San Mateo 3
3
Juánu itsï atajtsïkpiriri arhijtsïkperakua
(Mc 1.1-8; Lc 3.1-9,15-17; Jn 1.19-28)
1Imani jurhiatekuechani jimbo Judea, jimesï enga nónema irekaka jámaspti Jauánu itsï atajtsïkpiri, arhijtsïkpeparini, 2ka arhijpesïrempti: “¡Diósïni andarhentsï je, jimboka auandarhu anapu irechekua janoxakaia!”
3I imesti enga Isaiasï Diósïri uandari uandempka:
“Nema ísï uinhachaxati
jimesï isï enga nónema irekaka:
Acheri xanharini ambantskakuntsï je,
ka xanharini p'arhikjantskakuntsï je.”
4Juánueri xukuparhakua kameiueri jauiri jimbo úkatespti ka sïkuiri jóngorhesïrempti ka chóchu ka tékua juátarhu anapu t'iresïrempti. 5Jerusaleni anapuechaksï ka Judea ka iurhekua Jordani parhikutini isï anapuechaksï nirasïrempti kurhajchani, 6k'amanharhintskuechanksï uandakorheantasïrempti ka Juánu iurhekua Jordanirhu itsï atajtsïkuasïrempti.
7Juánu uánekua fariseuechani ka saduseuechani exearini engaksï niárempka itsï atajtsïkukuekani, arhiasïrempti: “¡Akuitseni járhaticha! ¿Chánksïni ne arhiski eskajtsï chájtu úaka sïpakorhekuni ikimperatani enga jurhani jaka? 8Xarhatachka je, eska xarharaaka eskajtsï sési jimbo móantaskia, 9ka ásï cha jandiojku arhikorhe je: ‘Abrani juchari Tátesti.’ Jimbokaksïni ji arhixaka eska Diósï úsïnga íni tsakapuechani jamberi Abrani uájperantaani. 10Ka jacha ambamuntskata jarhastia enga anhatapuni sïrangua jinguni p'ikuaka; jimboka anhatapu enga no újka ambakiti amanhejchakua jukani, ch'apanhasïndi ka chpírirhu k'uanijpanhani. 11Jíksïni sési jimbo itsï jimbojku itsï atajtsïkuxaka, eskajtsï móataaka, ka ima engarini chúxapuni jaka, engani ji no jukanchaka kuarhachichani p'ikuani, ima sánderu k'éri ambesti. Imaksïni Espiritu Sántuni ka chpíri jimbo itsï atajtsïkuati. 12K'arhojpatarakuani jupikatixati enga tríjuni kátakutarantaaka. Tríjuni, jatakuarhu incharantaati ka sïnhakini chpírirhu kuanijpaati jima enga nómeni pójpeaka.”
Jesusi itsï atajtsïkunhasti
(Mc 1.9-11; Lc 3.21-22)
13Jesusi Galilea uératini, iurhekua Jordanirhu niáraspti, jima enga Juánu jápka, eska ima itsï atajtsïkupiringa. 14K'óru Juánu no uékasïrempti ka arhisïrempti:
–T'úrinisï itsï atajtsïkuaka, ¿Andirinisï t'u jíndeni arhijki? 15Ka Jesusi arhispti:
–Jauati iásï ísïni, jimboka Diósï ísï uékasïnga eska úkorheaka.
Jiájkani Juánu itsï atajtsïkuspti. 16Ka enga Jesusi itsï atajtsïtini uémentani jápka, jimajku auanda mítakorhespti ka eranchespti Diósïri Espirituni enga jipunhini jásï ma kétseni jápka ka imani andajtsïkueraspti. 17Ka auandarhu anapu uandakua ma kurhanchekorhespti enga arhimpka: “I jindesti jecheti Uátsï xénhchakata, engani jimbo ji xáni tsípejka.”
လက်ရှိရွေးချယ်ထားမှု
San Mateo 3: DKPJ
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en P´urhépecha, Michoacán, México © Sociedad Bíblica de México, A.C.