဂေ ဝီ ဝဲန် ဒုဝ် ဘူင့် အန် နာ ရေတ့် မာန် မာငုန် တီ။

9ဆေ န့ ပါယ် တီ၊ ဒါ ကာညာ မာန် တီ ဒီ ဘူင် မာဆေ ဒီ ဂေ။း အန် ဒီ ဘော ဟာဝ် ဒူင် ကွယ် မာန် အန် တီ၊ ဝီ ငဝ်း ဝဲန် ဂေ ဒူအီ အီ ရန့် မာန် အန် ဘော ဝီ ဒွါ အီ ဟဝ် ရန့်။ 10ခဲင် ဘပ် ဇဝ်ဖြာ န့ မိူဝ် ဟဲ့ ဒဲမ် လွင် ဒါ ကာညာ တီ ဘော ဂွန် အန်။ န့ တဝ်း၊ ‘မာဝ် ပီ ဝဲန် ဂေ ဒူအီ ဆမ် ကာင်၊ အန် ဟဲ့ ဝီ ဘဲန် စေန့် ရွင့်။ 11အန် ဇဝ် ဟဲ့ ဘူင် တဲး န့ ဘဲန် ပါယ် တီ။ ယေ မိူဝ် ဟဲ့ အာမ် ကာဆဝ် လွင် အန် တီ။’ ဘေ တူ ဒွိုမ် တိး လွင် အန် တီ။း”

12ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဒါ တာင် တွိုန် ဝီ လာယ် ဆင်ချာင် မှဝ် ဂေ ဒီ ပါယ် ဒီ ငဝ်း ဝဲန် အန်။ ခုဝ်၊ ဂေ ဟဲ့ နပ်၊ ဇဝ် ယေဆူ ဟဲ့ ကာလာင် အူဖာမာ တီ လွင် ဂေ။ ဂေ ယီ ယုဝ် ဂေ ဒူအီ ကိူန်။ ခုဝ်၊ ဂေ လေး ဒူင် ကွယ် ဇဝ် ယေဆူ၊ ဝီ ဟာဝ် ပေါ ပ့လုဝ့်။

လွင် ရွိုန် စိုင်

13ဝါယ် အန် တီ ဂေ ဒါ တာင် ဝီ တိုယ် ဒူအီ ဖိုင် ဖာရီဆဲ မင် အီ ဘော ဒူအီ ဖိုင် ခုန်ဒီခမ် အာဟေရူတ် မင် အီ၊ တဲး ဂေ ဟာဝ် ဒူင် ကွယ် ဇဝ် ယေဆူ၊ တဲး ဂေ ထေဝ် ဒီ ကာဆုး အန် ကာလာင် ဂြုဝ်း တူ မှာန်။ 14ဂေ ဝီ တဝ်း၊ “အိုယ် မဲ ဆာရာ၊ ယေ နပ် မဲ မုး ဒူအီ အီ ဘူင် နာ မှာန် ဆေဆေ။ မဲ တူ ရွက့် တူ ဇွင့် အာဆေ။ ကူပ် တူ ဝါင် မဲ ဆာရေ အီ၊ မဲ မာနုဝ် ဆိူဝ် ဒါရာ ဇဝ်ဖြာ၊ တဲး န့ မှာန် ဆေဆေ။ တဲး ယေ နပ်၊ ဆေ ယေ ဒွါ ရွိုန် စိုင် ဒီ ခုန်ဒီခမ် အာကဲဆာ၊ န့ ဒူပ် တူ ဒူပ် ဒါရာ။း 15မဲ ဒီ တဝ်း မာဆေ။း ယေ လုဝ် တူ လုဝ် ဒွါ ရွိုန် စိုင် ဒီ အာကဲဆာ။း”

ဂေ ဟဲ့ ဟွတ့် ကာလာင် ဂြုဝ်း တီ၊ ဇဝ် ယေဆူ ဟဲ့ နပ် အူ ဇေန့်၊ နဝ်း ဂေ တူ ဆိူဝ်။ အန် ဝီ တဝ်း၊ “မှဝ် န့ ပါယ် ပီ တး ထေဝ် ဘေ လွှက့် အုဝ်။း ဘေ ဒွါ ရွိုန် အူ ဘူင့် ဒီ အုဝ်၊ တဲး အုဝ် ယွတ်။” 16ဂေ ဝီ ဒွါ ရွိုန် ဒီ အန်။ အန် ဝီ ဒီမွှတ် တဝ်း၊ “အာရိုပ် အာဆေ န့ မုး၊ အီ ကွယ် ဒဲင် ရွိုန် နီ။း ဘော စိူဝ် အာဆေ ဟဲ့ ဒဲမ် နာ ဒဲင်။း” ဂေ ဝီ တဝ်း၊ “အာကဲဆာ။”

17ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း၊ “ဆေ န့ ပါယ် တီ၊ ခဲ့ ပီ လုဝ် ဘေ ဒွါ ဒီ အာကဲဆာ တဲး ဘေ ဒွါ ဒီ အာကဲဆာ။ ခဲ့ ပီ လုဝ် ဘေ ဒွါ ဒီ ဇဝ်ဖြာ၊ တဲး ဘေ ဒွါ ဒီ ဇဝ်ဖြာ။” ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဘောကာဂ့လျီတ် ဝီ အာမ် ကာဆဝ်။

လွင် ဒူအီ လာယ် ခတ်

18ဝါယ် အန် တီ န့ ဘော မိုဝ်း ဂေ ဒူအီ ဖိုင် ဆာဒူခဲ မင် အီ၊ ဂေ တး ဇမ် ဒူင် ကွယ် ဇဝ် ယေဆူ။ ဂေ ဒူအီ ဖိုင် တီ၊ ဂေ တဝ်း၊ ဝါယ် ဟဲ့ ဟွတ့် ယမ် ဒူအီ၊ ဂေ တူ ပွိုန် ဝီ ယိတ့် ဝီ အိမ်။ ဂေ ဒူအီ ဇိုဝ် တီ ဝီ တး ဒီမွှတ် ဇဝ် ယေဆူ။ 19ဂေ တဝ်း၊ “ဆာရာ၊ ဒါ အာမုဝ်ဆဲ တွိုန် ဟဲ့ ဒဲမ် အုန် ဒါရာ ဇဝ်ဖြာ ပါယ် နီ၊ ‘ဆေ အီမာယ် အူ ဝီ ယမ် အာတ့် ယမ် အီဘိုန့် အန်၊ ဆေ အန် ညှမ် မိုဝ်း ဂွန်၊ ဝါ အန် လုဝ် ဝီ လာယ် ယာ ဆီပြး တီ၊ တဲး အန် ဒွါ လှုက်လှာန် ဒီ အီကတ် အန်။’ 20န့ ယီ ဒွိုမ် မိုဝ်း ဂေ အူကတ် အူဝါ ဘူ ဝီ။ ဝီ တာင် ဟဲ့ ခတ် ဒိုဝ်း အီဘိုန့်။ အန် ယီ ယမ် ဒေါ ညှမ် မိုဝ်း အန် ဂွန်။ 21ဟဲ့ ဟွတ့် ဝါ အန် အီ ဒါမ် အန် ပီ ဝီ ခတ် ဒိုဝ်း ယာ ဆီပြး တီ။ ဘော အန် ဝီ ယမ် ဒေါ ညှမ် မိုဝ်း အန် ဂွန်။ ပါယ် တီ ဝါ အန် ပေါ အူ အီ ပီ ဝီ ခတ် ဒိုဝ်း အီဘိုန့် တီ၊ ပီ ဝီ ယမ်။ 22ဂေ ဘော ဘူ ဝီ ခတ် ဒိုဝ်း အီဘိုန့် တီ၊ ယီ တူ မိုဝ်း ဂွန်။ ဟဲ့ ဟွတ့်၊ ဘော အီဘိုန့် တွိုန် ဝီ ယမ်။ 23ဆေ ဟီ ဇမ် ဆီငဲ ဒီ ဝီ ယိတ့် ဝီ အိမ် ဂေ ဒူအီ ယမ်၊ အီဘိုန့် တီ ဒီ ဘဲန် အီဘိုန့် အာဆေ ခဲင် ဒူအီ ဘူ ဝီ၊ အီ ဟဲ့ ဒွိုမ် ဘဲန် အီမာယ် အန်။း”

