१ शमूएल 10:20-24

तब शमूएलले हरेक कुललाई अघि आउन अह्राए र परमप्रभुले बेन्‍यामीन कुललाई चुन्‍नुभयो। त्‍यसपछि शमूएलले बेन्‍यामीन कुलका परिवारलाई अघि आउन अह्राए र मत्रीको परिवार चुनियो। त्‍यसपछि मत्री परिवारका पुरुषहरू अघि आए अनि कीशको छोरो शाऊल चुनिए। तिनलाई तिनीहरूले खोजे तर नपाएर, परमप्रभुलाई सोधे, “के अझै अरू कोही छ?” परमप्रभुले उत्तर दिनुभयो, “शाऊल त्‍यहाँ खानेकुरा राखेका ठाउँको पछि लुकेको छ।” त्‍यसरी तिनीहरू दगुरेर गए र शाऊललाई निकालेर मानिसहरूका माझमा ल्‍याए र तिनीहरूले देखे कि सबै जना तिनको कुमभन्दा होचा थिए। शमूएलले प्रजालाई भने, “परमप्रभुले चुन्‍नुभएको मानिस यी नै हुन्! यिनीजस्‍ता अरू कोही हाम्रा माझमा छैनन्।” सारा प्रजाले नारा लगाए, “राजा दीर्घायु होऊन्!”