တမန်တော် 16
16
ပေါလု၏ ဒုတိယသာသနာပြုခရီးစဉ်
1ပေါလုသည် ဒေရဗေမြို့နှင့် လုတ္တရမြို့သို့ ရောက်လာ၏။ လုတ္တရမြို့တွင် တိမောသေဟု ခေါ်သော တပည့်တော်တစ်ဦးရှိ၏။ သူ၏မိခင်သည် ယုံကြည်သူ ဂျူးအမျိုးသမီးဖြစ်ပြီး ဖခင်မှာ ဂရိအမျိုးသားဖြစ်၏။ 2တိမောသေသည် လုတ္တရမြို့နှင့် ဣကောနိမြို့ရှိ ယုံကြည်သူများ၏ချီးမွမ်းပြောဆိုခြင်းခံရသူဖြစ်၏။ 3ပေါလုသည် တိမောသေကို မိမိနှင့်အတူ လိုက်ပါစေလိုသဖြင့် သူတို့မထွက်ခွာမီ သူ့အား အရေပြားလှီးခြင်းမင်္ဂလာကို ပေးလေ၏။ အဘယ်ကြောင့်ဆိုသော် ထိုနယ်ရှိ ဂျူးလူမျိုးများက သူ၏ဖခင်မှာ ဂရိလူမျိုးဖြစ်ကြောင်းကို သိကြသောကြောင့်ဖြစ်၏။ 4ထို့နောက် သူတို့သည် မြို့များကို ဖြတ်သွားကြစဉ် ဂျေရုဆလင်မြို့ရှိ အသင်းတော်အကြီးအကဲများနှင့် တမန်တော်တို့မှ ဆုံးဖြတ်ထားသောပညတ်တို့ကို ယုံကြည်သူများ လိုက်နာရန် ညွှန်ကြားကြ၏။ 5ထိုသို့ဖြင့် အသင်းတော်များသည် ယုံကြည်ခြင်း၌ ခိုင်မာကြ၍ နေ့စဉ် လူဦးရေတိုးပွားလေ၏။
မာကေဒေါနိပြည်မှခေါ်သံ
6သန့်ရှင်းသောဝိညာဉ်တော်သည် သူတို့အား အာရှပြည်၌ နှုတ်ကပတ်တရားတော်ကိုဟောပြောရန် တားမြစ်သဖြင့် ဖြူဂိပြည်နှင့် ဂလာတိပြည်ကို ဖြတ်သွားကြ၏။ 7သူတို့သည် မုသိပြည်သို့ ရောက်လာသောအခါ ဗိသုနိပြည်သို့ သွားရန်ကြိုးစားကြ၏။ သို့သော် ယေရှု၏ဝိညာဉ်တော်သည် ခွင့်မပြုသောကြောင့် 8မုသိပြည်ကိုဖြတ်၍ တရောမြို့သို့ သွားကြ၏။
9ပေါလုသည် ညအခါ ရူပါရုံတစ်ခုကိုမြင်ရ၏။ ထိုရူပါရုံ၌ မာကေဒေါနိပြည်သားတစ်ဦးသည် ရပ်လျက် “မာကေဒေါနိပြည်သို့လာ၍ ကျွန်ုပ်တို့ကို ကူညီပါ” ဟု တောင်းပန်ပြောဆိုနေ၏။ 10ထိုရူပါရုံကို မြင်ရပြီးသောအခါ ထိုပြည်သားတို့အား သတင်းကောင်းဟောပြောရန် ကျွန်ုပ်တို့ကို ဘုရားသခင်ခေါ်တော်မူပြီဟု ယုံကြည်ကာ မာကေဒေါနိပြည်သို့ သွားရန် ချက်ချင်းဆုံးဖြတ်ကြ၏။
ဖိလိပ္ပိမြို့သူလုဒိ ယေရှုကိုယုံကြည်ခြင်း
11ကျွန်ုပ်တို့သည် တရောမြို့မှ ရွက်လွှင့်၍ သာမောသရက်ကျွန်းသို့ တန်းတန်းမတ်မတ်သွားကြရာ နောက်တစ်နေ့တွင် နာပေါလိမြို့သို့ ရောက်ကြ၏။ 12ထိုမှတစ်ဆင့် ဖိလိပ္ပိမြို့သို့ ရောက်ကြ၏။ ထိုမြို့သည် မာကေဒေါနိပြည်၏အရေးပါသောမြို့တစ်မြို့ဖြစ်၍ ရောမလက်အောက်ခံမြို့လည်းဖြစ်၏။ ကျွန်ုပ်တို့သည် ထိုမြို့၌ ရက်အတန်ကြာနေကြ၏။
