TEALIAN 32
32
Yakub basa-basadia sulano napososuung tukon Esau
1Yakub banggadudukene kona ampakonan. Maka bubula komalaekat lubat pososuung tukon yana. 2Salataa Yakub kitayo yanila, yana bantile, “Naiya Mian Bisa nasandung,” tobikon doiya lipudoo sinombuikon Mahanaim.
3Lapa doiya Yakub mosumbolii bubula komo binitokon ampakon lolukiyo yana doi tano Edom sulano napososuung Esau, utuso langgongo. 4Yakub bantile doi yanila, “Bontiikene doi utusonggu langgongo Esau buno naiya, ‘Yaku Yakub, muata. Namalumbitan nia yaku lapamo dungol doi Laban. 5Dia budodoo yaku motooli saapi keledai, domba, mbembe tukon ata-ata. Yaku makapatu bilita doi kutuan, tukon moinikene daku tuan naikon sanaang.’ ”
6Salataa bobitokon abali koidan doi Yakub, yanila bantile, “Ikami lapamo taus doi Esau, Tuan utuso langgongo tukon diabudodoo yana ampakono doisumai tuuk pososuung Tuan. Yana lubat tukon sangkap kosakato komian.” 7Molongol doiya Yakub matakuto tuuno tukon molilimo. Maka mian badaang modaano polaing yana yana ebese lua kotambuno, bunomo lakon nadomba, nambembe, saapi tukon naunta. 8Yana pikikene, “Kalu Esau lubat tukon lobosiyo kotambuno tumbeno, maka kotambuno koluano tantu moola salamatene kobutongo.”
9Lapa doiya Yakub sambeang, “Oh Mian Bisa, kutauwa Abraham nangginaal, tukon tamanggu Ishak, ndongoliiyo yaku! Temeneno lapamo sumboliiyo yaku abali mule doi kutano tukon daku montolutuson. Temeneno paladandi naikon moatule sasaibino kolobo tukon monondok doi yaku. 10Yaku aki nateali talimayo sasaibino koseang tukon mololean molapamo Temeneno tudoikene doi yaku. Salataa yaku luwe pintosiiyo kopaisu Yordan Paisunobatango, yaku aki kumababa oioila tolongo tokon. Dia budodoo yaku abalimo lubat tukon lua komian tambuno nia. 11Yaku kabiyo tutuuno, salamatene yaku luwedoi utusonggu langgongo Esau. Yaku matakut inai-inaikene yana lubat lobosiyo tukon sakisaayo kami sasaibino, tukon boine tukon pau-pau. 12#Tea. 22:17 Neneeke baikon Temeneno lapamo paladandi naikon moatule sasaibino kolobo momonondok doi yaku tukon beena doi yaku badaang kokatulunan. Akiyo meeng komian momoola aite sabab badaang kai buno bone doi tobun bibilo.”
13-15Salataa bamoolokon idoo, Yakub mangala songobos kona iyayon-iyayon tuuk beekene doi Esau. Palasenoo buno: lua kosakato kombembe molukono, lua kolono kombembe langgilo, lua kosakato kodomba molukono lua kolono kodomba langgilo, tolukolono kounta modaano mosusuwo, kona pau polaing kona pau, sangkapolono kosaapi molukono, songulo kosaapi langgilo, lua kolono kokeledai molukono tukon songulo kokeledai langgilo. 16Yana ebe-ebese kona iyayon-iyayonoo teali bubula kotambuno maka suwe-suwele sinalakanggon doi naata meeng komian. Yana bantile doi yanila, “Ampakono lolukiyo yaku, tukon dagaiyomo sulano daano kopoatangan kotambuno momeeng tukon kotambuno bailonggon.” 17Yakub parentayo kona ata tumbeno, “Kalu utusonggu langgongo Esau pososuung tukon ikoo, tukon masadai, ‘Indee komu tuan? Yase doiyaa? Indee kotumbuno iyayon-iyayon komuyu mobabayodoo?’ 18Maka timbiliyo, ‘Yakub muata kotumbuno. Yana kapatuwo naiya salaku nasosubakon doi natuan Esau. Yakub muatadoo susuumu daano motunduwo kami.’ ” 19-20Doi naata koluano, kotoluno tukon sasaibino komian mobinotokon mouluse doiyayon-iyayonoo tambuno, binee parenta mopokakana. Sabab Yakub bapikil yana moola asi-asiyo Esau tukon sosubakonoo, tobikon kalu pososuungkai, Esau yase maafkanggene yana. 21Jadi yana makapatu loluk sosubakonoo, baikai yana susuungo moolomo doi nabasandungan.
Yakub sambeang doi Pniel
22Doi popokoo koidan Yakub bangun maka babayo kona boloki molua, lua naboloki piala tukon songulo meeng kona pau, pintosiiyo kopaisu Yabok Paisunobatango. 23Salataa pintasene yanila, yana abali tukon kapatuwo sasaibino kona lobo doi sembeleng. 24#Hos. 12:3-4 Bai yana dungol susuungo.
Maka lubat komalane meeng polukut tukon Yakub polong alani komodoa. 25Salataa mianoo lasayo baikon yana aki naikon namanaang doi napolukutanoo lalomo, Yakub inumbas doi popoolo, polong kopopoolo lolosuano telelesu. 26Maka domianoo bantile, “Sodiiyo yaku; naapa kai sumboto kooloyo.”
Yakub timbiliyo, “Yaku aki naikon kusodiiyo Tuan, alasene kalu Tuan balakaatiyo yaku.”
27“Indee kosambumu?” mianoo sadaiyo.
“Yakub,” kona potimbili.
28 #
Tea. 35:10
Mianoo bantile, “Kosambumu bolikono Yakub koidan. Ikoo lapamo polukut ko Mian Bisa tukon kobanggapi, tukon ikoo manaang; tobikon doiya sambumu teali Israel.”
29 #
Tan. 13:17-18
Yakub bantile, “Bantilemo Tuan sambuno.” Bai domianoo timbiliyo, “Aki napalaluu ikoo masadaikene kosambunggu!” Maka yana balakaatiyo Yakub.
30Doibundu Yakub bantile, “Yaku lapamo kitayo ko Mian Bisa duduso, tukon yaku daano motubo.” Tobikon doiya lipudoo sinombuikon Pniel. 31Doi tempo oloyomatano nasumbotan, Yakub tinggalemo ko Pniel, tukon yana lemato sabab kopopoolo lolosuano telelesumo. 32Polong diabudodoo katulunan Israel aki nakaane koiyayon sailo mosunggupiyo kopopoolo, sabab Yakub lapamo kana pongumbas doi popoluako.
Nu geselecteerd:
TEALIAN 32: LAIBGZ
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
