Salmo 66
66
SALMO 66
Esta grandi bo obranan ta, SEÑOR
Pa maestro di kanto. Un kantika. Un salmo.
1Hubilá Dios, abo, tera henter,
2kanta gloria di su nòmber mahestuoso,
dun'É su alabansa glorioso!
3Bisa Dios: Kon tremendo ta bo obranan!
Bo gran poder ta fòrsa bo enemigunan
lora abou pa duna Bo homenahe.
4Tera henter lo adorá Bo,
lo kanta pa Bo, kanta gloria di bo nòmber.
5Bini, mira obranan di Dios,
temibel pa su echonan pa hende.
6El a kambia laman den tera seku#Éksodo 14:21; Salmo 114:3,5 —
por a pasa den awa na pia;#Yozue 3:14-17
p'esei ban legra den djE.
7Ku su poder E ta manda eternamente,
su mirada ta peilu nashonnan.
Rebeldenan, no lanta kontra djE.
8Nashonnan, alabá nos Dios,
laga su alabansa resoná;
9El a hasi nos biba di nobo
i no a laga nos pia tambaliá.
10Bo a purba nos, sí, o Dios,
Bo a laga nos dirti den krosèt,
manera ora ta limpia plata.
11Bo a laga nos kana den reda,
a buta karganan pisá riba nos lomba.
12B'a laga hende subi nos kabes,
nos a pasa den kandela, den awa,
ma Bo a saka nos afó, duna alivio.
13Lo mi bai bo kas ku ofrendanan pa kima,
pa ofresé Bo loke m'a primintí Bo,
14e loke mi boka a papia
i loke m'a menshoná den mi ansha.
15Lo mi kima sakrifisio pa Bo
di bestianan yen di sebu,
laga huma di kabritu subi na Bo
i ofresé Bo bue i karné.
16Bini, boso tende! Lo mi konta
boso tur ku ta honra Dios,
kiko El a hasi den mi bida.
17Pareu mi boka a yam'É
ya mi lenga a kuminsá alab'É.
18Si mi tabatin mal intenshon,
Señor lo no a skucha mi.
19Ma Dios a skucha mi di bèrdè,
El a atendé mi orashonnan.
20Bendishoná sea Dios,
ku no a rechasá mi orashon
i ku no a nenga mi su amor!
Nu geselecteerd:
Salmo 66: BPK13
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Papiamentu Bible with DC © Bible Society in Netherlands Antilles and Aruba, 2012, 2013