13ဥပုသ်နေ့တွင် ကျွန်ုပ်တို့သည် မြို့တံခါးအပြင်သို့ ထွက်၍ ဆုတောင်းရန် နေရာရှိနိုင်မည့် မြစ်ကမ်းနားသို့ သွားကြ၏။ ထို့နောက် ကျွန်ုပ်တို့သည် ထိုင်၍ ထိုနေရာတွင် စုဝေးနေကြသောအမျိုးသမီးတို့အား ဟောပြောကြ၏။ 14သွာတိရမြို့မှ ဘုရားသခင်ကို ကိုးကွယ်သော လုဒိအမည်ရှိ အမျိုးသမီးတစ်ဦးသည် ကျွန်ုပ်တို့ပြောသောအရာများကို နားထောင်လျက်နေ၏။ သူသည် ခရမ်းရောင်အထည်များကို ရောင်းသောသူဖြစ်၏။ ပေါလုဟောပြောသော စကားများကို အာရုံစိုက်နားထောင်ရန်အတွက် သူ၏စိတ်နှလုံးကို ဘုရားသခင်သည် ဖွင့်ပေးတော်မူ၏။ 15သူနှင့် အိမ်သူအိမ်သားအားလုံးတို့သည် နှစ်ခြင်းမင်္ဂလာကို ခံယူပြီးလျှင် လုဒိက “ကျွန်မသည် သခင်ဘုရားအား အမှန်ပင်ယုံကြည်သောသူဖြစ်သည်ဟု သင်တို့သတ်မှတ်ပါက အိမ်သို့လာ၍ တည်းခိုကြပါ” ဟု ကျွန်ုပ်တို့အား ဖျောင်းဖျလေ၏။
ပေါလုနှင့်သိလတို့ ထောင်ထဲတွင် ချုပ်နှောင်ခံရခြင်း
16တစ်နေ့တွင် ကျွန်ုပ်တို့သည် ဆုတောင်းရာအရပ်သို့ သွားနေစဉ် ဗေဒင်ဟောတတ်သောနတ်ပူးနေသည့် အစေခံအမျိုးသမီးတစ်ဦးကို တွေ့ကြ၏။ ထိုသူသည် ဗေဒင်ဟောခြင်းဖြင့် မိမိသခင်တို့အတွက် ဝင်ငွေများစွာ ရှာဖွေပေးလျက်ရှိ၏။ 17သူသည် ပေါလုနှင့် ကျွန်ုပ်တို့နောက်သို့ လိုက်၍ “ဤသူတို့သည် အမြင့်မြတ်ဆုံးသော ဘုရားသခင်၏အစေအပါးများဖြစ်ကြပြီး သင်တို့အား ကယ်တင်ခြင်းတရားလမ်းကို ဟောပြောရန် ရောက်ရှိလာကြပြီ” ဟု အော်ဟစ်ပြောဆိုလေ၏။
18ရက်ပေါင်းများစွာ ထိုကဲ့သို့အော်ဟစ်လျက်နေသဖြင့် ပေါလုသည် အလွန်စိတ်အနှောင့်အယှက်ဖြစ်လေ၏။ သို့ဖြစ်၍ နောက်သို့လှည့်ကာ “သူ့အထဲမှထွက်သွားလော့။ ယေရှုခရစ်တော်#16:18 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။၏အမည်နာမအားဖြင့် သင့်အား ငါအမိန့်ပေးသည်” ဟု ဆိုသော် နတ်ဆိုးသည် ထိုအချိန်၌ပင် ထွက်သွား၏။
