ၵႂၢမ်းၼမ်း
ၶၢဝ်ႇ​တြႃး​သိူဝ်းပျေႃႇ​ယူဝ်းႁၢၼ်ႇ၊ ဢၼ်​လၢတ်ႈ​လွင်ႈ​တြႃး​ ၸဝ်ႈ​ယေႇသု၊ ၼႆႉ ၵေႃႉ​တႅမ်ႈ​မၼ်း​ၸိုဝ်ႈ​ ယူဝ်းႁၢၼ်ႇ၊ ၵေႃႉ​ပဵၼ်​လုၵ်ႈၸၢႆး​ ၸေႇပေႇတႄး၊ လႄႈ​ပဵၼ်​ၼွင်ႉၸၢႆး​ ယႃႇၵုပ်ႈ၊ ဢၼ်​ပဵၼ်​ၵူၼ်းလႃႈၼမ်ႉ​ၼၼ်ႉ​ၵူၺ်းဢမ်ႇၵႃး၊ယင်း​ပဵၼ်​တပႄး​ ၸဝ်ႈ​ယေႇသု၊ ၵေႃႉ​ၼိုင်ႈ​ၵႃႈၼႂ်း​သိပ်း​သွင်​ၵေႃႉ​ၼၼ်ႉ​ဢေႃႈ။ မၼ်း​တႅမ်ႈ​မိူဝ်ႈ​ပီ​ ၸဝ်ႈ​ၶရိၸ်ႈ၊ 85-90 (A.D. 85-90) ၵူၺ်းၵႃႈ၊မိူဝ်ႈလဵဝ်​ၼႆႉ​မီး​ၵူၼ်း​ၼမ်ၼႃႇ​ယုမ်ႇ​ဝႃႈ၊ ၶၢဝ်ႇ​တြႃး​သိူဝ်းပျေႃႇ​ယူဝ်းႁၢၼ်ႇ၊ ၼႆႉ​ၸၢင်ႈ​ပဵၼ်​လႆႈ​ဝႃႈ၊လႆႈ​တႅမ်ႈ​ယဝ်ႉ​မိူဝ်ႈ​ပီ​ ၸဝ်ႈ​ၶရိၸ်ႈ၊ 70 (A.D. 70) ဢွၼ်တၢင်း​ဝဵင်း​ ယေႇရုသလႅမ်ႇ၊ ဢမ်ႇ​ပႆႇ​လႆႈ​ၶၢမ်ႇ​တၢင်း​ဢၼ်​ယႃႉ​လု​ယႃႉလႅဝ်​ၼၼ်ႉ​ဢေႃႈ။ ၵွပ်ႈပိူဝ်ႈ​ဝႃႈ၊ၵႃႈၼႂ်း​ ၶၢဝ်ႇ​တြႃး​သိူဝ်းပျေႃႇ​ယူဝ်းႁၢၼ်ႇ၊ ၼႆႉ​ဢမ်ႇ​လႆႈ​လၢတ်ႈ​လွင်ႈ​ဢၼ်​ဝဵင်း​ ယေႇရုသလႅမ်ႇ၊ လႆႈ​ၶၢမ်ႇ​တၢင်း​ဢၼ်​ယႃႉ​လု​ယႃႉလႅဝ်​ၼၼ်ႉ​ဢေႃႈ။ ၶၢဝ်ႇ​တြႃး​သိူဝ်းပျေႃႇ​ယူဝ်းႁၢၼ်ႇ၊ ၼႆႉ​လၢတ်ႈၼႄ​လွင်ႈ​ ၸဝ်ႈ​ယေႇသု၊ ပဵၼ်​ထႃႇဝရႃႉ​ၼုၵ်ႈၵပၢတ်ႈ​တြႃး​ၽြႃးပဵၼ်ၸဝ်ႈ​ဢၼ် “ၶၢမ်ႇ​ပဵၼ်​ၸႃႇတိ​ၵူၼ်း​သေလႄႈ​ယူႇ​လူၺ်ႈ​ၵၼ်​တင်း​ႁဝ်း” ၼၼ်ႉ​ဢေႃႈ။ ၸွမ်းၼင်ႇ​ၶၢဝ်ႇ​တြႃး​သိူဝ်းပျေႃႇ​ဝႃႈ​ၸမ်ႉ၊ ၸဝ်ႈ​ယေႇသု၊ ပဵၼ်​ၵတိ​သဵတ်ႈၸႃႇ​ဢၼ်​ၵႄႇၶျွတ်ႈ၊ပဵၼ်​လုၵ်ႈၽြႃးပဵၼ်ၸဝ်ႈ​လႄႈ​ၶဝ်​ၸိူဝ်း​ဢၼ်​ယုမ်ႇမၢတ်ႈ​မၼ်းၸဝ်ႈ​တင်းလၢႆ၊တၵ်း​လႆႈ​ဢသၢၵ်ႈလိပ်း​ဢေႃႈ။ (20:31)
