भजनसंग्रह 107:17-32
भजनसंग्रह 107:17-32 नेपाली नयाँ संशोधित संस्करण (NNRV)
कोही-कोही आफ्नै विद्रोही चालले गर्दा मूर्ख बने, र आफ्नै अपराधको कारण विपत्तिमा परे। सब भोजनहरू तिनीहरूलाई अमन भयो, र तिनीहरू मृत्युको मुखसम्म पुगे। तब तिनीहरूले आफ्नो सङ्कष्टमा परमप्रभुको पुकार गरे, र उहाँले तिनीहरूलाई तिनीहरूको आपद्बाट छुटाउनुभयो। उहाँले आफ्नो वचन पठाउनुभएर तिनीहरूलाई निको पार्नुभयो, र तिनीहरूलाई मृत्युको खाड़लबाट उकास्नुभयो। तिनीहरूले परमप्रभुको अचूक प्रेमको निम्ति, र मानिसहरूप्रति उहाँका आश्चर्य कामका निम्ति उहाँलाई धन्यवाद चढ़ाऊन्। तिनीहरूले धन्यवाद बलि चढ़ाऊन्, र हर्षका गीतहरूमा उहाँका कार्यहरूको वर्णन गरून्। कोही-कोही जहाज चढ़ी समुद्रमा गए, तिनीहरू महासागरमाथिका व्यापारी थिए। तिनीहरूले परमप्रभुका कार्यहरू देखे, सागरको गहिराइमा तिनीहरूले उहाँका आश्चर्य कार्यहरू देखे। किनभने उहाँले आज्ञा गर्नुभयो, र प्रचण्ड आँधी चलाउनुभयो, जसले सागरका छालहरू उठाए। तिनीहरू आकाशसम्मै चढ़ेर गए, र फेरि सागरको गहिराइमा झरे, तिनीहरूको क्लेशमा तिनीहरूको साहस गलेर गयो। तिनीहरू मतवालाजस्तै रन्थनिएर धरमराउँदैथिए, र तिनीहरूको अक्कल गुम भयो। तब तिनीहरूले आफ्नो सङ्कष्टमा परमप्रभुको पुकारा गरे, र उहाँले तिनीहरूलाई तिनीहरूको आपद्बाट छुटाउनुभयो। उहाँले आँधीलाई शान्त गराउनुभयो, र सागरका छालहरू स्थिर भए। आँधी शान्त भएपछि तिनीहरू खुशी भए, र उहाँले तिनीहरूले चाहेका बन्दरगाहमा पुर्याउनुभयो। तिनीहरूले परमप्रभुको अचूक प्रेमको निम्ति, र मानिसहरूप्रति उहाँका आश्चर्यका कामका निम्ति उहाँलाई धन्यवाद चढ़ाऊन्। तिनीहरूले मानिसहरूको समुदायमा उहाँको तारीफ गरून्, र धर्म-गुरुहरूको सभामा उहाँको प्रशंसा गरून्।
भजनसंग्रह 107:17-32 पवित्र बाइबल, नेपाली समकालीन संस्करण (NCV)
कोही-कोही आफ्ना विद्रोही चालहरूले गर्दा मूर्ख बने, र आफ्नै अधर्मका कारण कष्ट भोगे। तिनीहरू सबै प्रकारका खानेकुराहरूदेखि वाक्कै भए, र मृत्युका ढोका नजिक पुगे। तब आफ्ना कष्टहरूमा तिनीहरूले याहवेहलाई पुकारे, र उहाँले तिनीहरूलाई तिनीहरूका सङ्कष्टहरूबाट बचाउनुभयो। उहाँले आफ्नो वचन पठाउनुभयो, र तिनीहरूलाई निको पार्नुभयो, तिनीहरूलाई चिहानबाट छुटाउनुभयो। उहाँको अचुक प्रेम र मानिसहरूप्रति उहाँका अद्भुत कार्यहरूका निम्ति तिनीहरूले याहवेहलाई धन्यवाद देऊन्! तिनीहरूले धन्यवादका बलि चढाऊन् र हर्षका गीत गाएर उहाँका