१ शमूएल 18:1-5

शाऊल र दाऊदको बातचित सकियो। त्‍यस दिनपछि शाऊलको छोरा जोनाथन दाऊदसँग आत्‍मामा एक भए र तिनले दाऊदलाई आफैंलाई झैँ प्रेम गर्न लागे। त्‍यस दिनदेखि शाऊलले दाऊदलाई आफ्‍नोसाथमा राखे र घर फर्कन दिएनन्। दाऊदलाई गहिरो प्रेम गर्न लागेकोले जोनाथनले तिनीसित सदासर्वदा मित्रता राख्‍ने किरिया खाए। आफूले लगाएको लबेदा खोलेर तिनले दाऊदलाई दिए साथै आफ्‍ना तरवार, धनु र पेटी पनि तिनलाई दिए। शाऊलले गर्न पठाएका हरेक विशेष काममा दाऊद सफल भए र शाऊलले तिनलाई आफ्‍ना सेनामा अधिकृत नियुक्त गरे। त्‍यसो भएपछि शाऊलका सारा सैनिक वर्ग र अधिकृतहरू खुसी भए।