San Lucas 8
8
Iy'o nk'aj ixqib' xikto' Jesús
1Tik'ri ri', xb'in Jesús chpam jumpa tinmit rich'il kanton chla', kitjin che ub'ixik utzlaj taq rson chke mnaq chrij utzlaj atb'altzij rech Dios chpam kk'asnmal mnaq. Ri Jesús jnam ib'enaq kuk' kab'aljuj (12) apóstol. 2Soq iy'o nk'aj ixqib' ib'enaq kuk' che esam chik itzel taq espíritu chke, rich'il nk'aj chik che iyab' nab'e kanoq. Kunjel jumpa nk'aj ixqib'e', iyuk'chojsam chik Jesús. Jun chke jare i Mri'y, che Magdalena kb'ix che, mal kpi chpam tinmit Magdala. Re, resam jqub' (7) itzel taq espíritu che rmal Jesús. 3Jun chik jare il Wa'n, rixqil u Chux. U Chux jare ajchijnel che ub'itaqre un rey Herodes. Soq b'enaq il Susana kuk', soq ik'i nk'aj chik ixqib' ib'enaq kuk'. Jare ke xikto' Jesús rich'il nk'aj udiscípulo ruk' sutaq o kuk'.
Ri Jesús xub'ij jun k'amb'al n'oj chrij jun ajtkil tiko'n
(Mt 13:1-9; Mr 4:1-9)
4Ik'i mnaq xiyel loq ptaq tinmit rech xikla Jesús. Re, ti xurilo che k'ilaj taq mnaq kiyitjinik kikmol kib', ena xub'ij jun k'amb'al n'oj chke, xub'ij:
5«O jun ajtkil tiko'n x'e che utikik utiko'n. Echi' kitjinik kujpij nk'aj ija', o nk'aj xqaj chpam b'e; xa rmal, xkitk'alb'ej kan mnaq chaqan, soq xipi nk'aj tz'kin y xiktij b'ik. 6O nk'aj chik ija' xqaj pujlom ab'aj che pim taj ulew o chjuch. Echi' xpo' loq, xichqijik mal rax taj ulew jachi xqaj wi. 7O nk'aj chik ija' xqaj chla' jachi k'wi ukup taq k'ix. Jnam xipo' loq ruk' nk'aj k'ix. Ena xuya t nk'aj k'ix che xk'iy nk'aj tiko'n, xa xuji'saj. 8Ni nk'aj chik ija' xqaj chpam utzlaj ulew. Chla' xpo' wi, xk'iyik, xiwchinik; xikya jun ciento uwuch chikjunjnal». Jala xub'ij Jesús. Echi' xb'itaj rmal, ko xch'awik xub'ij chik chke: «Chin kkaj kikta ntzij, chiktatb'ej ruk' kixkin. Chin kkaj kikch'ob' ntzij, nmister che utz utatb'xik kik'an che», xche chke.
Ri Jesús kub'ij suche che kub'ij k'amb'al taq n'oj
9Tik'ri xikta nk'aj discípulo che Jesús, xikb'ij: «¿Su kilwi un k'amb'al n'oji'?» xiche che. 10Re xub'ij chik chke: «Ix, y'om chiwe rmal Dios che kiwit'amaj mas chrij utzlaj atb'altzij rech Dios che uk'tum taj chiwuch ujer. Per ni nk'aj chik mnaq, xaq xaw ruk' k'amb'al taq n'oj kimb'ij chke. Xa jala', kilik che peche xub'ij jun ajb'il utzij Dios ujer che jawa xub'iji':
“Miskini' kika'yik, kikch'ob' taj su kikka'yej.
Miskini' kikta' su kb'ixik, kikch'ob' taj su kilwi”. (Is 6:9)
Jarewa xub'ij jun ajb'il utzij Dios ujer», xche Jesús chke.
