Hechos 21
21
U Pablo x'e chpam tinmit Jerusalén
1Echi' xqaya kan nk'aj qich'il, xujok chpam un barco, y sk'um xuj'e chpam ch'qap ulew o nk'aj mar che Cos ub'i'. Chkab' ij tik'ri xuj'e chik chpam ch'qap ulew o nk'aj mar che Rodas ub'i'. Tik'ri xuj'e chik chpam un tinmit Pátara. 2Chpam tinmit Pátara, o jun barco xqariq chla', jala k'e pukwent Fenicia. Ena xujok chpam y xqataqej qab'e xuj'e chik. 3Echi' xuj'ax puwi mar, xqil pnoq ch'qap ulew o nk'aj mar che Chipre ub'i', pqamox xkanaj kan wi chqe. Qataqem qab'e ujb'enaq, ast retal xujo'pan pukwent Siria. Xqataqej qab'e xuj'e chik, xuj'ax chpam tinmit Tiro mal chla' xuya kan eqa'n un barco. 4Iy'o mnaq xqariq chla' che kikjom utzij Qajaw Jesús, ena xujkanaj kan jqub' (7) ij kuk'. Ri Tyoxlaj Uxlab'xel xub'ij chke che ustaj we k'e u Pablo chpam tinmit Jerusalén, xa rmal xikb'ij che, che ustaj we k'ek. 5Per echi' xitz'qat jqub' (7) ij che uj'o kuk', xuj'e chik. Kunjel jumpa kwuch ke rich'il kixqil kalk'al, xujkijcha kanoq. Echi' xujo'pan chuchi' mar, xujxke'ik y xqa'an qach'ab'al ruk' Dios. 6Tik'ri xqaya rtzil qawuch chiquch y xqajach qib' kuk'. Xujok qo'j chpam un barco, ni ke xiyitzlij chitaq kchoch.
7Ni qo'j xujel chub'i chpam tinmit Tiro, xuj'e chik puwi mar, ast retal xujo'pan chpam jun chik tinmit Tolemaida ub'i'. Xqaya rtzil kwuch nk'aj qachlal iy'o chla' y xujkanaj kan jun ij kuk'. 8Chkab' ij chik, xujel b'i chpam tinmit Tolemaida, xuj'e chik y xujo'pan chpam un tinmit Cesarea. Echi' uj'o chik chla', xuj'e chirchoch u Pelipe. Re, jare jun che kub'ij utzlaj taq rson chrij Qajaw Jesucristo chke mnaq. Soq jare jun chke jqub' (7) ajtob'nel chikxo'l ajkojnel che xichay chla' Jerusalén nab'e. 9U Pelipe iy'o kjeb' (4) umb'al che mja kiyik'le'ik, kik'axij utzij Dios chke mnaq che kb'ix chke rmal Tyoxlaj Uxlab'xel. 10Echi' b'enaq chkeb' uxib' ij che, che uj'o chla', o jun chik achi xo'pan chla', che soq mismo ku'axij utzij Dios chke mnaq che kb'ix che rmal Tyoxlaj Uxlab'xel. Re, Agabo ub'i', jala upitik chpam tinmit Judea. 11Re xo'pan quk' rech kujurla' y kujuch'ab'ej, per echi' o chik quk', xuk'am pnoq nuximb'al u Pablo, y xumaj uximik rib' ruk'. Xuxim nk'aj rqan rich'il nk'aj u'ab', tik'ri xub'ij:
—Ri Tyoxlaj Uxlab'xel kub'ij che echi' ko'pan rjaw un ximb'ali' chpam tinmit Jerusalén, jawa kik'an nk'aj aj Israel che uximiki'. Tik'ri kikjach pik'ab' mnaq che iyaj Israel taj. —Jala xub'ij u Agabo.
12Echi' xqata' che jala xub'ij u Agabo, jumpa qawuch qo'j rich'il mnaq chpam tinmit Cesarea, jnam xqab'och'ij ujlom u Pablo, rech k'e taj chpam tinmit Jerusalén. 13Per nu Pablo xa xub'ij chqe:
—¿Suche che kixo'ik? Xa kiya nimlaj b'is chrij wanma'. In niy'om wib' che kinximik, soq niy'om wib' che miskini' su kinkamsax chpam tinmit Jerusalén, xa rmal rech ub'i' Qajaw Jesús, —xche chke.
14Echi' xqilo che kujkun taj kqa'atij, ena xqaya kanoq, xqab'ij:
—Jaretb'a chuna' su kraj Qajaw ku'on awuk', —xujche che.
