1 Johannes 4
4
1Mure kamade, na pačan tumen sako duxo! Zumaven le duxon taj dikhen te si katar o Del! Ke but xoxamne profetora gele avri ande i luma. 2Le Devlesko Duxo prindžaren tume pe kako: Sako duxo kaj phenel pe ke o Jesus Kristus avilas ande korpo taj ande rat, si katar o Del. 3Me sako duxo kaj či phenel pe o Jesus, na'i katar o Del. Kado si le Antikristosko duxo, kaj tume ašundan ke si te avel. Taj kodo si aba akana and'i luma. 4Me tume, mure šavora, san katar o Del taj tume nirindan le xoxamne profetora. Ke kodo kaj bešel ande tumende maj baro si sar kodo kaj si and'i luma. 5Von si katar i luma, taj lengo vorbimos si lumako, taj i luma ašunel pe lende. 6Me ame sam katar o Del, taj kodo kaj prindžarel le Devles ašunel pe amende, taj kodo kaj na'i katar o Del, či ašunel pe amende. Kade šaj prindžaras so si le čačimasko duxo taj le athajmasko duxo.
O Del si kamimos
7Mure kamade, mekhen te kamas jekh avres! Ke o kamimos si katar o Del taj kado kaj kamel kerdjilas katar o Del taj prindžarel le Devles. 8Kodo kaj či kamel, či prindžardas šoha le Devles, ke o Del si kamimos. 9Taj o Del sikhadas maškar amende pesko kamimos kana bišadas peske jekhe Šaves pe i luma te šaj avel amen trajo ka leste. 10O kamimos na'i kodo ke ame kamlam le Devles, me ke o Del kamlas amen taj bišadas peske Šaves te pučinel amare bezexa. 11Mure kamade, te o Del kade kamelas amen, atunči vi ame sam došale te kamas jekh avres. 12Šoha konik či dikhlas le Devles, me te kamasa jekh avres, ašel o Del ande amende, taj o kamimos lesko kerdjilas tista vorta amende. 13Ke ame ašas ande leste taj vo ašel ande amende, kodo žanas ke vo das amen anda pesko Duxo. 14Ame dikhlam taj phenas ke o Dad bišadas peske Šaves sar o skepitori la lumako. 15Kodo kaj phenel pe ke o Jesus si o Šav le Devlesko, ande leste ašel o Del, taj vi vo ašel ande o Del. 16Ame sičilam te prindžaras ke o Del kamel amen, taj ame pačandam amen les. O Del si kamimos, taj kodo kaj ašel and'o kamimos, ašel and'o Del, taj o Del ande leste. 17So o kamimos kamel amenca si te či daras kana avel o džes la krisako, ke ame sam sar o Jesus ande kadi luma. Le kamimos na'i les dar, 18o čačo kamimos našavel i dar. Ke o štrafo si ande i dar, taj ande kodo kaj daral o kamimos na'i tista vorta. 19Ame kamas, ke o Del kamlas amen anglunes. 20Te phenela varekon ke kamel le Devles, me sintik či kamel peske phrales, atunči kodo si xoxamno. Ke kodo kaj či kamel peske phrales kaj dikhlas, našti kamela le Devles kaj šoha či dikhlas vo. 21Taj kadi si i vorba kaj o Jesus das amen: Kado kaj kamel le Devles si te kamel vi peske phrales.
လက်ရှိရွေးချယ်ထားမှု
1 Johannes 4: LOV1984
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Det Norske Bibelselskap (Norwegain Bible Society) 1984