LIVALIZA 31
31
Liihi Litakatifu ku Vandu va Midiani
1Yahova yavolera Musa, 2“Haana mageri ku vandu va Midia kolondekana na gavakolera vandu va Isiraeli. Inyima wa umala kokora ndio ulakuza.”
3Kunangwa Musa yavolera vandu va Isiraeli, “Mwetegekere liihi kunangwa mwingiliri avandu va Midiani nu kuvaha mageri kolondekana na gavakolera Yahova. 4Mutumi avasaza 1,000 kutura mu vuli ihiiri ya vandu va Isiraeli kuzia mu vulwani.”
5Kunangwa vasaza 1,000 vatovolwa kutura mu vuli ihiiri ma nivaduuka 12,000 vetegekera vulwani. 6Musa yavatuma mu liihi hasi hu vwimiliri vwa Finiasi muyaayi wu musaalisi Elieza walindaa viju vitakatifu kandi visiliva viatumikirwa kuhaana vimanyiru. 7Vingilira vandu va Midiani kuli Yahova yaali nalagi Musa, kandi vita vasaza vosi, 8harara na vami vatano va Midiani: Evi, Rekemu, Zuri, Huri na Reba. Kandi vita Baalamu muyaayi wa Beori.
9Avandu va Isiraeli vagumira vakali na vana va Midiani, harara ni zing'ombe kandi mitugu jaavo, ni valanya vutugi vwavo 10kandi vasamba madaala gaavo manene na hokososa haavo. 11Vavugura vilaanye viosi viavaali ni vagumiyi harara na vahambe kandi mitugu, 12nivavileeta imbiri wa Musa na Elieza, harara nu muganda gwosi gwa vandu va Isiraeli. Vaali ni vaveeye hokososa mu kereremo cha Moabu ni vakambuka mugera gwa Jorodani kutura Jeriko.
Liihi Lirana
13Musa, Elieza, na vimiliri vandi vosi vu muganda gwa vandu va Isiraeli, vaatura hokososa ni vazia kwaganira vandu vi liihi.
14Musa yaali nu vutima na vimiliri vi liihi kandi miganda lwa virana kutura mu liihi. 15Yavateva, “Kigira ki muleki vakali vosi vave mwoyo? 16Mwizurizi vakali nivo valonda miigizu ga Baalamu kandi ni vakora vandu kuvula kuva vasuuvirifu ku Yahova ha Peori. Yicho nicho chaletela vandu va Yahova maduywa. 17Kunangwa kalunu mwiti vuli muyaayi kandi mwiti vuli mukali wagona nu mundu musaza, 18navuzwa muleke vakana harara na vakali vagima vave mwoyo. 19Kalunu kuvoosi umali kwita mundu naho wadira ku mukuzu, gamuduukira ave ichova wa hokososa ku madiku saba. Kulidiku lia kavaga nu kulidiku lia saba, mwitakase harara na vakali vamwagumila. 20Kuduuka mutakase kandi vuli kedonye chinguvu kandi kindu choosi chalombwa kutura ku kesero, vwoya vwimbuli noho musaala.”
21Musaalisi Elieza yavolera vasaza vaali niviilani kutura mu vulwani, “Yaga na malago ga Yahova amali kuhaana ku Musa: 22muvuguli izahabu, ifeza, mugasa, kivia, lidebe ne lisasi 23kandi vindu vindi viosi vivula kusambika vidodoke, ma uvitakase kulwukuvitila mumuliru. Vindi viosi vitakaswe na mazi gukutakasa. 24Gamuduukira mufuyi zinguvu zienyu lidiku lia 7. Maku, mulava avatakase, na mulavugilirwa kwingira hokososa.”
Kugavura vilaanye
25Yahova yavolera Musa, 26“Ivi harara nu musaalisi Elieza, na vimiliri vumuganda, muvalizi vindu viamwalanya harara na vahambe kandi mitugu. 27Mugavuli vindu via mwavugula mu vidonye vileng'ani viviri, kedonye kilala keve cha vandu vu vulwani, ne kedonye kindi keve chu muganda. 28Kutura ku kedonye cha vandu vu vulwani, muviikiri Yahova vusuuru, muvuguli muhambe mulala kutura ku vahambe 500, kandi kutura ku zing'ombe, zibunda, magondi kandi zimburi. 29Muvihaane ku musaalisi Elieza kuli vindu vio lugano lwa vio ku Yahova. 30Kutura ku kedonye kihanwa ku muganda gutigaye, muvuguli muhambe mulala kutura ku vahambe amusini, kandi muvuguli kutura ku zing'ombe, zibunda, magondi kandi zimburi. Muvihaane ku vandu vihiiri ya Levi avalindaa Lihema lia Yahova.” 31Musa nu musaalisi Elieza vakora kuli Yahova yalaga.
32Yivi ni vilaanye viavugulwa na vasaza vu vulwani komeeda ku viavivugulira: magondi ne zimburi 675,000 33zing'ombe 72,000 34zibunda 61,000. 35Vandu vosi harara na vakali vagima avaari ni vakikiri kumanya mundu musaza vaali 32,000. 36Kunangwa vugavuli vwa hagati ku vasaza vazia muliihi vulava; magondi ni zimburi 337,500 37kutura kuzio, 675 zilava vusuuru vwa Yahova. 38Avalwaani valanyora zing'ombe 36,000, kandi 72 kuzio, zilava vusuuru vwa Yahova. 39Zibunda 30,500 zilava zia vasikari, 61 kuzio, zilava vusuuru vwa Yahova. 40Kandi vakali vagima 16,000 valava ku vandu vu vulwani, 32 kuvo valava vusuuru vwa Yahova. 41Kunangwa Musa yahaana ku musaalisi Elieza vusuuru yivu kuli Yahova yaali nalagi. 42Kedonye cha vandu va Isiraeli vanyoola chalengana ne kedonye cha vasaza vi liihi. 43Kunangwa Musa yahaana kumuganda gwa vandu va Isiraeli magondi 337,500, 44zing'ombe 36,000 45zibunda 30,500, 46vahambe 16,000. 47Kutura ku vugavuli yivu, Musa yavugula muhambe mulala kutura ku vahambe amusini kandi mitugu kuli Yahova yalaga, nahaana ku vandu va Levi, avalindaa Lihema lia Yahova, kuli Yahova yaali nalagi Musa.
48Maku vimiliri vuvulwani vazia ku Musa 49ni vavoola, “Mwami, kuuvalizi vandu vi liihi ma konyooye sihaveeye ho kali mulala wagota mba. 50Kunangwa koletaa viju vialombwa kutura ku ifeza, minyororo, visambo, ebede, zinono, zinale zio kumukono via vuli mulala kukunyi yavugula. Kuvihaana ku Yahova vive kuli mitungu ji livamwoyo lietu, kunangwa Yahova aduuki kukukinga.” 51Musa na Elieza vavugura ifeza na viosi viali mu liiva liosi lie viju. 52Aviimiliri vatuliza zikiloguramu 200. 53Vuli musaza wu vulwani yavugula vilaanye viayaali navuguyi. 54Kunangwa Musa na Elieza vahiraa ifeza mu Lihema lia Yahova, kunangwa Yahova aduuki kukinga vandu va Isiraeli.
Nu geselecteerd:
LIVALIZA 31: LOGOOLI
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
©Bible Society of Kenya, 2019