19သို့သော် သူ၏သခင်တို့သည် မိမိတို့ဝင်ငွေရရန် မျှော်လင့်စရာမရှိတော့သည်ကို သိမြင်သဖြင့် ပေါလုနှင့်သိလတို့ကို ဖမ်းဆီး၍ ရုံးတော်#16:19 မူရင်းဂရိဘာသာစကားအရ “ဈေးအရပ်” ဟု အဓိပ္ပာယ်ရပြီး ဆိုလိုရင်းမှာ လူထုကိစ္စရပ်များ ဖြေရှင်းသည့် နေရာဖြစ်သည်။ရှိ အာဏာပိုင်များထံသို့ ဆွဲခေါ်သွားကြ၏။ 20အာဏာပိုင်များရှေ့သို့ ရောက်သောအခါ ထိုသူတို့က “ဤသူတို့သည် ဂျူးလူမျိုးများဖြစ်၍ ကျွန်ုပ်တို့၏မြို့ကို ဆူပူစေကြပါ၏။ 21ရောမလူမျိုးတို့ မကျင့်သုံးအပ်သော ထုံးတမ်းစဉ်လာများကိုလည်း ဟောပြောကြပါ၏” ဟု ဆိုကြ၏။
22လူထုကလည်း ပေါလုနှင့် သိလတို့အား စွပ်စွဲပြောဆိုကြ၏။ ထိုအခါ အာဏာပိုင်တို့သည် ပေါလုနှင့် သိလတို့၏အဝတ်အစားများကို ချွတ်စေ၍ ကြိမ်ဒဏ်ပေးရန် အမိန့်ချမှတ်ကြ၏။ 23ပေါလုနှင့် သိလတို့ကို ပြင်းထန်စွာ ကြိမ်ဒဏ်ပေးပြီးနောက် ထောင်ထဲသို့ပို့၍ သေချာစွာ ချုပ်နှောင်ထားရန် ထောင်မှူးအားအမိန့်ပေးကြ၏။ 24ထိုအမိန့်အတိုင်း ထောင်မှူးသည် သူတို့ကို ထောင်အတွင်းခန်းသို့ သွင်း၍ ခြေတို့ကို ထိတ်တုံးခတ်ထားလေ၏။
25သန်းခေါင်အချိန်တွင် ပေါလုနှင့် သိလတို့သည် ဘုရားသခင်ထံ ဆုတောင်း၍ ဓမ္မသီချင်းများကို သီဆိုနေကြ၏။ အကျဉ်းသားများသည်လည်း နားထောင်နေကြ၏။ 26ရုတ်တရက် မြေငလျင်ပြင်းစွာလှုပ်သဖြင့် ထောင်၏အုတ်မြစ်သည် လှုပ်ခါလေ၏။ ထိုအခါ ချက်ချင်းပင် ထောင်တံခါးများ ပွင့်သွား၍ အကျဉ်းသားများကို ချည်နှောင်ထားသည့် ရှိသမျှသံကြိုးတို့သည် ပြုတ်ထွက်ကြကုန်၏။ 27ထောင်မှူးသည် အိပ်ရာမှ နိုးလာ၍ ထောင်တံခါးများ ပွင့်နေသည်ကို မြင်သောအခါ အကျဉ်းသားများ ထွက်ပြေးကြပြီဟု ထင်မှတ်လျက် မိမိကိုယ်ကိုယ်သတ်သေရန် ဓားကိုဆွဲထုတ်၏။ 28ထိုအခါ ပေါလုက “မိမိကိုယ်ကိုယ် အန္တရာယ်မပြုနှင့်။ ကျွန်ုပ်တို့အားလုံး ဤနေရာတွင် ရှိကြပါ၏” ဟု ကျယ်လောင်သောအသံနှင့် ပြော၏။
29ထောင်မှူးသည် မီးတိုင်ကို တောင်း၍ အလျင်အမြန်ပြေးဝင်ပြီးလျှင် ပေါလုနှင့် သိလတို့ရှေ့၌ ကြောက်ရွံ့တုန်လှုပ်လျက် ပျပ်ဝပ်လေ၏။ 30သူတို့ကို အပြင်သို့ထုတ်ပြီးနောက် ထောင်မှူးက “ဆရာတို့… ကယ်တင်ခြင်းခံရရန် ကျွန်ုပ်မည်သို့ပြုလုပ်ရမည်နည်း” ဟု မေး၏။