24ဂေ ဟဲ့ ဟွတ့် တဝ်း ပါယ် တီ၊ ဇဝ် ယေဆူ ဝီ တဝ်း၊ “ကူပ် တူ နပ် ဆီချာ ဘေ ပီ ဒဲမ် အုန် ခဲင် ဘပ် ဇဝ်ဖြာ၊ ပီ ဇေန့်ဇာ ဘေ အာဝ် မှာန်။ ဘေ မိူဝ် တူ နပ် မာဆေ လွင် ပွုန် ဇဝ်ဖြာ။ 25ဆေ ဂေ ဒူအီ အီ ဟဲ့ ဟွတ့် ယမ် ဒီ ဝီ ယိတ့် ဝီ အိမ်၊ ဂေ တူ ဝီ လာယ် ခတ်။ ဂေ ပီ အာမူ အာမာတ် ဇဝ်ဖြာ အီ ကွယ် ခဲင် ဂါင်ဟြာဝ်။ 26အုဝ် ယီ တဝ်း ဒီ ဘေ လွင် ဂေ ဒူအီ ယမ် ဒီ ဝီ ယိတ့် ဝီ အိမ်။ ဘေ ဒွန် အီ ဟဲ့ ဒွိုမ် တိး ခဲင် ဘပ် ဇဝ်ဖြာ လွင် ဒါ အာမုဝ်ဆဲ တွိုန်။ ဒေါ ကွယ် အန် ကာတတ် ယွုန် တွိုန်၊ ဇဝ်ဖြာ တဝ်း ဒီ အန်၊ ‘အုဝ် မုး ဇဝ်ဖြာ ပီ ကြိုပ် ဘော အာဘြာဟမ်၊ ဘော အာဆဲက် ဘော အာကူပ် တွိုန်။’ 27ဒေါ တဝ်း ဇဝ်ဖြာ ပါယ် တီ၊ န့ လိုဝ်း ဆီချာ၊ ဒူအီ ယမ် တူ ပွိုန် ဒီ ကြိုပ် ဇဝ်ဖြာ။ န့ မုး ဒူအီ အိမ်။ ခုဝ်၊ ဂေ အူယ် ဝီ တီ ဟဲ့ ဝီ ယိတ့် ဝီ အိမ်၊ ကွယ် ခဲင် မိူင် ဇဝ်ဖြာ။ ကူပ် န့ ပါယ် တီ၊ ပီ ဇေန့်ဇာ ဘေ အာဝ် မှာန်၊ အာဝ် မုး။” ဇဝ် ယေဆူ တဝ်း ပါယ် တီ။

လွင် ဒါရာ ဇဝ်ဖြာ အီ တာင် လွှိုမ် တူတ့်

28န့ ယီ မိုဝ်း ဒါ ဆာရာ အီ မာနုဝ် ဒါရာ ယူဒါ အူ ဝီ၊ အန် ဟဲ့ တး ဒူင် ကွယ် ဂေ၊ ဝီ ယိုဝ် ဂြုဝ်း ပီ လာယ် ဆင်ချာင် ဂေ။ အန် ဘော နပ်၊ ဇဝ် ယေဆူ နပ် ဆီချာ ဒီ ဝျီ့ ဂြုဝ်း အီ။ အန် တး ဒီမွှတ် ပေါ အူ မျုဝ်။ အန် တဝ်း၊ “ဆာရာ၊ ဒါရာ အီ တာင် ဒဲင် ဒါရာ ဒွန် ညွင့်၊ မာဆေ န့ မုး။း”

29ဇဝ် ယေဆူ ဝီ တဝ်း၊ “ဒါရာ ပီ လုဝ် ဒူပ် အေ အာတ့် ဒူပ် အေ ဒါရာ ဒွန် ညွင့်၊ န့ တဝ်း၊ ‘ထူမ်၊ ထူမ်၊ ဘေ ဒူအီ အီဆာရေလ။ အန် ဇဝ်၊ အီ မုး ဇဝ်ဖြာ ပီ ကြိုပ် ဘေ၊ အန် မုး ဇဝ်ဖြာ အူ ကာဒင်။ 30အန် ဘော မုး ဇဝ်ဖြာ အီ အိုပ် ဘေ။ ဘေ လုဝ် ရွက့် အန် ဇဝ် တီ၊ တဲး ဘော နဝ်း ဘော တူတ့် ရွက့် အန်။ ခဲ့ ပွိုန် ဘေ ရွက့် ခဲင် နဝ်း၊ ခဲ့ မိုဝ်း ဘေ အာငျာန်၊ ခဲ့ မိုဝ်း ဘေ ပ့လူမ်၊ ဘေ လုဝ် ဒိုဝ်း တူတ့် ဒွန် မျုဝ် ဇိုဝ် တီ၊ ဝီ ရွက့် အန် ဇဝ်။’ 31ဒါရာ ပေါ အူ ညွင့် အီ တာင် ဒဲင် ဒါရာ ညွင့် ဟဝ်၊ န့ ပါယ် နီ၊ ‘ဘေ လုဝ် ရွက့် အီ ဟဝ်၊ တဲး န့ ပီ ဘေ ရွက့် ဒုဝ် ဘြိမ် ဘေ။’ န့ မုး ဒါရာ အာ ညွင့် တီ၊ ပီ လုဝ် ဒူပ် အေ အာတ့် ဒူပ် ဒါရာ ဒွန် ညွင့်။”

