He Ekeny Gál Alb Fimiká 12
12
Máá ˈgasso-, urru-, Waaˈgietká Bétiro ˈbíl hiiginká yé gáá ˈdeey
1Bár kinaal máá kansich Heróˈde gál Kiristoká ˈbáá tikiˈd hiigidhe, giri gáál he ki ekemeyoká. 2Aalé mu ˈdéé mure, Yákob giri Yuána nyárléká gaalí faaˈd ki yies. 3Mu héél gál Yuuˈdi ki mídhab argeká mu úba geđi Bétiro gáál ali ˈdú fie, giri mú gaalí ká ˈgiiliˈgawká. Hééllá ˈjila balashalle máá hí maat fafuo-, mánká muí gaa ekey. 4Mu Bétiro ˈgiliˈgayká yuoylé met hí afur-, hol ká aafure mare mú gíl gaa kaay, giri gaal mú ˈbíl hiiginká gaa ˈdeˈdeenká. Heróˈde hát he fedeká ˈjila máá ˈgasso-, urru-, Waaˈgietká hí gáál ˈdug gaa nadheká he béenyka, Bétiro gálaat met ká egeyká he fede. 5Aalé gaal Bétiro ˈbíl hiiginká gaa kaay, tá gál giri Yíésu iiy yieká íín tágo he mú Waag ki vivite.
6Chúúré giri onnônyka búrléká Heróˈde mú gálaat met ká egeyká, Bétiro íín yuoy naama he toom gaa iife, gaalí ki hiigidhe. Hé gaalí gáál hol ki hiigidhe kinaallá he nyárugó. ˈBíl afle úba yuoyó hí ˈdeˈdeenne. 7Aalé toomareka máá ˈgasso-, urru-, Waaˈgietká đo ˈbíl hiigin kinaal hurt yé gáá ˈdie, ˈbíl geer hí gaa edhdhey. Aalé máá urru kinaal Bétiro kiisie, kieye, Đo le gaa keʼ, mú yie. Nyarugano giriká đo mú gil gaa okoˈde.
8Aalé máá ˈgasso-, urru kinaal mú geey, kieye, Đafar híso, koiy ˈgas fúo, yie. Bétiro đo hé kinaal tág kodhdhe. Aalé mu geđi kieye, Gielkú ˈdu gáá múro, ye el gáá véer, mú yie. 9Aalé Bétiro máá ˈgasso-, urru kinaal el gaa veere. Mu hé máá ˈgasso-, urru kinaal hí ekemeyká hát ˈdúwaká hé moonnoy, he amáto he yegie. 10Gaal gál ˈbíl hiiginká ˈdeˈdemeká gállé erkobká ubaa gál ki naamaká láá nadhe. Gaal kár síbil gaalí é ki seseenká álle ká nyuoreká kar đo tákámle af hí eiy ˈdie, gaal kar nadhe. Aalé gaal ˈgierich á níínni mare ˈgar kat kat yieká máá giri ˈgasso-, urruká đo mú hay, ali gaa sedhe.
11Bétiro me hí hol ká nadheká kieye, Yáá aalé he hát ˈdúwaká kimite. He ta Máá Guđoká máálle ˈgasso-, urruká ali gáá kaay, mu ye gíl geer Heroˈde ubaa hé mákárta gál Yuuˈdi hí ye ki ekemeyoká ye gáá bisie! muí yie. 12Aalé mu héél kimiteká mu đo María ˈbílle sedhe. (María he Yuána giri Márko léká ˈjiellé.) Bétiro hátlé lalayká gál burnayká ˈbíl Maria kinaal hol ˈdú sedhe, he gaa ije, Waag gaa vivite. 13Aalé Bétiro ˈbíl nyáláárle kárle af ˈdoy. Aalé ini gedech gaalí Róóˈda yegie mare karaf ˈdú siete. 14Aalé ini Bétiro af kimisateká geer hí súm gaa meedhe, hátlé karaf ma fúrinyká đo geđi hol gaa suoyye, ˈbíl ˈjiiyye, kieye, Bétiro karaf gaa yaal! chie. 15Gaal ini yiete, kieye, Mée ko ˈjíéˈde? yie. Aalé ini gon điite-, mé gaa ˈdoyye-, gaalí argeká gaal kieye, He taalle mú máálle ˈgasso-, urruká máámaʼ? gaalí yie.
16Bétiro íín hé karaf ˈgul ma hâny. Aalé gaal karaf fure-, mú argeká gaal birge, he af ˈdabe. 17Bétiro gáál gíl ki geey, giri gaal shab yegetká. Mu hát Máá Guđoká hí ˈbíl hiiginká yé gáá ˈdeeyká gáál geey. Aalé mu kieye, Yákob ubaa gál nyaaramká ˈdeenyééllá geeyyíe, yie. Mu đo ál kinaal gaa kie, ál éíy taaka mé nie.
18Aalé biiy ka biˈdeká yuoy ˈbíl hiigin kinaal ˈdeˈdeenneká biiy hí ˈdú ˈdeˈdernete, kieye, Hobaʼi! Bétiro ále nadhe? gaalí yie. 19Aalé Heróˈde gálaat ali fie, giri gaal Bétiro hol gaa ˈgeˈgedhoká. Gaal mú ˈdabeká Heróˈde yuoy ˈbíl hiiginká ˈdeˈdeenneká ˈdéé ki iđie, gáál ˈdéé ˈdú moy. El waas léká mu yuoylé éíy taaka geey, kieye, Gálallá eedhdhíe, gáál yiesíe, yie. Aalé Heróˈde Yuuˈdía gaa kie, Kaisária mé nie, ál kinaal á níínni mare gaa yíéđie.
Heróˈde kúfáchlé
20Gál ˈjien Turo ubaa gál ˈjien Siˈdon kisso Heróˈde hí súm ˈdú idhane. Gál muí idholle ˈgie kinaal ˈdaa giri lésle mú lésle ˈguom gaa aargiˈdoká hol chiˈde, mú ˈdéé ˈdú eedhdhe, naanná ˈgeˈgedhe. Gaal hátlé mú af ma kí ˈdíinyká erkob Balásta giri ˈbíl máá kansich kinaal mé ki yielká el koy, giri muí ˈdíne ki ˈdeˈdeenká. 21Aalé kúlích Heróˈde hí gáál a méé ki vieká ali kí ˈdiiyyeká Heróˈde đafaraamlé kansimoká fadhdhe, kara kansimoká ˈdú yíéđie, gáál ki ˈdiiyime. 22Aalé gaal koˈdam ˈdoy, af gaa guđoká ˈdéé ki huogodhe, kieye, Hééllá hé af máádhat muuniny, he af waago! gaalí yiegie. 23ˈDaa giri Heróˈde meenylé gaalí memeyká ma đíin-, ˈduuw kinaal Waag hol ma ˈdú níinyká, in ál tikiˈde kinaal máá ˈgasso-, urru-, Waaˈgietká đo hí ˈdoy, kulnadhe, kuuˈd hí faanne, kuuˈd hí konye, kufe.
24Aalé ˈdeeny Waaˈgiet heere, les eiy bash ki yie. 25Aalé Barnábas ubaa Sáwul hújíchlé gaalí mé ki koyká beeteká gaal Yerúsalem gaa kie. Gaal Yuána giri Márko léká eedhdhe, Ántiok hol ˈdú nadhe.
अहिले सेलेक्ट गरिएको:
He Ekeny Gál Alb Fimiká 12: dsh
हाइलाइट
शेयर गर्नुहोस्
तुलना
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
