Proverbios 25
25
Íso kjuaxrexinkaon jína chronka Salomón
1Kja̱xin tíhi tsíndáchro Salomón, ndá kuánkí ti sin chꞌehe ixra̱ Ezequías, ti rey kuènté Judá:
2Tjikosayéheni Díos kixin jehe chꞌan tjasin chꞌan kaín nkehe ómó,
a̱ndá tjikosayéheni ti sin rey kixin jehe sin tjanchankí sin la ko tso̱nohe sin nkojín nkehe tsíkóhen.
3Ti nkehe tjenka̱yáxin ti sin rey la kohya nkexro nohe tíha
kixin tíha la éxi noixín ti nka̱jní la ko jiéxin ti chjasintajni.
4Takítsjehé ti kji̱ta̱ chónta ti plata
ndá xi̱kaha jína tsꞌóna ijnko nkehe tjete.
5Takítsjexián ti nkexro tjenka̱yáxinhña jína ti itjen ti rey
ndá xi̱kaha jína tsꞌe̱to̱an chꞌan.
6 #
Lc. 14:8-10. *Chrokjui̱nchejiéhya a̱sán ti itjen ti rey tꞌe̱to̱an
la ko chrókjuakꞌehya ti tsꞌejó ti sin tjetoan.
7Ícha jína chróchohén chróndáchrojia ti rey kixin ntiha chrókjuakꞌetja̱xian.
Ti náhí, la chrókósuáha ti si̱ntasataha ti rey nkayakon ti sin tjejó ntiha.
Ti tꞌíkuan ijnko nkehe nduáhya
8la jehya tjoka chrókjuichenka ti sin tꞌe̱to̱an
kixin ti ó tsjixin la noahña nkehe tso̱hen,
la ti tsondáchro íjnko chojni kixin chaxínhña xi̱kaha tíha, ndá imá tso̱suáha.
9Ícha jína chrókjuá ti chojni kjuajo̱nko̱a,
kjánchó chróchenkahya íso chojni ti nkehe kóhen.
10Kixin ti chrókuihin íjnko nkexro tíha la chrókósuáha
la ndá imá chrókjuanoá sin ti jaha
la í tsochóntehya sin kjuasàya ti jaha.
11Éxi ijnko manzana tsíkꞌónaxín oro síkjajin plata
mé xi̱kaha ti nkehe tsonixjehé ti nkexro imá ticháxi̱hin.
12Éxi ijnko kochꞌa̱ninko o̱ éxi ijnko nkehe náxrjón tsoteya sin tsíkꞌónaxín oro,
mé xi̱kaha ti kjuaxrexinkaon níxjehé ti nkexro tihin jína.
13Ti nkexro jína tjixín ixra̱
la éxi ti ìnta̱ ikin chrókꞌui chojni ti ña̱o imá sóa
la xi̱kaha tso̱chèxin a̱sén ti làmoé ti nkexro a.
14Éxi ti xri̱nto̱ la ko ti itji̱ chóntahya ichrin
mé xi̱kaha ti chojni nchehnke ndáchro tsjajon ichrén nkehe, a̱ndá chaxínhña tjajon.
15Ti tsonixjani nkojína la mé xi̱kaha tsjìinxín ti kjuanínkaon kuènté ti sin tꞌe̱to̱an,
la ti imá jína tsonixjani la tsitekaon ti sin imá jie̱he.
16Ti tsꞌitjá itsje̱n kotsje̱nta la chrókjontehya imá yeé;
kixin ti sinte yeé la tso̱síña̱ha.
17Nkoya̱xónhña chrókjuia ndo̱e ti nkexro choxián,
ti náhí la tso̱chji̱hi̱ sin la tso̱nínkakohan sin.
18Ti nkexro tjontá ti nkexro tꞌiton
la éxi ijnko espada xi̱kaha ncheníexín sin ti nkexro a.
19Ti chóxini ijnko chojni a̱ndá tjinki̱tsahyani sin ti siín ijnko kjuaxikaon,
la tíha mé éxi chróchóntani ijnko ñenoni imá tjoté, o̱ éxi ijnko to̱téni tsíchjenjin.
20Ti chrótsje̱he̱ni ijnko isón ti nkexro tꞌává
la éxi chrókuikjanjini vinagre ti tsíchrítꞌo̱ o̱ éxi
chrókuakitsjeheni ijnko chojni ti ika tꞌitsáte ti ña̱o imá ikin.
21 #
Ro. 12:20. *Ti tꞌenxín kjinta ti nkexro nínkakohan, la chje̱hé nkehe sinie
la ti tꞌenxín ìnta̱ la chje̱hé ìnta̱ itsꞌi.
22A̱ndá ti xi̱kaha si̱chꞌe la tso̱suéhe̱ sin,
a̱ndá Itꞌéni Díos mé tsje̱nka̱ha̱ chꞌan.
23Éxi ti xri̱nto̱ tji̱xi̱n norte nchekꞌaniá ichrin,
mé xi̱kaha ti chojni tꞌándaxíhi̱n kícho la tjasin kjuanínkaon.
24Ícha jína jahuá chrókjuakꞌe ijnko chríhnko nchia,
a̱ndá kanhñó jína chrókjuakꞌeko̱a ijnko tjan imá jie̱he nkaxehen ijnko nchia imá náxrjón.
25Éxi ìnta̱ náxrjón ikin chrókꞌui ti nkexro ikꞌuén ìnta̱,
mé xi̱kaha ti chrókuihini kixin jína tjejó ti nkexro sákjuí ikjín.
26Éxi ìnta̱ tjóá tónkojié ti ìnta̱ kji̱ta̱,
mé xi̱kaha ti chrókꞌuiton ti ijnko chojni jína ti chojni ixri ti nti̱a jínahña.
27Ti chrókjonte yeé itsje̱n kotsje̱nta la jehya jína tíha
la ko kja̱xin jehya jína ti ijnko chojni chrókjueyá jehó ti kjuachaxin kixin a̱ntsí chrókꞌue̱to̱an.
28Éxi ijnko chjasin chóntahya ti tja̱tꞌo̱ tsíka̱ntatjen
mé xi̱kaha ti nkexro noehña tsꞌe̱tue̱hen a̱sén.
Nu geselecteerd:
Proverbios 25: poeNTplus
Markering
Delen
Vergelijk
Kopiëren
Wil je jouw markerkingen op al je apparaten opslaan? Meld je aan of log in
© 2016, Wycliffe Bible Translators, Inc. All rights reserved.