15Echi' axnaqch keb' uxib' ij che, che jala x'antjik, xqanuk' qib' rech xuj'e chpam tinmit Jerusalén. 16Iy'o keb' uxib' chke mnaq kikjom utzij Dios kipi chpam tinmit Cesarea, jnam xuj'e kuk'. O jun chke che jala kpi chpam tinmit Chipre, Mnasón#21:16 U Mnasón soq kb'ix Nasón che. ub'i'. Re mas ujer chik ukjom utzij Qajaw Jesús. Ena qachomam che chla' ruk' re, kujkanaj kan wi che qaposada.
U Pablo xo'pan chpam tinmit Jerusalén
17Echi' xujo'pan chpam tinmit Jerusalén, xujkik'laj nk'aj qachlal ruk' ki'ktem, mas xiki'kat chqe echi' xujo'pan kuk'. 18Chkab' ij chik, jnam xuj'e ruk' u Pablo, xujk'ol ruk' u Santiago rech kqala' we utz uwuch. Echi' xujo'pnik, kunjel nk'aj ajk'mal b'e chke mnaq kikjom utzij Qajaw Jesús, kirqom kib' chla'. 19Ena xuya rtzil kwuch u Pablo, tik'ri xumaj ub'ixik chke runjel sutaq unom Dios chikxo'l mnaq che iyaj Israel taj, xa rmal uchak re che unom kuk'. 20Ena echi' xikta' che jala xub'ij u Pablo chke, xkinmirsaj u'ij Dios. Tik'ri xikb'ij che u Pablo:
—Jare' qachlal, per kawilo jumpa mil mnaq iyaj Israel che kikjomch Qajaw Jesucristo, kikb'ij che nmister kqataqej u'anik su tz'ib'tal chpam upxab' u Moisés. 21Kb'im chik chke mnaq che at katitjin che ub'ixik chke nk'aj aj Israel, che iy'o chikxo'l nk'aj mnaq che iyaj Israel taj, che nmister taj kik'ano, su tz'ib'tal kan chpam upxab' qari'jal Moisés, y soq nmister taj kikkoj retal kicuerpo nk'aj kik'jol, soq nmister taj kik'ano su costumbre chqo'j. 22Ni le' ¿su lo kqa'an chik awuk'? Ela kikmol kib' mnaq echi' kikta' che at'o chi' quk'. 23Jare utz we ka'ano su kqab'ij chawe. Iy'o kjeb' (4) achjab' chiqxo'l che o su kb'im che Dios che ruk' saqlaj tzij kik'an na. 24Chik'ma b'i awuk' rech jnam kijos'ij iwib' kuk' y kaya kirjil rech kiyikunik kiktojo kikkesaj kwi'. Xa jala', kunjel mnaq kikkilo che xa ch'anik sutaq kikb'ij mnaq chawij, mal at mismo katitjinik ka'ano sutaq tz'ib'tal chpam upxab' u Moisés. 25Per ni nk'aj ajkojnel che iyaj Israel taj, o wuj qatqom b'i kuk' ke, xqataq ub'ixik chke che kkib'soj taj jumpa wari', xaw kik'an kwent kib' ruk' che ot mow kiktij t'ij che y'om chikuch nk'aj tyox, soq ot mow kiktij kik', soq ot mow kiktij ut'ijal jun tiko'n che xa ujitz'em rib', y soq jun achi ruk' jun ixoq, ot mow che jnam kiwarik we ik'lunaq taj. —Jala xikb'ij che u Pablo.
Nk'aj mnaq xikchap u Pablo chpam nimlaj rchoch Dios
26Ena xyuk'am b'i u Pablo kjeb' (4) achjab' ruk' y chkab' ij jnam xikjos'ij kib' ruk' re, tik'ri k'ut xok chpam nimlaj rchoch Dios rech kub'ij chke jumpa ij kraj na che kikk'is ujos'axik kib'. Echi' kikk'is ujos'axik kib', chikjunjnal kikya sipnik chjuch Dios.
27Per echi' ya mer kitz'qat jqub' (7) ij, iy'o nk'aj aj Israel ipitnaq pukwent Asia, xiyok chpam nimlaj rchoch Dios. Echi' xkilo che o u Pablo chla', xikch'u'jarsaj nk'aj mnaq, ena xiktukb'lej kib' kunjel mnaq, y xikk'eq kib' chrij u Pablo, xikchapo. 28Tik'ri xiksik'b'aj kib' xikb'ij: «Qamnaq ixaj Israel, ¡chujit'o'! Jare nachi ri' che kb'in ptaq tinmit y kub'ij k'axlaj taq tzij chrij costumbre kik'an qamnaq, soq kub'ij k'axlaj taq tzij chrij upxab' u Moisés, y soq xa k'ax kch'aw chrij nimlaj rchoch Dios. Ni le' iyuk'mom loq nk'aj chik mnaq chpam nimlaj rchoch Dios, che qamnaq taj qo'j mal xa iyaj Grecia, y xa xketz'b'ej uwuch nimlaj rchoch Dios». Jala xikb'ij. 29Jala xikb'ij nk'aj mnaqi', xa rmal che kilom u Pablo rich'il u Trófimo aj Éfeso, che jnam iy'o chpam tinmit Jerusalén. Ena xikchomaj ke, che jare u Pablo xuk'am b'i u Trófimo chpam nimlaj rchoch Dios.