ၽိုၼ်လိၵ်ႈတြႃး​ၼႆႉ​တႅမ်ႈ​လွင်ႈ​ထႃႇဝရႃႉ​ၼုၵ်ႈၵပၢတ်ႈ​တြႃး၊ၽြႃးပဵၼ်ၸဝ်ႈ​ဢၼ်​ၸၢပ်ႈသႅင်ႇ​ၵၼ်​တင်း​ ၸဝ်ႈ​ယေႇသု၊ လႄႈ​ပွတ်း​ႁူဝ်​ၽိုၼ်လိၵ်ႈ​ၼၼ်ႉ​လၢတ်ႈၼႄ​လွင်ႈ​ၼိမိၵ်ႈ​လၢၵ်ႈၶၼႃႇ​ဢၼ်​လီဢၢမ်း​ဢၼ်​ ၸဝ်ႈ​ယေႇသု၊ ႁဵတ်း​ၼၼ်ႉ၊ႁႂ်ႈလႆႈ​ပဵၼ်​သၢၵ်ႈသေႇ​လွင်ႈ​ ၸဝ်ႈ​ယေႇသု၊ ပဵၼ်​ၸဝ်ႈ​ၵႄႇၶျွတ်ႈ​ဢၼ်​ဝႆႉၵတိ​သမ်ႉ​ပဵၼ်​လုၵ်ႈၽြႃးပဵၼ်ၸဝ်ႈ​ၼၼ်ႉ​ဢေႃႈ။ ၵွပ်ႈပိူဝ်ႈ​ၼိမိၵ်ႈ​လၢၵ်ႈၶၼႃႇ​ဢၼ်​လီဢၢမ်း​ၸိူဝ်း​ၼၼ်ႉ​လႄႈ​ၵူၼ်း​ၵမ်ႈၽွင်ႈ​ယုမ်ႇမၢတ်ႈ​လႄႈ​ၶဝ်ႈ​ပဵၼ်​တပႄးၸဝ်ႈ​မႃး​ဢေႃႈ။ ၵူၺ်းၵႃႈ၊ၵမ်ႈၽွင်ႈ​ႁဵတ်း​ၶတ်း​လႄႈ​ယင်း​ဢမ်ႇ​ယုမ်ႇ။ ပွတ်း​ၵၢင်​ၼႂ်း​ဢၶၢၼ်း​လူင် 13-17 ၼၼ်ႉ၊ပႃး​လွင်ႈ​ ၸဝ်ႈ​ယေႇသု၊ ႁဵတ်းၵေႃႉသႄႈ​မိုတ်ႈၵိုဝ်း​ၵၼ်​တင်း​တပႄးၸဝ်ႈ​တင်းလၢႆ၊ၼႂ်း​ၶမ်ႈ​ဢၼ်​မၼ်းၸဝ်ႈ​လႆႈ​ၶၢမ်ႇ​တၢင်း​ဢၼ်​တိဢဝ်၊ဢိၵ်ႇတင်း​ပၼ်​ဢဵၼ်​ပၼ်ႁႅင်း​ၶဝ်​ၼႂ်း​ဝၼ်း​ဢွၼ်တၢင်း​လႆႈ​ၶၢမ်ႇ​တၢင်း​ဢၼ်​တွၵ်ႇ​ဝႆႉ​ၼၼ်ႉ​ဢေႃႈ။ ၼႂ်း​ဢၶၢၼ်း​လူင်​ပွတ်း​ႁၢင်​တင်းလၢႆ​ၸမ်ႉ၊ၽုၺ်ႇၼႄ​လွင်ႈ​ ၸဝ်ႈ​ယေႇသု၊ လႆႈ​ၶၢမ်ႇ​တၢင်း​ဢၼ်​တိဢဝ်၊တၢင်း​ဢၼ်​ၸႅတ်ႈ​သေး၊တၢင်း​ဢၼ်​တွၵ်ႇ​တၢႆ​ၵႃႈၼိူဝ်​သဝ်မႆႉဝႃးမိုဝ်း၊တၢင်း​ဢၼ်​လုၵ်ႉၶိုၼ်းလိပ်း​မႃး၊ဢိၵ်ႇတင်း​တၢင်း​ဢၼ်​ၼႄပျႃး​တူဝ်​မၼ်းၸဝ်ႈ​တီႈ​တပႄးၸဝ်ႈ​တင်းလၢႆ​ၸိူဝ်း​ၼၼ်ႉ​ဢေႃႈ။