कार्यको वर्णन गरून्! कोही-कोही जहाजहरूमा चढी सामुद्रिक यात्रामा गए; तिनीहरू महासागरका व्यापारीहरू थिए। तिनीहरूले याहवेहका कामहरू देखे, गहिरो सागरमा तिनीहरूले उहाँका अद्भुत कार्यहरू देखे। किनकि उहाँले आज्ञा गर्नुभयो, र प्रचण्ड आँधी चल्यो, जसले गर्दा समुद्रका छालहरू माथिसम्म उठे। छालहरू आकाशसम्म नै उठे, र फेरि सागरको गहिराइहरूमा झरे; यस्तो जोखिममा तिनीहरूको साहस हराएर गयो। तिनीहरू मदिराले मातेको मानिसझैँ धरमरिँन्थे; तिनीहरूका सबै सिपहरू बेकार साबित भए। तब आफ्ना कष्टहरूमा तिनीहरूले याहवेहलाई पुकारे, र उहाँले तिनीहरूलाई तिनीहरूका सङ्कष्टहरूबाट छुटाउनुभयो। उहाँले आँधीलाई शान्त पार्नुभयो; समुद्रका छालहरू साम्य भए। आँधी शान्त हुँदा तिनीहरू खुशी भए; र उहाँले तिनीहरूलाई तिनीहरूले इच्छा गरेको बन्दरगाहमा पुर्याउनुभयो। उहाँको अचुक प्रेम र मानिसहरूप्रति उहाँका अद्भुत कार्यहरूका निम्ति तिनीहरूले याहवेहलाई धन्यवाद देऊन्! तिनीहरूले मानिसहरूको समुदायमा उहाँलाई उच्च पारून्, र प्रधानहरूका सभामा उहाँको प्रशंसा गरून्!
भजनसंग्रह 107:17-32 पवित्र बाइबल (NERV)
कतिपय मानिसहरूले आफ्ना पापहरू र दोषहरूद्वारा आफैंलाई मूर्ख बनाए। उनीहरूले गरेको दुष्ट कामको निम्ति उनीहरूले कष्ट भोगे। ती मानिसहरूले खान पनि रूचाउँदैनन् अनि तिनीहरू प्रायः मर्छन्। तिनीहरू सङ्कटहरूमा थिए, यसैले सहयोगको निम्ति परमेश्वरलाई गुहार मागे र उहाँले तिनीहरूलाई ती सङ्कटहरूबाट बँचाउनु भयो। परमेश्वरले आज्ञा गर्नुभयो र तिनीहरू निको भए। यसकारण ती मानिसहरू चिहानबाट बाँचे। परमप्रभुको अनन्त प्रेम अनि मानिसहरूका निम्ति उहाँले सृजना गर्नु भएको आश्चर्यकामहरूको निम्ति परमप्रभुलाई धन्यवाद देऊ। उहाँप्रति बलिदान स्वरूप उपहारहरू अर्पण गर अनि उहाँका कार्यहरू प्रति धन्यवाद प्रदान गर। खुशी भएर उहाँले गर्नु भएका कार्यहरूको बारे भन्दै जाऊ। कतिपय मानिसहरू जहाजमा तरेर समुद्र पारी पुगे। तिनीहरूका कर्मले नै तिनीहरूलाई महासागर पार तार्यो। ती मानिसहरूले परमेश्वरले के गर्न सक्नु हुन्छ भन्ने कुरा देखे। तिनीहरूले समुद्रमा गर्नु भएको उहाँको अद्भूत कामहरू देखे। परमेश्वरले आज्ञा गर्नुभयो, अनि प्रबल बतास बहन थाल्यो। छालहरू उच्च भन्दा उच्च हुँदै गए। ती छालहरूले तिनीहरूलाई उठाएर आकाशमा पुर्याए अनि गहिरो समुद्रमा झारिदिए। तूफान एकदम भयङ्कर थियो ती मानिसहरूको साहस हराएर गयो। तिनीहरू धरमरिरहेका थिए अनि मातेको