Luk 2
2
Ɔgbɛl bi Jisɔs
Matiyu 1.18-25
1Na ngara yi fɔ ntakpa ntol a Rom Ɔgɔstus akarɛ ɛjigi arɛ afal anɛ na bijiba Rom#2.1 Rom ngara yi fɔ Ɛmpɛrɔ ji Rom ajɔl babɛ bijiba bi Isrɛl na nsim. 2Fɔ yɔ ajɔlɔ ngbɔgamba ɛfala anɛ bɔm na ji Kwiriniyus ajɔlɔ ntol a Siriya. 3Anɛ kpakpa atum aji na bijiba abɔ arɛ aji kag abeng.
4Fɔ yɔ Josɛf atumɔ lijɛn na Nasarɛt ji Galili, arir Bɛtlɛm ji Judiya, ɛjiba ntola Defid, ateb arɛ wɛ Josɛf aru ɔgu bifɔ bi Defid. 5Ajil fɔ na Mɛri, arɛ aji kag mbeng yɔ wɛ akɔlɔ mɔng nkal, Meri ɔla ɛgba kol ɛrir na ngbɛla. 6Aji abɔ ajɔlɔ fɔ, ngara ɔgbɛl arir. 7Mɛri agbɛl mgbɔga mba mɔn yɔ ɔlom. Akɔ abɔma afu wɛ atabɛ akak na ɛkpagnte ɛliga nsɔl ɔjɔra, ateb ɛyaga ɛjɔlam na ɛtɛk ajɛna nɛ.
Ba babɛ ɔjɔra na ba teb ɔteb Ɔsɔwɔ
8Alagtu afɔ, ba babɛ ɔjɔra ajɔl na ɛmɛ alagɛ Bɛtlɛm ababɛ ɔjɔra abɔ. 9Nteb ɔteb a Tata ajil ajog naji abɔ, liloba li Tata ɛbole abɔ, ɛkokob ɛbɔb abɔ. 10Nteb ɔteb Ɔsɔwɔ abong atɔg abɔ, “Wun ɔtɔb kpɛ bɛ! Mbal na ɛteng ɔteb nkarɛ bi ɛla karɛ anɛ kpakpa ntakpa ɛyɛbalitem. 11Ɛlɛl na ɛjiba Defid aligbɛl nyanyangɛ akarɛ wun, wɛ yɔ arɛ nɔ Krayis Tata. 12Wun ɔla yɛn ndenge yi fa: Ɔla yɛn mɔn na ji alɔ wɛ fu abɔma abomɛ na ɛkpagnte ji ɔjɔra ɛliga nsɔl.”
13Fɔ tutu ɛbɔngɛ ba tebe ɔteb Ɔsɔwɔ, abal akpa na nteb ɔteb yɔnga ajege Ɔsɔwɔ abonga,
14“Lijega ɛjɔl na Ɔsɔwɔ na libonta,
likɔna ɛjɔl na anɛ ba nde ba linɔba ɛlɛ ɛrenɔ ɛkarɛ abɔ.”
15Na ji bateb ɔteb Ɔsɔwɔ alɔ tum abɔ asa afɛngɛ njim ajɛn na libonta, ba babe ɔjɔra akuma mbonga atɔga atɛm, “Ɛjɛn na Bɛtlɛm ɛji yɛn nsɔl yi ɛlɔ lem ji Tata alɔ wur tɔg.” 16Abɔ asubi ajɛn aji yɛn Josɛf na Meri na mɔn, anɔngɔ na ɛkpagnte ji ɔjɔra ɛliga nsɔl. 17Na ji ba babɛ ɔjɔra alɔ wɛ yɛn, atɔg abɔ ji nteb ɔteb Ɔsɔwɔ atɔgɔ abɔ abangɛ mɔn. 18kpakpa anɛ ba ayogɔ ɔtɔga bifa bi ba babe ɔjɔra ɛkpɔl abɔ ɛsi. 19Meri akak ɔtɔga bifɔ na litem afɛngɛ abɛl nkanter abangɛ. 20Ba babɛ ɔjɔra afɛngɛ akuri, ajege, atiga Ɔsɔwɔ ateb ji abɔ ayogɔ afɛngɛ ayɛn na amir. Kpakpa nsɔl ɛjɔla anɔ mɔng ba tebe ɔteb Ɔsɔwɔ abongɔ.
Ateb Jisɔs na Njo Ɔsɔwɔ
21Na mfo ɛnigni, alem wɛ ɔjangkon#2.21 Mɔng ajigi ya Mosis abongɔ , agore wɛ mbeng a Jisɔs yi nteb ɔteb Ɔsɔwɔ akarɔ wɛ nig ayibi ɔla ɛbɛ.