သြႃႇ​ ယူဝ်းႁၢၼ်ႇ၊ ဝႆႉ​ဢယေး​ယႂ်ႇ​သေလႄႈ​လၢတ်ႈ​လွင်ႈ​သု​ၵျေးၸူး​ထႃႇဝရႃႉ​ဢသၢၵ်ႈ​ဢၼ်​လႆႈ​ၵႃႈတီႈ​ ၸဝ်ႈ​ၶရိၸ်ႈ၊ သု​ၵျေးၸူး​ဢၼ်​တႄႇၸႃႉ​မိူဝ်ႈလဵဝ်​လႄႈ​သမ်ႉ​တူၵ်း​ႁွတ်ႈ​တီႈ​ၶဝ်​ၸိူဝ်း​ဢၼ်​ယုမ်ႇမၢတ်ႈ​ ၸဝ်ႈ​ယေႇသု၊ ပဵၼ်​သဵၼ်ႈတၢင်း​လႄႈ​ပဵၼ်​သမ်ႇမႃႇ​တြႃး၊ဢိၵ်ႇတင်း​ဢသၢၵ်ႈ​ၵေႃႈ​ပဵၼ်​ၼၼ်ႉ​ဢေႃႈ။ သြႃႇ​ ယူဝ်းႁၢၼ်ႇ၊ ဢဝ်​တင်း​တၢင်း​ဢၼ်​ၵမ်ၵျၢင်ႉ​ယူႇ​ၵူႈမိူဝ်ႈ​ၵူႈဝၼ်း​ၸိူဝ်း​ၼၼ်ႉ၊တႅၵ်ႈတိူင်း​ႁႂ်ႈ​ႁု​ထွမ်ႇ​လွင်ႈ​ဢသၢၵ်ႈ​ဝိၺိၺ်ႇ​ဢၼ်​ၸႅတ်ႈ​ၼၼ်ႉ​မိူၼ်ၼင်ႇ​ၼမ်ႉ၊ၶဝ်ႈမုၼ်း၊ဢၼ်လႅင်း၊ၵူၼ်း​လဵင်ႉ​ထိင်း​သူဝ်း​လႄႈ​ၽုင်​သူဝ်း၊ဢိၵ်ႇတင်း​တူၼ်ႈ​ၶိူဝ်း​မၢၵ်ႇၸပိတ်ႉ​တင်း​မၢၵ်ႇ​မၼ်း​ၸိူဝ်း​ၼၼ်ႉ​ဢေႃႈ။
ႁူဝ်​ၶေႃႈ​ဢၼ်​ၶဝ်ႈပႃး​ၸမ်ႉ
ၼုၵ်ႈၵပၢတ်ႈ​ၸဝ်ႈ​ဢၼ်​ဢသၢၵ်ႈလိပ်း 1:1-18
သြႃႇ​ ယူဝ်းႁၢၼ်ႇ၊ ဢိၵ်ႇတင်း​တပႄး​ ၸဝ်ႈ​ယေႇသု 1:19-51
ၵၢၼ်​သႃႇ​ၼႃႇ​ဢၼ်​ ၸဝ်ႈ​ယေႇသု၊ ႁဵတ်း 2:1-12:50
ဝၼ်း​လိုၼ်းသုတ်း​ၵႃႈၼႂ်း​ဝဵင်း​တင်း​ႁိမ်း​ဝဵင်း​ ယေႇရုသလႅမ်ႇ 13:1-19:42
တၢင်း​ဢၼ်​ၸဝ်ႈၽြႃး​လုၵ်ႉၶိုၼ်းလိပ်း​လႄႈ​ၼႄပျႃး​တူဝ်ၸဝ်ႈၵဝ်ႇ 20:1-31
တၢင်း​ဢၼ်​ၼႄပျႃး​တူဝ်ၸဝ်ႈၵဝ်ႇ​ၼႂ်း​မိူင်း​ ၵႃႇလိလႄး 21:1-25

Hør på ယူဝ်း ၵႂၢမ်းၼမ်း