32ဒါ ဆာရာ တွိုန် ဝီ တဝ်း၊ “ဟဲ့ မုး ပါယ် တီ။ မဲ ဒါ ဆာရာ ဟဲ့ ကာလာင် ဂြုဝ်း မှာန်။ အန် ဇဝ် မုး ဇဝ်ဖြာ အူ ကာဒင်။ အာဝ် မိုဝ်း ဇဝ်ဖြာ ပေါ ကာဒင်။ 33အန် ဘော မုး ဇဝ်ဖြာ အီ အိုပ် အေ။ အေ လုဝ် ရွက့် အန် ဇဝ် တီ၊ တဲး ဘော နဝ်း ဘော တူတ့် ရွက့် အန်။ ခဲ့ ပွိုန် အေ ရွက့် ခဲင် နဝ်း၊ ခဲ့ မိုဝ်း အေ အာငျာန်၊ ခဲ့ မိုဝ်း အေ ပ့လူမ်၊ အေ လုဝ် ဒိုဝ်း တူတ့် ဒွန် မျုဝ် ဇိုဝ် တီ၊ ဝီ ရွက့် အန် ဇဝ်။ အေ ဘော လုဝ် ရွက့် အီ ဟဝ် ပီ အေ ရွက့် ဒုဝ် ဘြိမ် အေ။ ဆေ အေ ဘူင် ပါယ် တီ၊ ဟဲ့ အာရေ တာင် လွှိုမ် လှူ အေ ဘဲန် မျုဝ် ဘဲန် မျုဝ်။”

34ဇဝ် ယေဆူ ယိုဝ် ဂြုဝ်း ဒါ ဆာရာ တီ၊ အန် ကော နပ် အာငျာန် အန် မွှိုမ်။ အန် ဝီ တဝ်း ဒီ အန်၊ “မဲ ဟဲ့ ငှာ ဒီ ဇမ် ခဲင် မိူင် ပီ အိုပ် ဇဝ်ဖြာ။” အန် ဟဲ့ ဟွတ့် ကာလာင် ဂြုဝ်း တီ၊ န့ အာဝ် ဟူ မိုဝ်း အာဆေ ဝီ ယ ဒီ ဒီမွှတ် ဇဝ် ယေဆူ ပေါ န့ ပွါ။

လွင် ဂွန် ဇဝ်ဖြာ

35ဒေါ ကွယ် ဇဝ် ယေဆူ ခဲင် ဝဲင် ဟုဝ် ဇဝ်ဖြာ၊ မာနုဝ် ဒူအီ ကိူန်၊ အန် ဝီ တဝ်း၊ “ဂေ ဒါ ဆာရာ အီ မာနုဝ် ဒါရာ ဇဝ်ဖြာ၊ ဂေ တဝ်း၊ ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် မုး လှုက်လှာန် ခုန်ဒီခမ် အာဒါဝိတ် တွိုန်။ 36န့ ယီ မုး ခုန်ဒီခမ် အာဒါဝိတ်၊ နဝ်း ဖွိုမ် ဇဝ်ဖြာ ဟဲ့ ဒွိုမ် တဲး အန် တဝ်း၊

‘ဇဝ်ဖြာ ဟဲ့ ဒွိုမ် ကာလာင် ဒီ ဒါ ကာညာ အုဝ်၊ တဲး မဲ တုတ့် ဒီ ခူပ် အုဝ်၊ ဘ့လာက် အာအး အုဝ်၊ တဲး န့ ကော ဇမ် အာခြာဝ် ဒီ တဲး အုဝ် တဲး မဲ ညဲတ့် တူတ့် ရန်ဆူ မဲ။’

