KARARIADI 40
40
I Yusuf nupakal᷊ahe mangal᷊eng u ipi ngu manga taumata ngu tutupang
1Pira ngkatempo bou e'e dua ngkatau l᷊ang u ratu Mesir, e'e ko musasiliwiri u inung l᷊au musasiliwiri borotie, nukoa pusansal᷊a su ratu. 2Kuteu ratu nuwawal᷊uang si sire rua l᷊ange e'e, 3bou e'e i sire nipasue su l᷊al᷊ung u tutupang su wal᷊e tumbonang u mudadiaga istana, su tampa i Yusuf nitahang. 4Mal᷊iwue l᷊ai i sire rua su tutupang e'e, dang tumbonang u mudadiaga istana nangonggo hal᷊i si Yusuf putangkiang si sire.
5Pia su sihuwi musasiliwiri inung l᷊au musasiliwiri boroti e'e l᷊awo nipi. Mangal᷊eng u ipi ngi sire rua e'e mutatintang. 6Su tempo ngi Yusuf nakoa sarang koa i sire rua ndai mal᷊ou mal᷊ukari, i sire rua tuhungang ko masusa. 7Bou e'e i sie nakina, “Nakurawe i rua kere'e kasusange naung i rua silou i'i?”
8I sire nusumimbahi, “Mungkilaeng i kami nipi, dang takoae ko matitong mangal᷊enge.”
I Yusuf nangul᷊i, “Kitang Mawu Ruata botonge makakoa taumata mupakal᷊ahe mangal᷊eng u ipi. Kenang wuke ipi ngi rua e'e.”
9Musasiliwiri inung e'e nangul᷊i, “Su l᷊al᷊ung u ipi e'e ia nakawua pia kau anggori su tingoku. 10Kau e'e pia lelange tatilu mbuhue manga lelange manita pia raunge, singkahindo bungange nawingkahi, bou e'e manga wuange seng nasasa. 11Su tempo e'e ia kapuhinggonge galasi u inung u ratu, inau daku nial᷊a wua ngu anggori e'e dang daku nipuhu su l᷊al᷊ung u galasi ngu ratu, bou e'e daku nisiliwiri si sie.”
12I Yusuf nangul᷊i, “I'i l᷊al᷊ahe'e: Lelange tatilu e'e mangal᷊enge tilu l᷊ou. 13Su l᷊al᷊ung u tilu l᷊ou i'i ratu sarung mul᷊iwiri si kau, i sie sarung mangonggo u ampunge si kau dang manul᷊e ngi kau su pangkatiu ko horo. I kau sarung musiliwiri galasi u inung su ratu kere horo. 14Kateho tinaungewe ia boko kakakoau seng mapia. Tul᷊ung ko ul᷊i kakakoaku su ratu, tadeau ia il᷊iwiri bou tutupang i'i. 15Watu'u tuhu hinonge ia horo ko nitandang bou wanua ngu tau Ibrani dang su si'i l᷊ai, su Mesir i'i, ta sarang paghisa ia nukoa barang ko dal᷊ai sarang mambeng i pasu sarang l᷊al᷊ung u tutupang.”
16Suapang musasiliwiri boroti e'e nakatitong himoneu mangal᷊eng u ipi ngu musasiliwiri inung e'e ko mapia, kuteu i sie l᷊ai nangul᷊i si Yusuf, “Ia l᷊ai nipi, ia kapunge loto ngu boroti tatilu mul᷊al᷊unsung su wawo u timbo. 17Su l᷊al᷊ung u loto ko karangetange pia mul᷊ahaghi kukisi guna ngu ratu, kateho manga burung nusumongo nukumang manga kukisi e'e.”
18I Yusuf nusumimbahi, “I'i l᷊al᷊ahe u ipi e'e: Loto tatilu e'e mangal᷊enge tilu l᷊ou. 19Su l᷊al᷊ung u tilu l᷊ou i ratu sarung mundoi taumata pamoto timbou dang pamiting badang u su rihi simbau, dang manga burung sarung kumang ghisi ngu.”
20Tilu l᷊ou bou e'e ko hari jadi ngu ratu, dang i sie nukoa sal᷊iwang ko l᷊abo guna ngu kaul᷊i u mul᷊ahal᷊i. I sie nuparenta tadeau musasiliwiri inung l᷊au musasiliwiri boroti pakisuwang bou tutupang dang pakiwawa su tingo ngu kaul᷊i u mul᷊al᷊ahal᷊i su istana. 21Kateho musasil᷊iwiri inung nisul᷊enge su pangkatie ko horo. 22Arawe musasil᷊iwiri boroti nihukung hukumang papate. Kaul᷊i u e'e nariadi musul᷊ung ko nihabari Yusuf. 23Kateho musasiliwiri inung e'e seng ta nakatinaung si Yusuf. I sie mang seng nal᷊iwuhi kahingang si Yusuf.
Nu geselecteerd:
KARARIADI 40: PLT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