मानिस सरह पछारिए, माझीको रूपमा तिनीहरूको कुशलता बेकार भयो। तिनीहरू सङ्कटहरूले घेरिए, यसैकारण तिनीहरूले परमेश्वरलाई गुहार मागे। अनि उहाँले ती सङ्कटहरूबाट तिनीहरूलाई बँचाउनु भयो। परमेश्वरले समुद्र तूफानलाई रोक्नु भयो। अनि छालहरूलाई शान्त पार्नुभयो। माझीहरू खुशी भए किनभने समुद्र शान्त थियो। अनि परमेश्वरले तिनीहरू जहाँ जान चाहन्थे त्यहाँ जोगाएर लैजानु भयो। उहाँको प्रेम र मानिसहरूको लागि उहाँले सृजना गर्नु भएको आश्चर्यकामहरूको निम्ति परमप्रभुलाई धन्यवाद देऊ। महासभामा परमेश्वरको प्रशंसा गर। बूढा-प्रधानहरू सँगै भेला भएको बेला उहाँको प्रशंसा गर।
भजनसंग्रह 107:17-32 सरल नेपाली पवित्र बाइबल (सरल नेपाली)
कति जना आफ्नो पाप र दुष्टताको कारणले कष्टमा परेका मूर्खहरू थिए। तिनीहरू खाना हेर्न पनि नसक्ने भएका थिए र मर्न आँटेका थिए। तब तिनीहरूले परमप्रभुलाई आफ्नो कष्टमा पुकारे र उहाँले तिनीहरूलाई सबै दु:ख-कष्टबाट बचाउनुभयो, आफ्नो आज्ञाले उहाँले तिनीहरूलाई निको पार्नुभयो र मृत्युदेखि बचाउनुभयो। तिनीहरूले परमप्रभुलाई उहाँको अनन्त प्रेमको निम्ति र उहाँले तिनीहरूका लागि गर्नुभएका उदेकका कामहरूका निम्ति धन्यवाद दिनैपर्छ। बलि चढाएर तिनीहरूले उहाँलाई धन्यवाद चढाउनुपर्छ र आनन्दका भजन गाएर उहाँले गर्नुभएका सारा कामको बारेमा भन्नुपर्छ। कति जना महासागरमा जहाजहरू चलाएर गए र समुद्रमा आफ्नो जीविका चलाउने कमाइ गरे। परमप्रभुले के कसो गर्न सक्नुहुन्छ, तिनीहरूले देखे, समुद्रमा उहाँका उदेकका कामहरू तिनीहरूले देखे। उहाँको आज्ञाले एउटा तेज बतास बग्न सुरु भयो र पानीका लहरहरू उठ्न थाले। जहाजहरू हावामा माथि उचालिन्थे र समुद्रमा गहिरोसम्म डुबिजाँदथे। यस्तो विपत्तिको समयमा मानिसहरूले साहस हराए। मातेका मानिसहरूझैँ तिनीहरू लरबरिन्थे र लड्थे, तिनीहरूको केही सीप चलेन। तब तिनीहरूले परमप्रभुलाई आफ्ना कष्टमा पुकारे र उहाँले तिनीहरूलाई सबै दु:ख-कष्टबाट बचाउनुभयो। उर्लंदो आँधीलाई उहाँले थाम्नुभयो र पानीका लहरहरू शान्त भए। सबै शान्त भएको हुनाले तिनीहरू खुसी भए र उहाँले तिनीहरूलाई कुशलसित तिनीहरूले चाहेका बन्दरगाहमा ल्याइपुर्याउनुभयो। तिनीहरूले परमप्रभुलाई उहाँको अनन्त प्रेमको निम्ति र उहाँले तिनीहरूको लागि गर्नुभएको उदेकका कामहरूको निम्ति धन्यवाद दिनैपर्छ। मानिसहरूका सभामा तिमीहरूले उहाँको महान्ताबारे भन्ने गर्नुपर्छ र अगुवाहरूका सभाघरमा उहाँको प्रशंसा गर्नुपर्छ।