Ri Jesús kub'ij su kilwi ri k'amb'al n'oj chrij jun ajtkil tiko'n
11Xch'aw chik Jesús, xub'ij: «Jarewa kilwi un k'amb'al n'oj: nk'aj ija' xaq ijnam ruk' peche utzij Dios. Lun ulew jachi xqaj wi nk'aj ija', xaq jnam ruk' peche nk'aj mnaq che kikta utzij Dios. 12O nk'aj mnaq che xaq ijnam ruk' peche jun b'e che xqaj ija' chpam. Kikta utzij Dios nab'e. Jumpa ija' che xqaj chpam b'e, kilik che xaq ijnam ruk' peche mnaq che kikta utzij Dios nab'e. Tik'ri kpi nitzel kuk', kuresaj b'i utzij Dios che xqaj chpam kanma', rech kikkoj t utzij Dios y kito'taj taj rmal. 13O nk'aj mnaq che xaq ijnam ruk' peche ulew che pim taj, xa ab'aj o chuxe'. Nk'aj mnaqi' kikta utzij Dios nab'e, kikk'am pkanma' ruk' ki'ktem. Per ot kchu'ab', mal ko taj itk'alik, peche tiko'n che ot mas ra', rmal pim taj ulew che xk'iy chpam. Xa rmal, kikch'ij t mas. Echi' kitaqch'ix che mak, soq we kpi k'ax chkij, kikya kan utzij Dios. 14O nk'aj mnaq che xaq ijnam ruk' peche ulew jachi k'wi ukup taq k'ix. Nk'aj mnaqi' kikta utzij Dios, tik'ri kiktaqej u'anik su kinom nab'e. Jare mas b'enaq kk'u'x ruk' kk'asnmal chi' chuchlew. Kkitzkuj ki'ktem ruk' kb'oymal rich'il nim'ij. Jumpa taq ile' kuya taj chke che kichkun Dios chpam kk'asnmal, peche tiko'n che kuya t uwuch. 15Per o nk'aj chik mnaq che peche utzlaj ulew che xqaj ija' chjuch, che ruk' ch'uch'uj kanma' kikta utzij Dios y kiktaqej u'anik su kub'ij. Kikya che kichkun Dios chpam kk'asnmal, jala peche nk'aj tiko'n che kiwchin kuk' y k'i uwuch kuya'o». Jala xub'ij Jesús chke.
Ri Jesús xub'ij jun k'amb'al n'oj chrij jtzuk' chaj
(Mr 4:21-25)
16«Ot jun mnaq kutzij jtzuk' chaj, tik'ri xa kuch'uq uwi', mowni kuwaj chuxe' jun ch'at, xani chkaj kuya wi, rech kuya saq chikuch jumpa mnaq kiyok b'ik. 17Runjel jumpa sutaq chla'al wam, k'aljan na, y runjel jumpa sutaq'ik che xa ch'uqtal uwi', k'aljan chsaq rech kit'amax na. 18Xa jala' utz utatb'xik ki'an che, mal chin jun che o su o ruk', kya na mas che. Per chin jun che ot mas su o ruk', kesax na ch'in che, che kuchomaj o ruk'». Jala xub'ij Jesús.#8:18 O mnaq che jaljoj xik'an che uch'ob'ik chrij jun tziji'. O nk'aj che xikb'ij, «Chin jun che o ukojb'al chwij, kya na mas un'oj chrij ntzij rech utz ku'on che uch'ob'ik, per chin kraj taj kukoj ntzij, kesax na ch'in che, che kuchomaj re che o ruk'».
Nk'aj rachlal Jesús xipitik rich'il kchuch
(Mt 12:46-50; Mr 3:31-35)
19Xuriq jun ij, xo'pan uchuch rich'il nk'aj rachlal Jesús chla' ruk'. Per xiyikun taj xiqib' ruk', mal k'i mnaq iy'o pja. 20Tik'ri xb'ix che Jesús:
—Ri chuch la rich'il nk'aj achlal la iy'o chuja, kkaj kikkil wuch la. —Jala xb'ix che.
21Ni Jesús xuk'ul uwuch, xub'ij chke mnaq:
—K'ax nk'u'x chke jumpa mnaq kikta utzij Dios, tik'ri kikkojo. K'ax nk'u'x chke jala peche k'ax nk'u'x chke nchuch rich'il nk'aj wachlal, —xche chke.
Ri Jesús xu'atij nimlaj tew rich'il uchu'ab' mar
(Mt 8:23-27; Mr 4:35-41)
22O jun ij xok Jesús chpam jun barco rich'il nk'aj udiscípulo. Xub'ij k'ut chke:
—Jo kuj'ax b'i ch'qap che nu'ab' mar, —xche chke.
Ena xikmaj kb'e pujlom ja', xib'ek. 23Echi' ib'enaq pujlom mar, xwar Jesús. Tik'ri, xaq t'et xpi jun nimlaj tew pujlom mar. Kitjinik knoj un barco che ja' y xa ch'in kraj rech kqaj un barco chuxe' ja'. 24Nk'aj discípulo xiqib' ruk' Jesús, xkik'suj, xikb'ij che:
—¡Ajtojnel, Ajtojnel, ya kuj'ji' chpam ja'! —xiche che.