30Ena kunjel mnaq chpam tinmit Jerusalén xiyel ch'u'j, anim xipitik xikchap u Pablo y xkijru'rej loq. Xkesaj loq chpam nimlaj rchoch Dios, tik'ri xiktz'apij kan nk'aj uchija. 31Echi' kiyitjin che uchomxik su mow kik'an che ukamsxik, xo'pan rson ruk' nachi che tk'al pkijlom nk'aj soldado che kipi chpam tinmit Roma che kunjel mnaq chpam tinmit Jerusalén, mas sachnaq kk'u'x, xa rmal xiktukb'lej kib'. 32Ena xyumol nk'aj usoldado nachi che tk'al pkijlom nk'aj soldado, soq xyusk'ij nk'aj chik che o keqle'n itk'al pkijlom jpuq soldado. Tik'ri anim xib'e chla' jachi kimlom kib' kunjel mnaq. Echi' k'ut xkil nk'aj mnaq un kjaw soldado rich'il nk'aj usoldado, xiyu'xan che uch'ayik u Pablo.
33Tik'ri xpi nachi che tk'al pkijlom nk'aj soldado, xok ruk' u Pablo, xuchapo xutaq uximik ruk' keb' ktena ch'ich'. Tik'ri xuta chke nk'aj mnaq chin nachi y su umak unom. 34Per ni nk'aj mnaq xa mas xiksik'b'aj kib', wa'l xikb'ij nk'aj y wa'l xikb'ij nk'aj chik. Xa jala' xikun taj nachi che tk'al pkijlom nk'aj soldado xuta' sutaq kikb'ij, mal mas upikchi', k'aljan taj sutaq kikb'ij. Ena xutaq uk'amik b'i u Pablo chpam un ja jachi ik'wi nk'aj soldado. 35Echi' xiyo'pan ruk' nk'aj xklera che kok b'i pja, nk'aj soldado xa xiktelej chub'i u Pablo, xa rmal mas latz' ki'axik, mal mas kiktakpij kib' nk'aj mnaq itrin chkij. 36Kunjel nk'aj mnaq che itrin loq chkij, ko xiksik'b'aj kib', xikb'ij: «Chkamsaxoq», xiche che.
37Echi' ya mer kikk'am b'i u Pablo chpam un ja jachi ik'wi nk'aj soldado, u Pablo xub'ij che nachi tk'al pkijlom nk'aj soldado:
—¿Le o mow kimb'ij keb' uxib' ntzij che la? —xche che.
Ni nachi tk'al pkijlom nk'aj soldado, xuta che:
—¿Le katikunik katch'aw piktzij aj griego? 38¿Le xat at ri' ri jun aj Egipto che xukjo ch'oj chi' nab'e echi' xuyak ch'oj chrij atb'altzij y xyumol kjeb' mil (4,000) achjab' che xa ikamsnel, tik'ri xyuk'am b'i chpam jun lyar che xa chqi'j ulew? —xche che.
39Ena xub'ij chik u Pablo che:
—In taj. In naj Israel. Chla' xinalax wi chpam un tinmit Tarso, jare jun tinmit che mas nim riltjik o pukwent Cilicia. Kinta jun pawor che la, che kya la chwe kiyinch'ab'ej kunjel mnaq, —xche che.
40Xa jala', nachi che tk'al pkijlom nk'aj soldado, xuya che u Pablo che kyuch'ab'ej nk'aj mnaq. Ena xitk'e' u Pablo pujlom nk'aj xklera, tik'ri xuyak u'ab' chikuch mnaq, rech k'utb'alre che kunjel kiktz'apij kchi', ot jun kch'aw chik. Echi' otchich jun mnaq kch'awik, tik'ri xyuch'ab'ej nk'aj mnaq u Pablo piktzij aj hebreo,#21:40 O nk'aj mnaq kikb'ij che u Pablo xch'aw piktzij aj arameo y jare taj hebreo. xub'ij chke:
လက္ရွိေရြးခ်ယ္ထားမွု
Hechos 21: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global