Janja 15
15
Otohi a mo sasi ŋa Antyose a Siri
1Abalaha ake awi Jude ma osuriha Antyose a Siri, bo ayisihi baana ma anguhu ndi: «Ove asi be sasi mva ekele e Moyise meduha. Vwa kali, be leka buuna ovuuha ni.» 2Ekemi evi o mpaniŋi e bo bɨla Pole ŋa Barnabase. Ŋa otohi onini ovi o mpaniŋi baari baa. Aduhi ndi Pole bɨla Barnabase na ebi baari eke aje Jerusaleme. Bo atiha jaa jya na antuma bɨla akuuru mo okuha. 3Ŋa okuha Antyose ompi bo biibi e bo ma aki na kaama o jo, mo oje na jo opiinga. Bo avuuli Finisi bɨla Samari. Bo aya maduha osuumbu a baari ma ali ka Ajife ni mayalihi Nkʉmu. Ŋa baana ma anguhu aso aya o nca oswere bo mini. 4Bo awasihi Jerusaleme, okuha bɨla antuma na akuuru ayambi bo. Bo aduhi bo maami a Njyami asi o mpaniŋi e bo. 5Ŋa Afarisi ake ma amayalaha Nkʉmu aya maduha ndi: «Ove asi baari ma amayalaha Nkʉmu, ma ali ka Ajife ni sasi, aduhi bo ma onyiime ekele e Moyise.» 6Antuma bɨla Akuuru a mo okuha avuniŋi mo otuba ancwo o jaa jya. 7Bo amana owobo kuna, Pyere oyahi mbari ndi: «Baana ma anguhu, be leyaa mbɨri Njyami amabiha na oswolo me o mpaniŋi e be. Mo bu ndi baari ma ali ka Ajife ni ayuha Ncya e Mve, ayalaha Nkʉmu. 8Njyami oyaa etima e baari. Nde omaduha ndi nde ayamba baari ma ali ka Ajife ni. Nde se ompa bo Oduduma Santi mva saabe. 9Njyami aka mpamaŋa reeŋe mpaniŋi e bo bɨla saabe ni. Nde omacuka etima e bo, obila bo amayalaha. 10Ŋa be lesoŋo Njyami mo oma? Be lesaha olehe olemi o yula alwoni ma eli, ŋa a taara a saabe ŋa saabe anku, leka buuna osaara ni? 11Okoroho saabe lemayalaha mbɨri, saabe lema vuuha mva bo ŋa mo mpolo e Jesu a Nkʉmu.»
12Okuha aso oya pi. Emana bo aya ma yuha Barnabase bɨla Pole mawobo, maduha andiimi bɨla epuna e Njyami asi o ngula bo, mpili e baari ma ali ka Ajife ni. 13Bo amana owobo, Jake oyahi mbari ndi: «Baana ma anguhu leyuha me! 14Simyon okini ma oyubiha saabe osuumbu a Njyami asi baana oswolo baari a nde o mpaniŋi e baari ma ali ka Ajife ni. 15Maami ma awobi a mbari e Njyami maduhi maa, amivunuŋa bɨla maami ma. Kya obila ma amateende ndi:
16“Amana maa aso, me eje oya na avuriha.
Ma ovuriha ocwa njo e Davide eki emacalaha,
me evuriha osiila yo,
me eje ovuura yo mo otele.
17O ŋa baari a yula ncye maamo aso ma aje osaha Nkʉmu.
Ee baari aso a me ecwoli ma aka a me.
Mono maami a Nkʉmu aduha,
18nde oma sa maami a baari ma aki ma amayaa na kala.”»
19Jake ovurihi oduhi ndi: «Leyuha ecimiŋi e me. Leka swesehe baari ma ali ka Ajife, ma amakalaha mpili e Njyami ni. 20Leteende bo osaangumu mbɨri: “Leka jyaha anyama masobo baari, ma amampa a njyami mo oca oca vwoŋi ni, lekaa syaha maami ma abi ni. Leka jyaha anyama makini ocebe nkii, na makini na tohi ni.” 21Ma asi baana kala, baari aki amabiha na otooso ekele e Moyise nca enguundu, obila maliiraha mo nca anjo ma vwonoŋo me ecuhu ma awuumaŋa.»
