Baruk 3
3
1“Yu Lod wea yu bikfala tumas, God blong Israel. Long bikfala safa blong mifala, mifala krae go long yu antap. 2Yu herem mifala, Lod, an yu lavem mifala, bikos mifala sin long ae blong yu. 3Yu bikfala king olowe long antap, mifala nao save dae an go olowe. 4Lod yu bikfala tumas, yu God blong Israel, yu mas herem prea blong mifala, mifala i olsem olketa man dae nao, olketa olo grani blong mifala olketa sin long ae blong yu. Ya, olketa les fo herem Lod God blong olketa, mifala barava safa nogud long sin blong olketa. 5Yu fogetem olketa sin olketa olo grani blong mifala duim bifoa, long disfala nogud taem olsem, yu tingim nomoa strong blong yu an bikfala nem blong yu, 6bikos yu nao Lod God blong mifala, an yu seleva nao bae mifala preisim yu. 7Yu mas mekem mifala tingting hae long yu an mifala prea long yu. Long hia long ples wea mifala stap olsem slev, bae mifala preisim yu bikos mifala lusim olketa sin blong olo grani blong mifala.
8“Plis, yu lukim mifala stap olobaot midol long olketa narafala traeb long wea yu ronem mifala kam. Olketa lukdaon long mifala an olketa tokdaonem mifala. Yu panisim mifala bikos long sin blong olketa olo grani blong mifala, taem olketa tanem baeksaet long yu, Lod God blong mifala.”
Mekhae long waes
9Yufala#Provebs 4:20-22. long Israel yufala mas herem tok blong lo wea olketa save givim laef. Yufala mas herem an bae yufala waes. 10?Yufala long Israel, waswe nao yufala stap distaem insaet long lan blong enemi blong yufala, an yufala olo man finis insaet long narafala ples? Yufala no klin long ae blong God, olsem man hemi dae. 11?Waswe nao yufala laekem fo stap wetem sin blong yufala long ae blong God olsem man hemi dae, hemi olsem yufala dae tu? 12Diswan ya, bikos yufala tanem baeksaet long God, hemi nao botom blong waes. 13Sapos bifoa yufala falom rod blong God, bae yufala stap olowe long piis. 14Yufala mas skulim gud wea nao bae yufala save faendem tru waes, an strong, an tingting save. Long dea tu bae yufala faendem long laef, an piis, an laet wea bae hemi gadem yufala.
15?Hu#Job 28:12, 20. nao hemi faendem finis wea disfala waes hemi stap, o hemi go insaet long haos blong hem fo putum gud olketa samting? 16-17?Wea nao olketa bikman long ples olketa stap, an olketa hu i plei wetem fo ronem olketa wael animol an olketa bed, an olketa hu i kolektem tugeta olketa silva an gol, wea pipol putum trast blong olketa long hem, an olketa waka had tumas fo garem? 18An olketa wari tumas fo faendem wei fo tekem seleni, an no eni saen long waka blong olketa hemi stapbaek. 19Evrisamting olketa lus nating an olketa godaon long ples blong pipol dae. Samfala deferen pipol nao olketa kam an tekem ples blong olketa.
20Olketa narafala grup blong pipol olketa bon bihaen nao olketa stap long lan ya, olketa tu olketa no save rod fo go kasem waes, olketa no save mitim hem o save kasem hem. 21Olketa pikinini blong olketa tu olketa no save kasem hem. 22Olketa long Kenan an Idom olketa trae had tumas fo mitim waes an olketa no save faendem. 23Olketa pipol olketa faendem seleni long Meran an Teman, an olketa pipol save talem stori, an olketa stap olowe fo faendem gudfala tingting, evriwan long olketa trae had tumas, bat olketa no save faendem rod blong waes.
24Yufala Israel, yufala mas lisin gud. !Hemi bik tumas long ples wea God hemi stap! An hemi bik eria tumas tu wea hemi holem! 25Hemi no garem baondri blong hem, an hemi had tumas fo mesarem waed blong hem an hae blong hem. 26Long#Jenesis 6:4; Waestok 14:6. hia long bifoa wanfala kaen bik an strong pipol nao olketa bon kam an olketa save faet tumas. 27God hemi no siusim olketa fo olsem pipol blong hem seleva, o hemi som fo olketa wei fo tingting save. 28Olketa dae evriwan bikos olketa no garem waes, an hemi had fo olketa fo luksave long sin blong olketa.
29No eniwan hemi go long heven fo faendem waes fo hemi tekem kamdaon insaet long klaod. 30No eniwan hemi padol krosim bikfala si fo faendem waes, o baem long gol. 31No eniwan hemi save hao nao bae hemi go fo faendem hem, o hemi go fo faendem rod fo go long hem.
32God seleva nao hemi save long waes, an hemi seleva nao hemi save long evrisamting. Hemi faendem long save blong hem seleva. God hemi mekem disfala wol fo hemi stap olowe, an hemi fulumapem wetem olketa laef samting insaet.
33Hemi odarem laet fo hemi kam an hemi kam, hemi kolem hem kambaek an hemi kambaek bikos hemi tinghae long God. 34Hemi kolem olketa sta, an olketa kuiktaem tumas fo tokbaek an olketa talem olsem, “!Mifala long hia!” Olketa go stap long ples blong olketa an olketa hapi fo saen fo preisim hu nao hemi mekem olketa. 35Hem nao God blong yumi, no eniwan hemi olsem hem.
36Hem seleva nao hemi faendem rod hemi go long waes, hemi givim long Israel wakaman blong hem wea hemi lavem tumas. 37Stat long datfala taem an long taem bae hemi kam, waes hemi kamaot klia long wol an hemi stap insaet long yumi.
လက္ရွိေရြးခ်ယ္ထားမွု
Baruk 3: SIDC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Pijin Catholic Bible © Bible Society of the South Pacific, 2008.