१ कोरीन्थी 8
8
ॱल्ह धङ् कुल पुबे ॱस्य सये ढीक्ल १-१३
1हीगो ङे ॱल्ह धङ् कुल पुबे ॱस्य सये ढीक्ल सीक्को़त्। हज्यरङ् कुरीक्की रीक्प ॱस्यीगेन् बेत्। रीक्प ॱस्यीब हुगी ज्यीङ्ब बोम्सील तोङ्गेन् बेत्। ॱनी झ्यम्बे लेगी ॱलोप्स्यीक् ॱङीक्केन् बेत्। 2ॱसी़ घन्ड ॱस्यीगो़त् ॱनो़गुक्क हुगी घन्ड ॱस्यी गो़गेन् बेक्क हुगो ॱमीत् ॱस्यीगेन् बेत्। 3ॱसी़ को़न्ज्योक्ल झ्यम्ब खुको़र्दङ् हुगो को़न्ज्योक्की इक् ङु ॱस्यीगेन् बेत्।
4ॱल्ह धङ् कुल पुबे ॱस्य सये ढीक्ल हीगो सीक्केन्। ॱल्ह सीक्केङ्गी ढङ् घयेत् म दीरङ् जम्बुलीङ्ल दीम्बरङ् मीप्प हीम्ब हज्यरङ्ल ॱस्यो़च्च्ये यो़क्केन् बेत्। को़न्ज्योक् च्यीगी च्यीक् मेन्द, ॱयोङ्म मीप्प बेत्। 5ॱस जम्बुलीङ् धङ् तेङ् यी़ल ॱल्ह सीक्केङ्गी ढङ् यो़क्केन् बेत् त सीगुक्। ॱल्ह धङ् यङ् ज्यीन्दक् सीक्केङ्गी ॱल्ह गज्येन् यो़ट्टो। 6ॱनी यो़त्न अक्, म दी हज्यरङ्ल यप् को़न्ज्योक् दी च्यीगी च्यीक् मेन्द, ॱयोङ्म मीप्प बेत्। ॱनी खोङ् च्यानी क हस्सो़त् छङ्म थम्ज्येत् झ्युङ्न यो़क्केन् बेत्। ॱनी हज्यरङ् घयेत् एत् खोङ्गी ढीक्ल खो़त्न यो़क्केन् बेत्। हज्यरङ्ल चोव ज्यीन्दक् दी च्यीगी च्यीक्रङ् यो़क्केन् बेत्। हुगो येशु ख्रीष्ट् बेत्। ॱनी खोङ्गी लम्नी क हस्सो़त् छङ्म थम्ज्येत् झ्युङ्न, हज्यरङ् घयेत् एत् खोङ्गी लम् ज्यी़त्नीरङ् झ्युङ्न यो़क्केन् बेत्।
7ॱनी हीन्न अक्, मी कुरीक्की हीगो ॱह घो ॱमीत् छुगेन् बेत्। एल्ला खीत्रङ् यरीगी ॱल्ह धङ् कुल छ्यक् छ्यो़प्प पु पुब झ्यीक्केन् बेत्। ॱनी हुन्दो ओक् कुल पुबे ॱस्य सये ढीक्ल सङ् ङेन् च्यो़त् ॱमीत् ॱस्यीब, ॱसीम्ब ची ॱङील ॱस्योर्न कुल पुबे ॱस्य बेत् व ॱनो़गीन् ॱनो़गीन् सगेन् बेत्। हुगो झ्यीनी हुबे ॱसीम्ल ॱनोङ् युङ्गेन् बेत्। 8समे ढङ्गी हज्यरङ् को़न्ज्योक्तङ् ज्यङ्दु उक् मीत् डोगेन् बेत्। जदु उक् मीत् डोगेन् बेत्। हुगो सेनी, फेन्दो युङ्ज्ये न, न मत् सेनी, ॱनो़त्तो युङ्ज्ये।
9ॱनी हीन्न अक्, रङ् च्यङ्जो़त् झ्यीन दो़च्च्यीत्। रङ्गी त घन्ड सेन अक् डीक्केन् बेत् ॱनो़न सेब दीगी छ्य डम्ज्ये मीप्पे मील ङीब युङ्दु ॱमत् ची़च्च्यीत्। 10घन्ड हीन् सीन्न सङ् ङेन् च्यो़त् ॱमीत् ॱस्यीगेङ्गी मी हुगी रङ् रीक्प ॱस्यीब च्येम्मे मी ॱल्हगङ्ल स्युन ॱस्य सय थोङ्न ॱनी, हुगो ओक् कुल पुबे ॱस्य सदु डोगेन् मेम्बेक्क ॱनी? 11हुन्दुक् झ्यीन रङ्गी रीक्प ॱस्यीबे लम्नी छ्य डम्ज्ये मीप्पे पी़न्ज्या हुगो रङ्गी झ्यीत् झ्यीक्की खरप्ल तोङ्गेन् ॱनी? ख्रीष्ट् हुगी धो़ल्ल अक् ढोङ मेम्बेक्क ॱनी? 12सङ् ङेन् च्यो़त् ॱमीत् ॱस्यीगेङ्गी पी़न्ज्यागी ॱसीम्ल रङ्गी हुन्दुक् झ्यीन ॱनोङ् लङ्दु ची़प्पे ले हुगो पी़न्ज्याल ङीब झ्यीबल डोगेन् बेत्। हुगो ख्रीष्ट्ल दीक्प झ्यीबल डोगेन् बेत्। 13ङे सये सेगी झ्यीत् झ्यीक्की ङे पी़न्ज्या दीक्पल ॱस्योर्तु ची़क्को़त्न ॱनी, ङे पी़न्ज्या दीक्पल ॱस्योर्च्ये मीप्पे ढीक्ल ङ नम्ल अक् ॱस्य मीत् स।
Nu geselecteerd:
१ कोरीन्थी 8: LHM
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
© 1995 Wycliffe Bible Translators, Inc. and Nepal Bible Society