यूहन्‍ना 11:1-14

लाजरस नामको एक जना मानिस बिरामी भएका थिए। तिनी मरियम र उनकी दिदी मार्थाको गाउँ बेथानियाका थिए। प्रभुलाई अत्तर लाइदिएर उहाँका पाउ आफ्‍नो कपालले पुछिदिने मरियम यी नै थिइन्‌। यिनकै भाइ लाजरस बिरामी थिए। यी दुई दिदीहरूले येशूकहाँ यसो भनी समाचार पठाए, “प्रभु, जसलाई तपाईं माया गर्नुहुन्‍छ, तिनी बिरामी छन्‌।” तर यो सुनेर येशूले भन्‍नुभयो, “यस बिरामीले मृत्‍युमा पुर्‍याउँदैन, तर यो परमेश्‍वरको महिमाको निम्‍ति हो, ताकि यसद्वारा परमेश्‍वरका पुत्रको महिमा होस्‌।” येशूले मार्था, तिनकी बहिनी र लाजरसलाई माया गर्नुहुन्‍थ्‍यो, तापनि लाजरस बिरामी छन्‌ भन्‍ने सुनेर उहाँ जहाँ हुनुहुन्‍थ्‍यो, अझ दुई दिन त्‍यहीँ बस्‍नुभयो। त्‍यसपछि उहाँले चेलाहरूलाई भन्‍नुभयो, “लौ, अब हामी फेरि यहूदिया फर्केर जाऔं।” चेलाहरूले उहाँलाई भने, “रब्‍बी, भर्खरै मात्र यहूदीहरूले तपाईंलाई ढुङ्गाले हान्‍न खोजेथे, र के फेरि तपाईं त्‍यहीँ जानुहुन्‍छ?” येशूले जवाफ दिनुभयो, “के दिनमा बाह्र घण्‍टा हुँदैनन्‌ र? दिनमा हिँड्‌डुल गर्नेलाई ठेस लाग्‍दैन, किनभने तिनले यस संसारको ज्‍योति देख्‍तछन्, तर राती हिँड्‌डुल गर्नेलाई ठेस लाग्‍छ, किनभने त्‍यस मान्‍छेमा उज्‍यालो हुँदैन।” त्‍यसपछि उहाँले तिनीहरूलाई भन्‍नुभयो, “हाम्रा मित्र लाजरस निद्रामा परेका छन्, तर तिनलाई निद्राबाट बिउँझाउन म त्‍यहाँ जान्‍छु।” चेलाहरूले उहाँलाई भने, “प्रभु, तिनी निद्रामा परेका छन्‌ भने तिनी निको हुनेछन्‌।” येशूले तिनको मृत्‍युको विषयमा भन्‍नुभएको थियो, तर तिनीहरूले चाहिँ स्‍वाभाविक निद्राको विषयमा भन्‍नुभएको हो भन्‍ठाने। येशूले तिनीहरूलाई स्‍पष्‍ट भनिदिनुभयो, “लाजरस मरेका छन्‌।