22Na ji ngara alɔ lome yi Josɛf na Meri alagɔnɔ lem ligbɛna li aroga li abɔ mɔng ajing a Mosis abongɔ, abɔ atab Jisɔs aji na Jɛrusɛlɛm na Njo Ɔsɔwɔ arɛ aji karɛ Tata. 23mɔng ayɛlɔ na Ajing ya Tata, “Arɛ ngbɔgamba mɔn yɔ lom ajɔga ajɔla akarɛ Tata.”#2.23 Exo. 13:2,12 24Josɛf na Meri akarɛ ɛyarɛ mɔng Ajing a Tata abongɔ: “ɔdɛnɔ bɛl ɛmɛb bibal ɔkɔ ɛblagom bibal ɔlem ɛyarɛ ji fɔ.”#2.24 Lev. 12:8
25Ngara yi fɔ ɛbɛl nɛnom wurang na Jɛrusɛlɛm, akoga wɛ arɛ Simiyɔn, ajɔl ɛteng nɛ abɛga Ɔsɔwɔ. Ajɔl seg arɛ ayɛn nyanyangɛ Isrɛl. Ɛtugi Ɔsɔwɔ ɛjɔl na nɛ. 26Ɛtugi Ɔsɔwɔ ɛtɔg wɛ arɛ anim teg akpɔ tɛtɛ wɛ ayɛn Krayis yɔ Tata asigɔ nyɔ. 27Na ji Josɛf na Meri atabɔ Jisɔs arɛ aba lem mɔng ajing abongɔ, Ɛtugi Ɔsɔwɔ ɛtabɛ ɛji na Njo Ɔsɔwɔ. 28Sayimɔn atab mɔn na abɔ ayɛ ajege Ɔsɔwɔ abonga,
29Tata, ndɔgalitom ɔwa amal akpɔ batig na likɔna,
ateb arɛ wɔ ɔgba lem ji ɔbongɔ.
30Amir ama agba yɛn ɔnyangɛ ɛba,
31Anɛ kpakpa ala yɛn.
32Ɛla jɔl Liro ɛkarɛ anɛ ba Jɛntal,na liloba li anɛ aba Isrɛl.
33Ndɛ na nyɛn mɔn ɛkpɔla bɔ ɛsi abangɛ ji abongɔ abangɛ wɛ. 34Simiyɔn akarɛ abɔ lifola abong atɔg Meri ji nyɛn, “Ɔsɔwɔ agba rang mɔn ɔfa akarɛ ndungi na ɔnyangɛ ɛkarɛ agbem anɛ na Isrɛl. Ɛla jɔl ndenge yi Ɛgbem anɛ na Isrɛl ala bong abangɛ. 35naji nkanter ɛgbem anɛ ala ribi. Wɔ Mɛri, ɔkankang ɛla yara litem.”
36Ana nyɛn amir, atɔb ajɔl na Njo Ɔsɔwɔ. Ajɔl mɔn ɔkal yɔ Fanuwɛl, yɔ ajogɔ ɔgu bi Asa. Ajɔl ɛkpa kola nɛ,agba jɔl na libal na nya arima. 37Ajɔl akpɔ asa na nya atila ani na ɛni,#2.37 ajɔl akpɔ asa na nya atil ani na ɛni ɛfente na alagtu ajɔl kponi Ɔsɔwɔ na Njo Ɔsɔwɔ akaga ɔrɔ afɛngɛ ajɔla njal. 38Ana titi abal akag Ɔsɔwɔ sam, abong abangɛ mɔn atɔg anɛ kpakpa ba ajɔlɔ seg Ɔsɔwɔ arɛ aba nyangɛ Jɛrusɛlɛm.
Afɛngɛ na Nasarɛt
39Josɛf na Meri alem ji Ajing a Tata abongɔ, afɛngɛ njim na Nasarɛt ɛjiba abɔ na Galili. 40Jisɔs abenga afɛngɛ akore, abɛl ɛkukuna, lifola Ɔsɔwɔ ɛjɔl na nɛ.
Jisɔs na Njo Ɔsɔwɔ
41Liya aliali nyɛn na ndɛ Jisɔs ajiga na Jɛrusɛlɛm na Likag li Aseng Asa. 42Na ji Jisɔs alɔ rir nya woba na ɛbal, abɔ atɔna aji Likag mɔng ligbɛna ɛbongɔ. 43Na ji Likag ɛlɔ mal, ndɛ na nyɛn atum akuri,mɔn ji Jisɔs asal na njim na Jɛrusɛlɛm abɔ akunam. 44Abɔ akɛrɛ arɛ agba tɔna ɛbɔngɛ anɛ ba lijɛn akuri, ajɛn ɔfo kpukpul. Nig aji kuma wɛ nsɛba na ɛbɔngɛ abɔnyɛn na atɛm. 45Na ji adɛnɔ wɛ yɛn, afɛngɛ njim na Jɛrusɛlɛm aji kuma wɛ nsɛba. 46Naji ɛlɔ seng mfo ɛra ajil ayɛn nɛ na Njo Ɔsɔwɔ, na ji ajigɔ na ba teteba, ayonge atong afɛnga abiba abɔ abiba. 47Anɛ kpakpa ba ayogɔ wɛ ɛkpɔl abɔ ɛsi na ɛkukuna ɛjɛ na nfanga ɛyɛ. 48Naji ndɛ na nyɛn ayɛnɔ nɔ wɛ, ɛkpɔl abɔ ɛsi. Nyɛn abong atɔgɛ, “Mɔn, bɛjom ji ɛkerɔ ɔlem wur ana? Mɛ na nsɔja ɛgba wur fɛgayɔ ɛsɛba wa.”
49Jisɔs afanga abɔ, “Bɛjom ji wun ɔsɛba mam? Wun ɔnyim arɛ mɛ nteg njɔl na ɛtɛk nsɔjama ɛ?” 50Abɔ ɛsaram ji wɛ abongɔ.
51Jisɔs afɛngɛ na Nasarɛt na ndɛ na nyɛn. Wɛ ayoga abɔ. Nyɛn atore nsɔl yi ɛlɔ lɛm na Litem. 52Jisɔs abenga na biji na ɛkukuna. Ɔsɔwɔ abɛl ɛyɛbalitem na nɛ anɛ atɔb abɛl ɛyɛbalitem na nɛ.
Nu geselecteerd:
Luk 2: ABM
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©️2022 Luke Initiative for Scripture Translation