Populaire Bijbelverzen uit Romete 8

Pathian ii tupna taw a sam sa ahi ama a itte atu in na theampo Pathian in a phabel in piangsak hi.

Banghang ziam cile ama hong itna panin, bangma in hong khen thei ngawl tu hi ci in maan takin ka mu hi: thina ahizong nuntakna ahizong, vantunglalangte ahizong, vantung ukna le thahatna nei dangte ahizong, tu hun hikale mailam hikale, leitung a saangbelna mun ahizong, leinuai a thuk belna mun ahizong, bitphua sa a minpiang bangma in ih Topa Jesus Christ sungah ih neisa ahi Pathian hong itna taw hong khen zo a om buatu hi.

Tua bangma in eite in bangza in tha zawngkhal hi ka leang, eite hong hu tu in Thaa hong pai hi. Banghang ziam cile eite in thu ih ngetzia tu ih he bua hi; kammal taw a kilo thei ngawlte tauna taw Pathian tungah Thaa in hong maangkaasak hi.

Hi teng zawkciangin ih son tu, bang om lai tu ziam? Pathian ei sangah hong pang le akua in eite hong langpan thei tu ziam?

Tu in Christ taw pumkhat in a nungtate atu in kipuavawkna a om bua hi.

Mihing pianzia in na uksak uh le thina piang a; Thaa in na uksak uh le, nuntakna le thinnopna piang hi.

Hong itpa tungtawnin eite in hi thute theampo sungah zawna kicing ih nga hi!

Tu hun a ih thuakte in hong kilangh pheang tu, a minthanna taw kiteengat thei ngawl hi.

Tua ahile Christ ii eite hong itna panin, akua in hong khen thei tu ziam? Ngimna, haksatna, vawtsiatna, ngilkialna, zawnna, lau huaina, thinate khat pawpo in, hong khen thei tu ziam?

Tuaciangin mihingte thinsung a mu thei Pathian in Thaa ii khua ngaisutnate he hi; banghang ziam cile Thaa in Pathian tungah a mite atu in ama dei babangin maangkaasak hi.

Pathian Thaa ii lampuina a nga mihing peuma Pathian ii tate ahi uh hi.

Mihing pianzia bangin a nungtate thinsung sia cii le sa deina in uk hi. Thaa ii sawl bangin a nungtate thinsung sia Thaa ii deina in uk hi.

Pathian in hong langpan ngawl het tu hi. Ama in a Tapa takpi khoaikhe ngawlin, ei atu in hong pia hi! A Tapa ngawngawn hong pia ahile — na theampo a thongin hong pia ngawl tu ziam?

Pathian Thaa in eima thaa taw kikopin, Pathian ii tate ih hina tetti in hong pang khawm hi. A tate ih hi zawk nungsang a mite atu a khealsia thuphate ih lua tu a, Christ atu a Pathian ii a koi nate zongh ih lua tu hi; banghang ziam cile Christ ii thuakna ih thuakpui le a minthanna zongh ih lua tu hi.

Tua ahiciang mihing khat sia mihing pianzia in a uk le Pathian ngal suak hi; banghang ziam cile ama in Pathian thukham ni ngawl hi, a tatakin ni thei ngawl hi.

A kibitphua sa theampo in Pathian ii tate sia akua bang teng hi tu ziam ci in hong kilaak tu kaal ngakla in om uh hi.

Banghang ziam cile nausuak tun a nat bangin tu hun dong ma bitphuasa theampo in na a sakna taw tau in om hi ci ih he hi.