ဖိလေမုန်ဩဝါဒစာ 1:8-14

ထို့ကြောင့် ငါ​သည် သင်​ပြုသင့်​သည့်​အရာ​ကို​ပြု​ရန် အမိန့်​ပေး​နိုင်​သည်​ဟု ခရစ်တော်​အားဖြင့် ယုံကြည်​စိတ်ချ​မှု​အပြည့်အဝ​ရှိ​သော်လည်း ချစ်​ခြင်း​မေတ္တာ​အားဖြင့် သင့်​အား တောင်းပန်​ခြင်း​အမှု​ကို​သာ​ပြု​ပါ​၏။ ဤသို့ အိုမင်း​သူ​ဖြစ်​ပြီး ယခု​မူကား ခရစ်တော်​ယေရှု​နှင့်ဆိုင်သော​အကျဉ်းသား​လည်း​ဖြစ်​သည့် ငါ​ပေါလု​သည် အချုပ်အနှောင်​ခံရ​စဉ် ငါ့​သား​ဖြစ်လာ​သော​ဩနေသိမ်​အတွက် သင့်​ကို​တောင်းပန်​ပါ​၏။ သူ​သည် ယခင်​က သင့်​အတွက် အသုံး​မ​ဝင်​သူ​ဖြစ်​ခဲ့​သော်လည်း ယခု​မူကား သင့်​အတွက်​ရော ငါ့​အတွက်​ပါ အသုံးဝင်​သူ​ဖြစ်​လာ​၏။ သူ့​ကို သင့်​ထံသို့ ငါ​ပြန်​ပို့​လိုက်​၏။ သူ​သည် ငါ​၏​အသည်းနှလုံး​ဖြစ်​၏။ ငါ​သည် ကောင်းမြတ်​သော​သတင်း​အတွက် အချုပ်အနှောင်​ခံရ​စဉ် သင့်​ကိုယ်စား ငါ့​ကို​ကူညီ​ဆောင်ရွက်​ပေး​နိုင်​ရန် သူ့​ကို ငါ့​ထံ၌ ခေါ်​ထား​လို​ပါ​၏။ သို့သော် သင်​ပြု​သော​ကောင်းမှု​သည် မလွှဲမရှောင်​သာ၍​ပြု​ရ​ခြင်း​မျိုး​မ​ဟုတ်​ဘဲ မိမိ​ဆန္ဒ​အလျောက်​ဖြစ်​စေရန် သင်​၏​သဘော​တူညီ​ချက်​မ​ပါ​လျှင် မည်သည့်​အရာ​ကို​မျှ ငါ​မ​ပြု​လို​ပါ။