Xk'astaj uwuch Jesús y xuyaj nimlaj tew rich'il ja', xu'atij. Tik'ri, xu'xan k'qi' rich'il uchu'ab' mar, runjel xu'xnik. 25Tik'ri xub'ij chke udiscípulo:
—¿Suche che kikub'a t ik'u'x chwij? —xche chke.
Ni ke jwert kix'em kib', soq kimiymatik. Ena xikb'ij chikuch:
—¿Chin lo nachi ri', che kutaq tew rich'il ja', tik'ri kiyikjon chjuch? —xicha'.
Ri Jesús xuresaj itzel taq espíritu che jun achi aj Gadara
(Mt 8:28-34; Mr 5:1-20)
26Ena xi'ax ch'qap che nu'ab' mar, xiyo'pan chpam klew aj Gadara,#8:26 Un tinmit Gadara soq kb'ix Gerasa che. chla' chjuch nk'aj tinmit ukwent Galilea. 27Echi' kitjin Jesús kel loq chpam un barco, o jun achi xpi ruk' che aj Gadara. Nachi ri', mas ujer iyoknaq nk'aj itzel taq espíritu che. Re ot ritz'yaq kukojo, mowni kikje chirchoch, xa chla' ruk' nk'aj kjul taq kamnaq kikje wi.
28Echi' xuril uwuch Jesús, xusik'b'aj rib', xixke' chjuch. Ko xch'awik, xub'ij:
—¿Su kawaj chwe at atJesús atuK'jol Dios che mas nim u'ij? Kimb'och'ij ajlom che xa ma'an k'ax chwe, —xche che.
29Jala xub'ij, mal kitjin Jesús che utaqik nitzel espíritu, kub'ij che, che kel b'i che nachi. Ujer chik ti chpom nachi rmal nitzel espíritu. Ni mnaq kixmom ruk' ktena rich'il chapb'al aqan. Ni re kuk'oqpij nk'aj ktena, kanmaj b'i ptaq nk'aj lyar jachi ot mnaq, xa ktaq b'i rmal nitzel espíritu o che. 30Ri Jesús kitjin na che utaqik nitzel espíritu, xuta che nachi, xub'ij:
—¿Su ab'i'? —xche che.
Ni nachi xub'ij:
—Legión nb'i', —xche che.
Jala xub'ij, mal mas ik'i nk'aj itzel taq espíritu iyoknaq che. Jun tzij «Legión» kel kub'ij «k'i». 31Ni nk'aj itzel taq espíritu xikb'och'ij ujlom Jesús che xa myutaq b'i chpam kk'olb'al nk'aj itzel taq espíritu. 32Ik'i nk'aj aq iy'o chla' chunqaj, kiyitjin che utzukxik kecha' chpam 'yes tza'm un jyub'. Ena mas xkitz'noj nk'aj itzel taq espíritu che Jesús che kuya chke kiyok pikpam nk'aj aq. Xa jala', ri Jesús xuya chke xiyok pikpam. 33Ena xiyel b'i nk'aj itzel taq espíritu che nachi, xib'e kuk' nk'aj aq, xiyok pikpam. Kunjel jumpa nk'aj aq xiyanmjik, xkitrij b'i kib' chuchi' un ch'kilik jyub', xiqaj chpam ja', xiji'ik.
34Echi' xkil nk'aj ajy'ul aq che jala x'antjik, xiyanmjik, anim xib'e che ub'ixik su xkilo. Xikya rson chla' chja, soq rich'il ptaq jyub'. 35Ni nk'aj mnaq xipi che rilik su x'antjik. Echi' xiyo'pan ruk' Jesús, xkilo che o nachi chla' che iyelnaq chik nk'aj itzel taq espíritu che. Nachi, ku'l chjuch Jesús, ukjom chik ritz'yaq, tz'qat chik upinsar. Ena mas xiyok il che. 36Jumpa nk'aj mnaq che xkilo su x'antjik, xikb'ij chik chke nk'aj chik mnaq. Xikb'ij chke su mow x'an che nachi ti xesax pik'ab' nk'aj itzel taq espíritu. 37Tik'ri, kunjel jumpa mnaq iy'o pukwent klew aj Gadara, xikb'och'ij ujlom Jesús rech kel b'i chla' kuk', rmal mas xkix'ej kib' che. Ena xok chik Jesús chpam un barco rech kitzlijik. 38Ni nachi che iyelnaq chik nk'aj itzel taq espíritu che, xub'och'ij ujlom Jesús rech kuya che k'e ruk', per ni Jesús xuya taj che x'e ruk', xaw xub'ij che:
39—Chatitzlij b'i chawchoch; jab'ij chke mnaq runjel sutaq utzil xu'on Qajaw Dios chawe, —xche che.