37ပါယ် တီ၊ ခုန်ဒီခမ် အာဒါဝိတ် တဝ်း၊ ‘ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် မုး ဒါ ကာညာ အီ အိုပ် အာဒါဝိတ်။ ခုဝ်၊ ဘေ တူ ပွိုန် တဝ်း၊ အန် မုး လှုက်လှာန် အာဒါဝိတ်။’”

ဒေါ ကာလာင် ဇဝ် ယေဆူ ဂြုဝ်း တီ၊ ဂေ ဒူအီ ကိူန် ထူမ် ဂြုဝ်း အန်၊ ဂေ မိူဝ် အိုင် ကာဆဝ် ပီ မာနုဝ် အန်။

38အန် ဝီ မာနုဝ် ဂေ၊ ဝီ တဝ်း၊ “ဘေ လုဝ် ဆာဒိက် ဂေ ဒါ ဆာရာ အီ မာနုဝ် ဒါရာ ယူဒါ။ ဂေ အိုင် ဒီ စှိုပ် ခြိုင် စှိတ်။ ဂေ ဘော အွန် ဒီ ဝိန် ဒီ လဲ၊ တဲး ဒူအီ ခဲင် ကာလး ကြိုပ် ဂေ။ 39ဆေ ဂေ ဘော လိုပ် ခဲင် ဇူင် ဂေ ဒူအီ အာယူဒါ၊ ဂေ ဘော လိုပ် ဘ့လွယ် ဒူအီ ဟဝ်၊ ဂေ ဝီ အိုင် ဒီ ကွယ် ဒူင် စာ။ 40ဂေ ဘော လွှက့် ဒီ ကာလာင်၊ တဲး ဂေ ပွိုန် ကာင် ဂေ ယာ ဆီပြး။ ဂေ ဘော ညိုင်ရာင် ဆာခိုဝ် လှေန့်၊ တဲး ဒူအီ အာမ် ဂေ။ ဂေ ဒူအီ ဘူင် ဇိုဝ် တီ၊ ဂေ ဒီ လုဝ် ခမ် ကိူန် မှာပ် ဂေ။”

လွင် ပီ လှူ ယာ ဆီပြး

41ဝါယ် အန် တီ ဇဝ် ယေဆူ ဝီ တုတ့် နာ အာတ့် ဇီဒိူက် လှူ ဂေ ရွိုန်။ အန် ဘော ယွတ် ဒူအီ ကိူန် ဘ့လေး ရွိုန် ဂေ ခဲင် ဇီဒိူက် တီ။ န့ မိုဝ်း ဒူအီ ခြမ်၊ ဂေ ကိူန် ဘ့လေး ရွိုန် ကိူန် ခဲင် ဇီဒိူက် တီ။ 42န့ ယီ မိုဝ်း ယာ ဆီပြး အူ ဝီ။ အီ ဂိန် ကာဆဝ်။ အန် တး၊ ဝီ ဘ့လေး မေတ် ဘွင့် အာ မေတ် ခဲင် ဇီဒိူက်။ အာဝ် ငဝ်း မာဆေ။

43ဇဝ် ယေဆူ ဝီ ဒဲ့ ဒီဘဲ အန်၊ ဝီ တဝ်း၊ “အုဝ် တဝ်း အာခ်ု ဒီ ဘေ။ ယာ ဆီပြး တီ ဟဲ့ ဂိန် ကာဆဝ်။ အန် ယဲ့ ဟဲ့ ဟပ် ရွိုန် ကိူန် လွှိုမ် ပီ ဟပ် အီ ဟဝ် ဒွန် အီ။ 44ဂေ ဒွန် အီ ဟဲ့ ဒွါ ရွိုန် အီ ကာလူယ် အီ ကာလွှိုမ် အန်။ အီဘိုန့် တီ ဟဲ့ ဂိန် ကာဆဝ်။ အန် ယီ လှူ တူတ့် ဒွန် မျုဝ် ခဲ့ ပီ မိုဝ်း အန်။” ပါယ် တီ ဇဝ် ယေဆူ မာနုဝ် ဒီဘဲ အန်။

Hør på မက 12