Populaire Bijbelverzen uit ROMA 12

Delen

Teako amminawangngi ri atorang-atoranna anne linoa. Boli'mi kamma na Allata'ala ampa'jari berui sipa'-sipa' niaka ri kalennu, sollannu akkulle tappinra. Lanri kammanapi anjo nampa akkulle nuasseng apa Nakaerokanga Allata'ala – iamintu apa nikanaya baji', siagang sukkuka ganna'na, kammayatompa nikarannuanga ri atinNa Allata'ala.

Sikamma sari'battangku! Sanna' baji'Na Allata'ala mae ri katte. Iaminjo saba'na nakupala' dudu ri kau ngaseng sollanna nupassareang sikontu batangkalennu a'jari koro'bang attallasa', siagang matangkasaka, kammayatompa nikarannuanga ri atinNa Allata'ala. Mustina kammaminjo caranu anynyomba mae ri Allata'ala.

Musti rannui pa'mai'nu ma'minasa ri Batara; sa'barakko lalang kasusaanga, siagang teako lanrei appala' doang.

Teako pa'biangi kalennu nibeta ri kaja'dallanga, passangalinna musti nubetai anjo kaja'dallanga siagang panggaukang baji'.

Musti massing sikamaseang duduko sangkamma tau assari'battanga lalang se're balla'; kammayatompa massing sipirioloiko assare sallang.

Angngamaseangko siagang ci'nong pa'mai'. Musti nukabirisi gau' ja'dalaka, siagang anna'gala' jarrekko mae ri apa-apa bajika.

Usahakangi sollannu akkulle assiama' ngaseng siagang taua lalang tallasa'nu.

Sikamma sari'battangku! Tea' laloko a'balasaki ri kaja'dallanna taua mae ri kau; boli'mi kamma na Allata'ala ampabattui hukkunganna. Nasaba' nia' tattulisi' lalang ri Kittaka angkanaya, “Nakana Batara, iNakkemi lambalasaki panggaukanna taua. INakkemi langhukkungi.”

Rajengko anjama-jama. Teako kuttui. Anjamako untu' Batara lalang sumanga' battua ri RohNa Allata'ala.

Le'ba'ma' Nasare passare malammoro'Na Allata'ala. Lanri kammanami anjo nakupakainga' ngasengko angkanaya: Teako pakatinggi dudui kalennu battu ri siratannaya. Parallui nupakatuna pa'mai'nu nampa nuparessa rolong kalennu; massing-massing tau parallui naparessa kalenna situru' pakkulle natarimaya battu ri Allata'ala lanri tappa'na ri Isa.

Punna nia' tau a'gau' ja'dala' mae ri kalennu, teako balasaki siagang kaja'dallang. Gaukangi apa nakanaya ngaseng taua baji'.

Massing assiamakko siagang assibajikiko. Teako tinggi langgai, mingka pakatunai kalennu sangkamma tau tunaya. Teako angkanai kalennu cara'de' dudu ri sitojennaya.

Jari, punna cipuru' musunnu sarei kanre; na punna turerei, sarei je'ne' inung. Nasaba' punna kamma anjo panggaukannu mae ri ia, ma'nassa latu'guru' siri'-siri'mi anjo musunnu.

Pappalakkangi barakka' mae ri Allata'ala tau pallaka panggaukanna mae ri kau. Pappalakkangi barakka', tea' laloko sarei kana-kana pattunra. Amminawangko rannu siagang tau rannua; siagang amminawang tongko angngarru' siagang tau angngarruka.

Tulungi parannu tu Karisteng ampa'gannaki kaparalluanna, siagang pakate'nei atinnu antarimai julu tappa'nu tenaya nuassengi ke'nanga antama' ri balla'nu.

Anjo batangkalea jai anggotana. Massing-massing anggota batangkalea nia' ngaseng jama-jamanna. Kammatommi anjo ri katte ngaseng. Manna nakijai, mingka a'jari se're maki' batangkale lanri assileo' maki' lalang ri Isa Almasi. Siagang nipasisambung ngaseng maki' a'jari anggota-anggota lalang ri se'rea batangkale.