GENESIS 2
2
1Cuticun vawlei le van le vawlei le vancung i a ummi thil vialte cu ser an si. 2Ni sarihnak ni ah Pathian nih a tuahmi thil vialte cu a lim hna i cu ni ah cun rian ṭuan loin a um. #Exo 20.11 3Ni sarih ni cu thluachuah a pek i a dang tein a chiah, zeicahtiah cu ni cu a thil ser a lim i rianṭuan loin a um ni kha a si.
4Vawlei le van i a ummi thil vialte ser an sining cu cuticun a si.
Bawipa Pathian nih vawlei le van i a ummi thil vialte hna cu a ser hna tikah, 5vawlei cungah hin ramkung zeihmanh a um lo i thlaici zeihmanh a kho lo, zeicahtiah vawlei cungah khan ruah a surter rih lo i vawlei cung i rian a ṭuantu ahohmanh an um rih lo. 6Asinain ti cu vawlei chungin a put i vawlei kha a hnawnter.
7Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung. #1Kor 15.45
Eden Dum
8Cun Bawipa Pathian nih nichuahlei ah Eden dum pakhat a ser i cuka ah cun a sermi mipa kha a chiah. 9Vawlei chung cun aa dawhmi thingkung le rawl ca i a ṭhami kung a phunphun kha a khohter hna, dum laifang ah cun nunnak thingkung, chia le ṭha hngalh khawhnak thingkung zong a khohter. #Biat 2.7; 22.2,14
10Eden cun tiva pakhat a luang i cu tiva nih cun dum cu ti a toih. Cu tiva cu tiva pali ah aa ṭhen. 11Pakhatnak cu a min ah Pishon a si; cu tiva cu Havilah ram a velchum i a luangmi kha a si. 12Cuka ah cun sui thiang ngaingai phun kha an hmuh i a man a sungmi thingthling le oniks lungvar sen zong an hmuh hna. 13Tiva pahnihnak a min cu Gihon a si; cu tiva cu Kush ram velchum i a luangmi kha a si. 14Tiva pathumnak cu Tigris a si, cu tiva cu Assiria ram nichuahlei i a luangmi kha a si. Tiva palinak cu Zufrates tiva kha a si.
15Cun Bawipa Pathian nih mipa cu a lak i Eden dum chungah cun dum cu a thlawh awk le ven awkah a chiah. 16Mipa cu a thawh i, “Dum chung i a ummi thingkung vialte hi an thei na ei dih ko hna lai, 17sihmanhsehlaw a ṭha le a ṭhalo hngalhnak pe khotu thingkung a tlai hi cu na ei lai lo. Cu thingthei cu na ei hrimhrim lai lo. Na ei ahcun, na ei ni hrimhrim ah na thi lai,” a ti.
18Cun Bawipa Pathian nih cun, “Mipa amah lawng i a um hi a ṭha lo, hawile bawmtu ka serpiak lai,” a ti. 19Cucaah vawlei khan saram an dihlak le va an dihlak kha a ser hna i mipa sinah cun an min rak sak awkah a ratpi hna. Mipa nih min a rak sakmi hna kha an min ah a cang lan. 20Cuticun mipa nih cun inn zuat saṭil vialte le va vialte le ramlak saram vialte cu min a sak hna, asinain amah caah cun hawile bawmtu an um lo.
21Cun Bawipa nih mipa cu thu hluahmah in a hngilhter i aa hngilh karah cun a hnakruh pakhat kha a zuh i cu a zuhnak cu titsa in a phih. 22Mipa hnakruh a zuhmi cun minu pakhat a ser i a sinah cun a ratpi. 23Cun mipa nih cun aa thawh i,
“Atu hi pei keimah phun taktak
a simi cu a si hi;
Ka ruh i lakmi ruh, ka sa in lakmi sa.
A min ah “Nu” si seh, zeicahtiah
amah cu mipa chungin
lakmi a si,” a ti.
24Cucaah cun pei pa nih a nu le a pa a kaltak hna i a nupi he an i fonh i pum khat i an can hi a si cu. #Mat 19.5; Mar 10.7-8; 1Kor 6.16; Efe 5.31 25Mipa le a nupi cu an pahnih in hnipuan an ngei lo, sihmanhsehlaw an ning a zak lo.
လက်ရှိရွေးချယ်ထားမှု
GENESIS 2: HCL06
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Lai (Hakha) Common Language Bible © Bible Society of Myanmar 2006