Kushangumuka 1
1
Vin̄anda vyakutanga kwa kaye
1Akulivanga Njambi watangele lilu na kaye.#1:1 AKULIVANGA...KAYE: Nambe, akulivanga omo Njambi watangele kaye, nambe, omo Njambi washangumukile kutanga kaye. 2Kaye kakele kangoco kamupulungwa. Lisusulungu lyafwikile vyuma vyoshe vyakele mu nzinga, oloni Munzinzime wa Njambi#1:2 MUNZINZIME WA NJAMBI: Nambe, nzili ya Njambi, nambe, lihunzi lyakutunda kuli Njambi, nambe, lihunzi lyakukomokesa. wakele nakutengenya akamwa ya mema. 3#2 Koli 4:6 Asinoni Njambi wendekele ngwendi, “Kukale ceke.” Co ceke casholokele. 4Njambi wamwene ngeci ceke cinavwaa. Asinoni waangunwine ceke ku lisusulungu. 5Asinoni Njambi watumbwile ceke ngwendi “Mutanya,” co lisusulungu walitumbwile ngwendi “Vutsiki.” Cingwezi lyatokele, co mutondo lyakile, lije lyapwile litangwa lyakulivanga.
6Asinoni Njambi wendekele ngwendi, kukale mukambwila waangunune mema ngeci akale mu mitambela ivali yakulyangunuka. Co evi vyalingiwile. 7Ngecivene, Njambi watangele mukambwila nakwangununa mema akwisi yawo na mema aakamwa yawo. 8#2 Pet 3:5 Njambi watumbwile uje mukambwila ngwendi “Lilu.” Cingwezi lyatokele, co mutondo lyakile, lije lyapwile litangwa lyamucivali.
9Asinoni Njambi wendekele ngwendi, “Mema a mwisi ya lilu alikungulwile mu mutambela umolika ngeci kusholoke livu lyakuma.” Co calingiwile. 10Njambi watumbwile livu lyakuma ngwendi, “Nunda,” co aje mema alikungulwilile amo waatumbwile ngwendi, “Mema a kalunga.” Njambi wamwene ngeci cinavwaa. 11Asinoni Njambi wendekele ngwendi, “A nunda amene miyati yoshe ya vimena, vije vyakwima vimbuto vya vinona, nevi vyakwima vushuka.” Co eci calingiwile. 12Ngecivene, a nunda amenene mwila na miyati yoshe yakwima vimbuto vya vinona, nevi vyakwima vushuka. Co Njambi wamwene ngeci cinavwaa. 13Cingwezi lyatokele, co mutondo lyakile, lije lyapwile litangwa lyamucitatu.
14Asinoni Njambi wendekele ngwendi, “Kukale vyeke mwilu ngeci vyangunune mutanya ku vutsiki, vipwe vizivukiso vyakumwesa matangwa, na myaka, na visimbu vya myaka,#1:14 VISIMBU VYA MYAKA: Nambe, viwano vya vunjambi. 15ngeci vikavyazime mwilu nakutwila ceke ano asi.” Co vyalingiwile. 16Ngecivene, Njambi watangele vyeke vivali vyakama, litangwa kushwana ku mutanya na ngonde kushwana ku vutsiki. Co ikeye lalo watangele vingongonosi. 17Co Njambi waakele vije vyeke kwilu ngeci vitwile ano asi, 18vishwane ku mutanya na ku vutsiki, nakwangununa ceke ku lisusulungu. Co Njambi wamwene ngeci cinavwaa. 19Cingwezi lyatokele, co mutondo lyakile, lije lyapwile litangwa lyamuciwana.
20Asinoni Njambi wendekele ngwendi, “Mu mema mukale vikashama vakuliseza-seza, co tuzila vapulule a mukambwila.” Co calingiwile. 21Ngecivene, Njambi watangele vikashama vakama va mu mema a kalunga, na vikashama voshe vakuliseza-seza, na tuzila voshe vakuliseza-seza. Co Njambi wamwene ngeci cinavwaa. 22Co Njambi wavezikisile vyoshe vyakuyoya mu mema ngwendi, “Semunwineni, mutume ngeci mushulise mu mema a kalunga.” Co walekele tuzila ngeci vakevo lalo vatume. 23Cingwezi lyatokele, co mutondo lyakile, lije lyapwile litangwa lyamucitanu.
24Asinoni Njambi wendekele ngwendi, “A nunda akale tusitu vakuyoya ngwe ku miyati yavo yoshe, vimuna na ava va mu shwata vakama na ava vavandondo na ava vakulikoka.” Co calingiwile. 25Ngecivene, Njambi watangele tusitu voshe va asi ngwe ku miyati yavo na vimuna ngwe ku miyati yavyo, na vyoshe vyakulikoka asi, ngwe ku miyati yavyo. Co Njambi wamwene ngeci cinavwaa.
26 #
1 Koli 11:7
Asinoni Njambi wendekele ngwendi, “Ololo oni tutangeni munu wakulifwa netu na mu cifwa cetu. Ngeci vakakale na moko yakushwana visi, na tuzila, na tusitu voshe, na vimuna vakama na ava vavandondo na ava vakulikoka.” 27#Mat 19:4; Mak 10:6 Ngecivene, Njambi watangele munu mu cifwa cendi vavenya. Co mu cifwa ca Njambi wavatangele munalume na munakazi. 28#Kus 5:1-2 Wavavezikisile nakwendeka ngwendi, “Kiteni, ngeci vatekulwila veni vakatume ano asi oshe, co mukakala na moko yakushwana visi va mu mema a kalunga, na tuzila, na tusitu voshe.” 29Njambi wendekele ngwendi, “Kengeni, njinamyana vimena vyoshe vyakwima vimbuto vya vinona na miyati yoshe ya vushuka ngeci mulye. 30Oloni ku tusitu voshe va mu shwata na tuzila voshe njinavana mwila na maputa a ku miti kupwa vyakulya vyavo.” Co calingiwile. 31Asinoni Njambi wakengele a vyuma vyoshe vije vyatangele, wamwene ngeci vinavwaa manene. Cingwezi lyatokele, co mutondo lyakile, lije lyapwile litangwa lyamucitanu na limo.
လက်ရှိရွေးချယ်ထားမှု
Kushangumuka 1: MBB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
The Bible in Mbunda ©The Bible Society of Zambia, 2006