Ena, x'e nachi y xumaj ub'ixik chpam runjel un tinmit jumpa utzlaj taq utzil unom Jesús che.
Ri Jesús xuk'suj umb'al u Jairo y xuknaj jun ixoq
(Mt 9:18-26; Mr 5:21-43)
40Echi' x'ax chuloq Jesús ch'qap che un ja', ik'i mnaq xkik'laj. Mas xiki'ktik, mal kunjel ki'em echi' kk'unik. 41Ena xo'pan jun achi ruk' Jesús, Jairo ub'i', che jare jun chke nk'aj che itk'al pujlom rchoch Dios. Echi' xo'pnik, xixke' chjuch Jesús y xub'och'ij ujlom rech k'e ruk' chirchoch, 42mal o jun laj umb'al ya mer kkamik. Numb'ali', xa utkel chrij y xa kab'aljuj (12) jnab' o che.
Echi' kitjin Jesús che ub'e, mas ik'i nk'aj mnaq xiyitrij b'i chrij, ena xikpitz' Jesús chikxo'l. 43O jun ixoq chikxo'l nk'aj mnaq che xa yab'. Kab'aljuj (12) jnab' b'enaq chik che, che umjom loq nuyab'. Un yab'il urqom, xa kik' kitne' t chik che. Re b'enaq chik kuk' k'ilaj taq ajkun, per ot jun xikunik xuknaj. Xa rmal, uschom chik runjel jumpa o ruk'. 44Ena xqib' koq chrij Jesús y xuchap koq uchi' ritz'yaq. Xaq ruk', chanim xitne' kik' che, xik'chojik. 45Ni Jesús xuta chke nk'aj mnaq che itrin chrij, xub'ij:
—¿Chin xnuchapo? —xche chke.
Ni ke xikb'ij che, che ot jun chke xuchapo.
Ena xikb'ij u Lu' rich'il nk'aj rich'il:
—Ajtojnel, ik'i nk'aj mnaq kikpitz' la, soq kiktakpij la. ¿Suche k'ut che kta la chqe: ¿Chin xnuchapo? ¿Sut qit'am qo'j? —xiche ke che.
46Ni Jesús xub'ij:
—Wit'am che o jun mnaq xnuchapo, mal xinnab'ej che x'e ch'in nchu'ab' che ukanxik jun mnaq, —xche che.
47Nun ixoq kikun taj kuwaj uwuch chjuch Jesús che xik'chojik. Echi' xurilo che rit'am chik Jesús su xu'ono, kb'arb'atik xpitik, xixke' chjuch Jesús. Ena xub'ij che Jesús chikuch kunjel mnaq su rmal xuchap ritz'yaq. Soq xub'ij che chanim xik'chojik xaq ruk' jala xu'ono. 48Ri Jesús xub'ij che:
—Walk'al, xatik'chojik rmal xakub'a ak'u'x chwij. Xaq matichka'pik. Utz kat'e ile' ruk' utzil, —xche che.
49Kitjin na ri Jesús che tzij, ti xo'pan jun achi che jala upitik chirchoch u Jairo che tk'al pujlom rchoch Dios. Xub'ij che u Jairo:
—Namb'al xkamik, xa makojch latz' che nAjtojnel, —xche che.
50Per echi' xuta Jesús, xub'ij che u Jairo:
—Xa matok il, xa chakub'a ak'u'x chwij, kik'choj namb'al, —xche che.
51Echi' xo'pan Jesús chirchoch u Jairo, xuya taj chke nk'aj mnaq xiyok b'i pja ruk'. Xaq xaw u Lu' rich'il u Santiago, rich'il u Wan, soq rich'il uqaw uchuch nali. 52Kunjel jumpa mnaq iy'o chla', kiyo' che nali che xkamik, soq kiksik'b'aj kib' rmal b'is. Per ni Jesús xub'ij chke:
—Xa mixo'ik, nali kamnaq taj, xa kwarik, —xche chke.
53Per ni ke xa xiktij tze' che, mal kit'am che kamnaq chik nali. 54Ni Jesús xuchap qaj nali che u'ab', ko xuch'ab'ej, xub'ij che:
—Ali, ¡katwa'ljoq! —xche che.
55Ena xk'un chik ranma' nali. Chanim xk'astaj uwuch, xwa'ljik. Ri Jesús xutaq uya'ik uwa nali. 56Nk'aj uqaw uchuch nali jwert xikmiyma'. Per ni Jesús xyutaqo, xub'ij chke che ot jachi kikb'ij wi su x'antjik.
လက္ရွိေရြးခ်ယ္ထားမွု
San Lucas 8: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global