SASUWANG 15

Samperi Musa

1 # Kl᷊h. 15:3 Bou e'e i Musa dang manga taumata ngu Israel nusamperi u samperi i'i guna ngu mudalo Mawu,

“Ia mo musamperi guna ngu Mawu,

watu'u I Sie seng nakauntung dingang u kal᷊ahamaghi.

Kaul᷊i u kawal᷊o dang sumasakenge

niwahung-E sarang l᷊al᷊ung l᷊auri.

2 # Mzm. 118:14; Yes. 12:2 Mawu pananimbukaku ko matoghasi;

I Sie ko nupakasal᷊amati si sia.

Ko I Sie Mawu Ruataku, ia mo mudalo si Sie,

Mawu Ruata ko isusumba ngi upungku,

Daku wantughang I Sie.

3 Mawu musaseke ko wahani,

Mawu, e'e areng-E.

4Sordado ngu Mesir dang kaul᷊i u keretae

nipal᷊o-E sarang l᷊al᷊ung u l᷊auri.

Manga tumbonang u seke ko kawahaninge

nawontol᷊i su l᷊auri Gelagah.

5I sire nipelohi l᷊auri ko mal᷊al᷊ung,

dang kere watu nawontol᷊i su wunae.

6Katatoghasi-U tumaniu makal᷊aherang, o Mawu,

Roka nikoa-U nasue nusawuhi.

7Dingang kawawantughi-U ko l᷊abo,

I Kau nupakawinasa ngu kaul᷊i u ko mundoka si Kau.

Wawal᷊uang-U l᷊uhena kere putung

dang manutung si sire kere onasi nahango.

8L᷊auri ko nipatiu-U, ake naghulung marange,

kararisi matei kere meseli,

hakiu wuna u l᷊auri botonge nikal᷊iuang.

9Angkung rokae, ‘i sie sarung daku wawatukang dang daku samekang,

daku sawukang peraku, dang daku kinsueng i sire.

Bou e'e kaul᷊i u kakakala i sire daku hampaseng,

daku ipupahia dang daku ipake sarang masahe.’

10Kateho Mawu dingang u paghisa suminda

mupasongo l᷊ou ko nanahasi su Mesir.

I sire nawontol᷊i kere tima ko mabuha

su l᷊al᷊ung u ghal᷊udu u ake ko mauha.

11Mahang ruata sude ko makasul᷊ung si Kau,

O Mawu ko kawantughange dang susi?

I sai botonge makakoa manga tatia ko makal᷊aherang

dang hal᷊i ko l᷊abo kere Mawu?

12I Kau nuhengke l᷊ima kuaneng-U,

kuteu nailangte roka nipelohi dunia.

13I Kau nangaha bangsa ko seng nipakasal᷊amati i'i,

watu'u I Kau satia su diandi-Ngu.

Dingang katatoghasi ko l᷊abo i sire nisirungang-U,

dang niaha-U sarang tana-U ko susi.

14-15Manga bangsa nakaringihi dang kakendenge;

taumata ngu Filistin dang manga pangaha u Edom nugara.

Taumata ngu Moab ko matoghasi nukumende,

taumata ngu Kanaan nadio naunge.

16I sire nataku kahingang

nakawua katatoghasi u Mawu.

Su tempo umati-U sumahe, roka takoae kawasa manahang;

nakal᷊iso bangsa ko seng nipakal᷊iu-U.

17Bou e'e Israel ninturi-U

sarang tampa ko nipile-U guna katanakeng-U.

I sire natana tatapi su wul᷊uri-U ko susi,

su wal᷊e ko nipararisi-U sisane.

18Ko I Kau Mawu, Ratu,

ko mamarenta sarang panginsuenge.”

Samperi i Miryam

19Su tempo ngu taumata ngu Israel nul᷊umiu l᷊auri, i sire nul᷊umal᷊eng su marange. Kateho suapang manga kereta ngu Mesir dingang u kawal᷊o l᷊au sumasakenge nasu su l᷊al᷊ung u l᷊auri, Mawu nupusul᷊e ngu ake'e naansehi sau, hakiu i sire nawontol᷊i.

20Bou e'e i Miryam, singkatau nabi kowawine, tuhang i Harun, nangal᷊a rebanae, dang kaul᷊i u kowawine nutumuhu nanengkohi rebana apiru nusal᷊ai. 21I Miryam nusamperi guna ngi sire,

“Pusamperiko guna ngu Mawu,

watu'u Ia seng nakauntung dingang u kal᷊ahamaghi.

Kaul᷊i u kawal᷊o l᷊au u sumasakenge

nipal᷊o-E sarang l᷊al᷊ung u l᷊auri.”

Ake ko mapai

22Bou e'e i Musa numbawa bangsa Israel bou l᷊auri Gelagah nundol᷊ong sarang tana l᷊inggi ngu Syur. Tilu l᷊ou l᷊iwuenge i sire nul᷊umal᷊eng nul᷊umiu tana l᷊inggi ko tawe nakarea ake. 23Bou e'e nuratingte i sire su tampa ko arenge Mara,#15:23: Mara: Arenge e'e su wahasa ngu Ibrani mangal᷊enge “mapai”. kateho ake su se'e mapai kahingang, hakiu ta nikainung. Watu'u e'e tampa e'e nisigho Mara, mangal᷊enge mapai. 24Kuteu manga taumata e'e nusughal᷊i si Musa dang nukina, “Apa ko sarung inungang i kite?” 25I Musa nukal᷊iomaneng singapang botonge su Mawu, bou e'e Mawu nanibo u simpoto kau si sie. Kau e'e niteleri i Musa sarang l᷊al᷊ung ake, bou e'e ake e'e nalele, hakiu botonge inungang.

Su tampa e'e Mawu nangonggo u manga atorang si sire, dang se'e l᷊ai I Sie nanal᷊uka si sire. 26Angkung u Mawu, “Raringihiko pakapia-pia si Sia, dang koako apang ko tuhungang mapia; tuhukete kaul᷊i u parenta-Ku. Bou i kumu mukoa ko kere'e, i kumu ta sarung Daku ihukung dingang u manga sahinda ko Daku itimbo su taumata ngu Mesir. Ko Ia Mawu nupakaul᷊e ngi kumu.”

27Bou e'e i sire nasongo su tampa ko isigho Elim. Su se'e pia mapul᷊odua mata ngu ake dang Korma pitumpul᷊o su taunge. I sire nukema masandighi u ake e'e.

Nu geselecteerd:

SASUWANG 15: PLT

Markering

Kopiëren

Vergelijk