31ပေါလုနှင့်သိလတို့ကလည်း “သခင်ယေရှုကို ယုံကြည်လော့။ သင်နှင့် သင်၏အိမ်သားအားလုံးတို့သည် ကယ်တင်ခြင်းခံရမည်” ဟု ပြောကြ၏။ 32ထို့နောက် ထိုသူနှင့်အတူ သူ၏အိမ်သားအားလုံးတို့အား သခင်ဘုရား၏နှုတ်ကပတ်တရားတော်ကို ဟောပြောကြ၏။ 33ထိုညတွင်းချင်းပင် ထောင်မှူးသည် သူတို့ကိုခေါ်၍ ဒဏ်ရာများကို ဆေးကြောပေး၏။ ထိုသို့ပြုပြီးနောက် သူနှင့် အိမ်သားအားလုံးသည် ချက်ချင်းပင် နှစ်ခြင်းမင်္ဂလာကို ခံယူကြ၏။ 34ထောင်မှူးသည် ပေါလုနှင့်သိလတို့အား မိမိအိမ်သို့ခေါ်ကာ အစားအစာများကို တည်ခင်းကျွေးမွေး၏။ သူနှင့်တကွ အိမ်သားအားလုံးသည် ဘုရားသခင်ကို ယုံကြည်ကြသဖြင့် အလွန်ဝမ်းမြောက်ကြ၏။
35နောက်တစ်နေ့တွင် အာဏာပိုင်များသည် ထောင်မှူးထံသို့ ရဲအရာရှိများကို စေလွှတ်၍ “ထိုသူနှစ်ယောက်ကို လွှတ်စေ” ဟု မှာကြားလေ၏။ 36ထိုအခါ ထောင်မှူးက ပေါလုအား “အာဏာပိုင်များက ဆရာတို့အားလွှတ်ပေးရန် မှာကြားလိုက်၏။ ထို့ကြောင့် ယခုငြိမ်းချမ်းစွာသွားကြပါ” ဟု ပြောလေ၏။
37သို့သော် ပေါလုက ရဲအရာရှိတို့အား “သူတို့သည် ရောမနိုင်ငံသားဖြစ်သော အကျွန်ုပ်တို့ကို မစစ်ဆေးဘဲ လူထုပရိသတ်တို့ရှေ့တွင် ရိုက်နှက်၍ အကျဉ်းချထားခဲ့ကြ၏။ ယခုတွင် သူတို့သည် အကျွန်ုပ်တို့အား တိတ်တဆိတ်လွှတ်မည်လော။ ထိုသို့မပြုသင့်။ သူတို့ကိုယ်တိုင်လာ၍ အကျွန်ုပ်တို့ကို ထောင်မှထုတ်ပါစေ” ဟု ပြော၏။
38ရဲအရာရှိတို့ကလည်း ထိုစကားများကို အာဏာပိုင်များထံ တင်ပြသဖြင့် ပေါလုနှင့်သိလတို့သည် ရောမနိုင်ငံသားများဖြစ်ကြောင်းကို သိသောအခါ ကြောက်ရွံ့ကြ၏။ 39ထို့ကြောင့် သူတို့သည် ထောင်ထဲသို့ ကိုယ်တိုင်လာ၍ တောင်းပန်ပြီးလျှင် အပြင်သို့ ခေါ်ထုတ်ကာ မြို့မှထွက်ခွာရန် တောင်းဆိုကြ၏။ 40ပေါလုနှင့်သိလတို့သည် ထောင်မှထွက်လာပြီးနောက် လုဒိအိမ်သို့ သွားကြ၏။ ထိုနေရာတွင် ယုံကြည်သူများကို တွေ့မြင်သဖြင့် အားပေးတိုက်တွန်းပြီးလျှင် ထိုမြို့မှထွက်ခွာသွားကြ၏။
လက်ရှိရွေးချယ်ထားမှု
တမန်တော် 16: BCB
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.