Antuma bɨla akuuru mo okuha atumi osaangumu Antyose a Siri
22Ŋa antuma bɨla akuuru mo okuha na Okuha aso, aswoli antuma o mpaniŋi e bo. Mo oje Antyose bɨla Pole na barnabase. Bo aswoli Jude ma acwoloho o Barasabase na Silase, baari ma ali na onkʉmu o mpaniŋi e baana ma anguhu. 23Ampi bo osaangumu kya ndi: «Antuma bɨla akuuru mo okuha ma awooso baana ma anguhu ma ali ka Ajife ni, ma kaha ma Antyose a Siri na Silisi. 24Bisi lemayuha ndi baari a bisi amaya na ampa be okʉrukusu, amasa be ongwo o mbari e bo. Ŋa bisi leka tuma bo ni. 25Kya obila o bisi aso leswoli baari mo otuma na e be. Bo maya bɨla andihi a saabe, Barnabase bɨla Pole. 26Bo amampa lebihi le bo o janja e Jesu Krisi a Nkʉmu a saabe. 27Ŋa bisi letuma be Jude bɨla Silase, mo oduha be bo anku maami a bisi leteendi nca osaangumu. 28Mo oma, na Oduduma Santi na bisi i maluusa be olemi okɨma ni. Ŋa ove be lenyiimi ekele ma amaduha ndi ove anyiimi. 29Leka jyaha anyama ma amampa vwoŋi anjyami mo oca oca ni. Lekaa jyaha anyama ma kini na tohi na ma nkini o cebe nkii ni. Be lekaa syaha ompala ni. Be onyiima maami maa, be lesi yemiŋi. Ŋa leya vwa!»
30Pole bɨla Barnabase, na Jude bɨla Silase ayeni Antyose a Siri bo ato. Bo se akusihi baari ma amayalaha Nkʉmu, bo ampi bo osaangumu. 31Aliiri osaangumu, bo aya o nca oswere obila co oyaasi bo. 32Juda bɨla Silase bo anku aki awobi a mbari e Njyami, mawobo na baana ma anguhu kuna, ma oyaasa bo, mo bu ndi oyalihi o bo oyama. 33Bo aci ecuhu o biri jya. Emana baana ma anguhu na bo ndi lejyehe nca oduusu. Jude bɨla Silase avurihi mpili e baari ma tumi bo. [34Ŋa Silase okuri ndi nde asiila ŋa.]#15.34 Nca esaangumu ma emo amateende ndi Silase oyalihi oka o ŋa. 35Pole bɨla Barnabase asiili ma Antyose bɨla abuha akɨmakuna. Bo mayisiha, bo se ma tooso mbari e Nkʉmu.
Pole bɨla Barnabase akabi anjila
36Ecuhu eyira, Pole na Barnabase ndi: «Cwe levuriha na okye baana ma anguhu, nca enguundu eso leyiri na otooso mbari e Nkʉmu, lemono osuumbu eli bo.» 37Barnabase asaha obira Jan ma cwoloho o Marke. 38Ŋa Pole acimiŋa ndi i ma buuna obira mvuuru amabiha na onyila bo ni. Obila nde aki omabiha na ocyehe bɨla bo nkara Pamfili, nde se aka majyehe na ojanja bɨla bo ni. 39Pole bɨla Barnabase aka yuha abuha ni, bo se akabi anjila. Barnabase oyahi Marke, bo akumi o mbuungu mo oje na Sipre. 40Pole oswoli Silase. Baana ma anguhu avwoni o nde, mo olehe nde o mpolo e Nkʉmu. Nde se oyeni. 41Pole otini Siri bɨla Silisi, mo oje na ompa ekuha mpari.
अहिले सेलेक्ट गरिएको:
Janja 15: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
